ಛಂದಾಚೆ ಪಾಟಿಕ್ ಪಡೊನ್ ಸ್ಫಂದ್ ವಿಬಾಡ್ಚೊ ನಾಕಾ : ಕೊಂಕಣಿ ಛಂದಾಚ್ಯಾ ವಿಚಾರ್ ಸಾತ್ಯಾಂತ್ ಪ್ರೊ. ಕೇಶವ ಸದ್ರೆ
ಕೋಣ್ ಕವಿ ಕವಿತಾ ಬರಯ್ತಾನಾ ಛಂದ್ ಆನಿ ಮೀಟರ್ ಮತಿಂತ್ ಘೆವ್ನ್ ಬರಯ್ನಾ. ಹ್ಯೊ ಗಜಾಲಿ ತಾಚೆ ಕೃತಿಯೆಂತ್ ಸಹಜ್ಪಣಿ ಯೆತಾತ್ ಆನಿ ಉಪ್ರಾಂತ್ ಆಮಿ ತೆ ಮೆಜ್ತಾಂವ್. ಸಾಹಿತ್ಯಾಕ್ ಛಂದ್ ಆನಿ ವೃತ್ತ್ ವಿಚಾರ್ ಗರ್ಜೆಚೆ ವ್ಹಯ್ ತರೀ, ಛಂದಾ ಪ್ರಾಸ್ ಪಯ್ಲೆಂ ಸ್ಪಂದ್ ಆನಿ ಕೃತಿಯೆಂತ್ ಫಕತ್ ಛಂದ್ ನ್ಹಯ್ ಸ್ಪಂದ್ ಆಮಿ ಸೊಧಿಜೆ ಮ್ಹಣಾಲೊ ನಾಮ್ಣೆಚೊ ಸಮೀಕ್ಶಕ್ ಆನಿ ಪ್ರಾಧ್ಯಾಪಕ್ ಪ್ರೊ. ಕೇಶವ ಸದ್ರೆ. ಸದ್ರೆ ಸರ್ ಸಾಹಿತ್ಯ ಅಕಾಡೆಮಿ ಆನಿ ಕಲಾ ಅಕಾಡೆಮಿ ಗೊಂಯ್ ಹಾಂಚ್ಯಾ ಜೋಡ್ ಆಸ್ರ್ಯಾ ಖಾಲ್ ಅಕ್ಟೋಬರ್ 29 ಆನಿ 30 ತಾರಿಕೆರ್ ಕಾಂಪಾಲ್, ಪಣ್ಜಿ, ಗೊಂಯ್ ಹಾಂಗಾ ಆಸ್ಚ್ಯಾ ಕಲಾ ಅಕಾಡೆಮಿಚ್ಯಾ ಬ್ಲ್ಯಾಕ್ ಬೊಕ್ಸಾಂತ್ ಆಯೋಜಿತ್ ಕೆಲ್ಲ್ಯಾ ಕೊಂಕಣಿ ಸಾಹಿತ್ಯಾಂತ್ಲೊ ಛಂದ್ ಆನಿ ವೃತ್ತ್ ವಿಚಾರ್ ಹ್ಯಾ ದೋನ್ ದಿಸಾಂಚ್ಯಾ ಸೆಮಿನಾರಾಂತ್ ಬಿಜ್ ಭಾಷಣ್ ಕರುನ್ ಉಲಯ್ತಾಲೆ.
ಹ್ಯಾ ದೋನ್ ದಿಸಾಂಚ್ಯಾ ಸೆಮಿನಾರಾಂತ್ ದೋನ್ ಮಹತ್ವಾಚೆ ವಿಚಾರ್ ವಯ್ರ್ ಪಡ್ಲೆ. ಆನಿ ತೆ ಮ್ಹಳ್ಯಾರ್ - ಏಕ್ , ಸಾಹಿತ್ಯಾಂತ್ ಗದ್ಯ್ ಆನಿ ಪದ್ಯ್ ವಿಂಗಡ್ ಕರ್ಚೊ ಛಂದ್ ಆನಿ ಮೀಟರಾನ್. ಪೂಣ್ ಕೋಣ್ ಕವಿ ಛಂದ್ ಚಿಂತೂನ್ ಬರಯ್ನಾ. ತೋ ಬರ್ಪಾ ಭಿತರ್ ಆಸ್ತಾ ಆನಿ ಸಭಾವಿಕ್ಪಣಿ ಯೆತಾ. ಪೂಣ್ ಛಂದ್ ಮುಕ್ತಾಂತ್ ಕವಿತಾ ಬರಯ್ತೆಲ್ಯಾ ಕವಿಕ್ ಜರ್ ಛಂದ್ ಆನಿ ವೃತ್ತ್ ವಿಚಾರಾ ವಿಷ್ಯಾಂತ್ ಮಾಹೆತ್ ಸಮ್ಜಣಿ ಆನಿ ಅಣ್ಬವ್ ಆಸ್ಲ್ಯಾರ್ ತಾಚಿ ಕೃತಿ ಬರಿ ಜಾತಾ.
ದುಸ್ರೊ ವಿಚಾರ್ - ಕೊಂಕಣಿ ಭಾಶೆಚೆ ಆವಾಜ್ ಸಾಮ್ಕೆ ವೆಗ್ಳೆ ದೆಕುನ್ ಆಸಾ ತಶೆ ಸಂಸ್ಕೃತ್ , ಮರಾಠಿ, ಕನ್ನಡ ವಾ ಹೆರ್ ಭಾಶೆಚಿಂ ಛಂದ್ ಆನಿ ವೃತ್ತ್ ವಿಚಾರ್ ನೇಮಾಂ ಹಾಂಗಾ ಲಾಂವ್ಕ್ ಜಾಯ್ನಾಂತ್. ಪೂಣ್ ಕೊಂಕ್ಣಿ ಭಾಸ್ ಸಂಸ್ಕೃತಾಕ್ ಲಾಗಿಂ ಆಸಾ ದೆಕುನ್ ಕೊಂಕ್ಣಿ ಭಾಶೆಚ್ಯಾ ಛಂದ್ ಆನಿ ವೃತ್ತ್ ವಿಚಾರಾಂವಿಷಿಂ ಅಧ್ಯಯನ್ ಕರ್ನ್ ನೆಮಾಂ ರಚ್ತಾನಾ ಸಂಸ್ಕೃತ್ ಭಾಶೆಚೆಂ ಛಂದ್ ಆನಿ ವೃತ್ತ್ ಶಾಸ್ತಿರ್ ಬುನ್ಯಾದ್ ಜಾವ್ನ್ ಮಾತ್ ಘೆವ್ಯೆತ್.
ಏಕ್ ವಿಚಾರ್ ಅಸೋಯೀ ವಯ್ರ್ ಪಡ್ಲೊ, ಸಂತ ಜ್ಞಾನೇಶ್ವರ ತಸಲೊ ಮಹಾನ್ ದಾರ್ಶನಿಕ್ ಆಪ್ಲ್ಯಾ ಕಾವ್ಯಾಂತ್ ಎದೆಂ ವ್ಹಡ್ ಜಿಣ್ಯೆ ತತ್ವ ಗಿನ್ಯಾನ್ ದೀವ್ನ್ ಗೆಲೊ. ಆನಿ ಆಮಿ ಆಯ್ಚೆ ಮನಿಸ್ ತಾಣೆ ದಿಲ್ಲೆ ತತ್ವ್ ವಾಚುನ್ ಸಮ್ಜೊಂಚ್ಯಾ ಬದ್ಲಾಕ್, ಚಿಕಿತ್ಸಕಾಪರಿಂ ತಾಚ್ಯಾ ಕಾವ್ಯಾ ಮೀಟರಾಂ, ಮಾತ್ರಿಂ ಲಾವ್ನ್ ಮೆಜೂಂಕ್ ಪಡ್ಲ್ಯಾಂವ್. ಆನಿ ಜಿಣ್ಯೆ ತತ್ವ ಗಿನ್ಯಾನ್ ಕೊನ್ಶ್ಯಾಕ್ ಉರ್ಲಾಂ. ಬಾಕಿ ಬಾಬ್ ಬೋರ್ಕರಾಚ್ಯಾ ಕವಿತೆಂತ್ ಛಂದ್ ಆನಿ ವೃತ್ತ್ ವಿಚಾರ್ ಹೆ ವಿಶ್ಯಾಂತ್ ಅಪ್ಲೆಂ ಪ್ರಸಂಟೇಶನ್ ಮಾಂಡುನ್ ಜಾಲ್ಯಾ ಉಪ್ರಾಂತ್ ಪ್ರಾಧ್ಯಾಪಕ್ ಭೂಷಣ್ ಭಾವೆನ್ ಅಶೆಂ ಮ್ಹಳೆಂ.
ಪ್ರಸ್ತಾವಿಕ್ ಉಲವ್ಪ್ ದೀವ್ನ್ ಯೆವ್ಕಾರ್ ಮಾಗ್ತಾನಾ ಸಾಹಿತ್ಯ ಅಕಾಡೆಮಿಚ್ಯಾ ಮುಂಬಯ್ ಪ್ರಾದೇಶಿಕ್ ಕಾರ್ಯಾಲಯಾಚೊ ಪ್ರಭಾರಿ ಡೊ. ಖುರ್ಶೀದ್ ಆಲಮ್ ಮ್ಹಣಾಲೊ " ಸಾಹಿತ್ಯ ಅಕಾಡೆಮಿ 24 ಭಾಸಾಂ ಖಾತಿರ್ ಕಾಮ್ ಕರ್ತಾ. ತಾಂತ್ಲೆ ಫಕತ್ 22 ಭಾಸೊ ಮಾತ್ರ್ 8 ವ್ಯಾ ವಳೆರಿಂತ್ ಮಾನ್ಯತಾ ಆಸ್ಚ್ಯೊ. ಹರ್ ವರ್ಸಾ ಅಕಾಡೆಮಿ ಹ್ಯಾ 24 ಭಾಸಾಂನಿ ಚಡುಣೆಂ 400 ಕಾರ್ಯಕ್ರಮಾಂ ಕರ್ತಾ. ಹರ್ ತಿಸ್ರ್ಯಾ ದಿಸಾ ಮ್ಹಳ್ಳೆಪರಿಂ ಅಕಾಡೆಮಿ ಏಕ್ ಕಾರ್ಯಕ್ರಮ್ ಮಾಂಡುನ್ ಹಾಡ್ಟಾ ಮಾತ್ ನ್ಹಯ್ ಹರ್ 50 ಮಿನುಟಾಂಕ್ ಸಾಹಿತ್ಯ ಅಕಾಡೆಮಿ ಥಾವ್ನ್ ಏಕ್ ಬೂಕ್ ಫಾಯ್ಸ್ ಜಾತಾ. ಇತ್ಲ್ಯಾ ಮ್ಹಣ್ಜೇ 24 ಭಾಸಾಂಕ್ ಸಾಂಗಾತಾ ಘಾಲ್ನ್ ಕಾಮ್ ಕರ್ಚೊ ಸಂಸ್ಥೊ ಸಂಸಾರಾಂತ್ ಖಂಯ್ಯೀ ನಾ.
ಗದ್ಯ್ ಅನಿ ಪದ್ಯ್ ಹಾಂಚೆ ಮಧೆಂ ಫಕತ್ ಏಕ್ ಬಾರೀಕ್ ಜಾದೂಚೊ ಗೀಟ್ ಆಸಾ. ಛಂದ್ ಆನಿ ಮೀಟರ್ ಫಕತ್ ಕಾವ್ಯಾಂತ್ ಮಾತ್ ಆಸಾ ಮ್ಹಣೊಂಕ್ ಜಾಯ್ನಾ. ಅಮೃತಾ ಪ್ರೀತಮ್ ತಸಲ್ಯಾ ಲೇಕಕಿನ್ ಗದ್ಯ್ ಬರಯ್ಲ್ಯಾರೀ ಕವಿತಾ ಜಾತಾ. ಆಜ್ ಕೊಂಕಣಿ ಸಾಹಿತ್ಯಾಂತ್ಲೊ ಛಂದ್ ಆನಿ ವೃತ್ತ್ ವಿಚಾರ್ ಹ್ಯಾ ದೋನ್ ದಿಸಾಂಚ್ಯಾ ಸೆಮಿನಾರಾಂತ್ ಹೊ ಗೀಟ್ ಸೊದ್ಚೆಂ ಏಕ್ ಪ್ರೇತನ್ ಕರುಂಕ್ ಚಿಂತ್ಲಾಂ, ಮ್ಹಣಾಲೊ ಡೊ. ಖುರ್ಶೀದ್ ಅಲಮ್.
ಸಾಹಿತ್ಯ ಅಕಾಡೆಮಿ, ಕೊಂಕಣಿ ಸಲಹಾ ಮಂಡಳೆಚೊ ನಿಮಂತ್ರಕ್ ಪುಂಡಲೀಕ್ ನಾರಯಣ್ ನಾಯಕ್ ಮ್ಹಣಾಲೊ ಕೇರಳಾ ರಾಜ್ಯಾ ಥಾವ್ನ್ ರಮೇಶ್ ಪಯ್ಯನ್ನೂರ್ ಬರಿ ಖಬರ್ ಹಾಡ್ನ್ ಆಯ್ಲ್ಯಾತ್. ಕೇರಳಾಂತ್ ಕೊಂಕಣಿ ಅಕಾಡೆಮಿ ಜಾಲ್ಯಾ ಆನಿ ಪಯ್ಯನ್ನೂರ್ ಪಯ್ಲೊ ಅಧ್ಯಕ್ಶ್ ಜಾಲ್ಯಾತ್. ಪಯ್ಲೆಂ ಗೊಂಯಾಂತ್ ಉಪ್ರಾಂತ್ ಕರ್ನಾಟಕಾಂತ್ ಆನಿ ಆತಾಂ ಕೇರಳಾಂತ್ ಜಾಲ್ಲೆಪರಿಂ ಮುಕಾರ್ ಮಹಾರಾಷ್ಟ್ರಾಂತೀ ಕೊಂಕಣಿ ಅಕಾದೆಮಿ ಜಾಯ್ಜೆ ಮ್ಹಣಾಲೊ ಪುಂಡಲೀಕ್ ನಾಯಕ್.
ಆದ್ಲ್ಯಾ ವರ್ಸಾ ಪಾಟಿಯಾಲಾಂತ್ ಸಾಹಿತ್ಯ ಅಕಾಡೆಮಿನ್ ಮಾಡುನ್ ಹಾಡುಲ್ಲ್ಯಾ ಭಾರತೀಯ್ ಕಾವ್ಯಾಚ್ಯಾ ಛಂದ್ ಶಾಸ್ತ್ರಾಚ್ಯಾ ಪ್ರೇರಣಾನ್ ಹಿ ಸೆಮಿನಾರ್ ಉಬಿ ಜಾಲ್ಯಾ ಮ್ಹಳ್ಳ್ಯಾ ಪುಂಡಲೀಕ್ ನಾಯ್ಕಾನ್ ಛಂದ್ ಪ್ರಕೃತೆಂತ್ಚ್ ಆಸಾ ಆನಿ ಕೊಂಕ್ಣೆಂತ್ ತೊ ರೆಂದೆರಾಚ್ಯಾ ಚಾಲಿ ಪಾಸುನ್ ಆಸಾ ಮ್ಹಣ್ಯೀ ಮ್ಹಳೆಂ.
ಇಂಡೋ ಆರ್ಯನ್ ಕೊಂಕ್ಣಿ ಭಾಸ್ ತಿಚ್ಯಾ ಭಾಷಿಕ್ ವಿಖಂಡಿಪಣಾನ್ ಗಿರೇಸ್ತ್ ಜಾಲ್ಯಾ ಆನಿ ಪಯ್ಲೆಂ ಕೊಂಕ್ಣಿ ಬರಪ್ ಕರ್ನಾಟಕಾಚ್ಯಾ ಶ್ರವಣಬೆಳಗೊಳಾಂತ್ ಆಸಾ ಮ್ಹಣ್ ದಿಸುನ್ ಯೆತಾ. ಶೆಣಯ್ ಗೊಂಯ್ ಬಾಬಾ ಥಾವ್ನ್ ಧರುನ್ ಜುಜೆ ಪಿರೆರ್, ಮೈಕಲ್ ಮಾಡ್ತಿಸ್ ಹಾಣಿ ಕೊಂಕ್ಣೆಂತ್ ಛಂದ ಶಾಸ್ತಿರಾ ವಿಶ್ಯಾಂತ್ ಅಭ್ಯಾಸ್ ಕೆಲ್ಲೊ ದಿಸ್ತಾ ಮ್ಹಳ್ಳ್ಯಾ ಪುಂಡಲೀಕ್ ನಾಯ್ಕ್ ಹಾಣಿ ವೊವಿ ಛಂದಾಕ್ ಕಾಂಯ್ 1000 ವರ್ಸಾಂಚೊ ಇತಿಹಾಸ್ ಆಸಾ ಆನಿ ಅಭಂಗಾಂತೀ ತಿ ದಿಸುನ್ ಯೆತಾ ಮ್ಹಳೆಂ.
ಛಂದ ಶಾಸ್ತ್ರಾಚೆಂ ಶಿಕಪ್ ಆಯ್ಚ್ಯಾ ಕಾಳಾಚಿ ಗರ್ಜ್ ಮ್ಹಳ್ಳ್ಯಾ ಪುಂಡಲೀಕ್ ನಾಯ್ಕಾನ್ ಹ್ಯಾ ಶಾಸ್ತ್ರಾ ವಿಶ್ಯಾಂತ್ ಖೊಲಾಯೆನ್ ಅಧ್ಯಯನ್ ಜಾಂವ್ಚಿ ಗರ್ಜ್ ಆಸಾ. ಕೊಂಕ್ಣಿ ಸಮಾಜ್ ಹೆರ್ ಸಮಾಜೆಪರಿಂ ಏಕ್ ಪ್ರಬುದ್ಧ್ ಸಮಾಜ್ , ಪಬುದ್ಧ್ ಸಮಾಜ್ ಶಾಸ್ತ್ರಾಂ ನಿರ್ಮಿತಿ ಕರ್ಪಿ ಸಮಾಜ್. ದೆಕುನ್ ಹ್ಯಾ ಶಾಸ್ತ್ರಾಚಿ ಗರ್ಜ್ - ಮ್ಹಣಾಲೊ ತೊ.
ಗೊಂಯ್ ವಿದ್ಯಾಪೀಠಾಚೆ ಉಪಕುಲಪತಿ ಡಿ. ದೇವ್ಬಾಗ್ಕರ್ ಹಾಣಿ ಸೆಮಿನಾರ್ ಉಗ್ತಾಯ್ಲೊ ಆನಿ ಶೀದಾ ಸವಾಲ್ ಕರ್ನ್ ಮ್ಹಣಾಲೊ : ಆದಿಂ ಗಾಂವ್ಚಿಂ ಬಾಯ್ಲಾಂ ಲೋಕ್ ಗೀತ್ ಗಾಯ್ತಾಲಿಂ. ತಾಂಕಾ ಛಂದ್ ಶಾಸ್ತ್ರ್ ಶಿಕೊಂಕ್ ಕೋಣ್ ಗೆಲ್ಲೊ? ಹೆಂ ಸಗ್ಳೆಂ ಶಾಸ್ತ್ರ್ ಕವಿಕ್ ನಯ್ಸರ್ಗಿಕ್ ಥರಾನ್ ಯೇಜೆ ಶಿವಾಯ್ ಶಾಸ್ತ್ರಾಂ ವಾಚುನ್ ನ್ಹಯ್. ನಯ್ಸರ್ಗಿಕ್ ಗಜಾಲಿಚೆಂ ಸುತ್ ಧರುನ್ ಮುಕಾರ್ ವಚೊನ್ ಕುಲಪತಿ ದೇವ್ಬಾಗ್ಕರ್ ಮ್ಹಣಾಲೊ ನಿಸರ್ಗಾಚ್ಯಾ ಹರ್ ಗಜಾಲಿಂತ್ ಛಂದ್ ಆಸಾ. ಕಿತ್ಲೆಂ ಮ್ಹಳ್ಯಾರ್ ಮನ್ಶಾಚಿ ಮೂಳ್ ಗಜಾಲ್ ಡಿ ಎನ್ ಎ ಹಾಂತ್ಲೆ ಮೋಲಿಕ್ಯುಲ್ ಮೆಜ್ಲ್ಯಾತ್ ತಾಂತುಂಯ್ ಮೀಟರ್ ಆಸಾ. ಹೆಂ ಕೊಣೆಂ ಕೆಲ್ಲೆಂ? ದೆಕುನ್ ಸಾಹಿತ್ ವಾಚಾ, ಸಮ್ಜುನ್ ಘೆಯಾ. ಶಾಸ್ತೋಕ್ತ್ ಗಜಾಲಿಂಚೆರ್ ಚಡ್ ಭೊರ್ ನಾಕಾ - ಮ್ಹಣ್ ಆಪ್ಣಾಕ್ ತರಿ ಭೊಗ್ತಾ ಮ್ಹಣಾಲೊ ಕುಲಪತಿ ದೇವ್ಬಾಗ್ಕರ್. ಆಜ್ ವಚಕ್ ಸಂಸ್ಕೃತಿ ಉಣಿ ಜಾಲ್ಯಾ ಅಶೆಂ ಆಯ್ಕುಂಕ್ ಯೆತಾ ತೆಂ ಕರೆಂ ನ್ಹಯ್. ಫಕತ್ ವಾಚ್ಚಿ ರಿತಿಂತ್ ಬದ್ಲಾವಣ್ ಜಾಲ್ಯಾ ಮ್ಹಣಾಲೊ ಡಿ. ದೇವ್ಬಾಗ್ಕರ್.
ಆಪ್ಲ್ಯಾ ಬಿಜ್ ಭಾಶಣಾಂತ್ ಪ್ರಾಧ್ಯಾಪಕ್ ಕೇಶವ ಸದ್ರೆ ಹಾಣಿ ಕಾಂಯ್ ಮಹತ್ವಾಚೆ ಮುದ್ದೆ ಮಾಂಡ್ಲೆ. ಕೊಂಕ್ಣಿ ಭಾಶೆಕ್ ಕೊಂಕಣಿ ಭಾಶೆಚೆಂಚ್ ಛಂದ್ ಶಾಸ್ತಿರ್ ಗರ್ಜ್ ಆಸಾ ಮ್ಹಳ್ಳ್ಯಾ ಸದ್ರೆ ಸರಾಂನಿ ಬಾಕಿಬಾಬ್ ಬೋರ್ಕರ್ ಹಾಣಿ ಬರಯಿಲ್ಲ್ಯಾ `ಮಾಝಿ ಅಗ್ಬೋಟ್' ಮರಾಠಿ ಕವಿತೆಂತ್ ಕಸೊ `ಜಲಾರೋಹಣ್ ಛಂದ್' ಆಯ್ಲೊ ಆನಿ ಮಾಧವರಾವ್ ಫಟವರ್ಧಾನ್ ಹಾಣಿ ಕಸೊ ತೊ ದಾಕವ್ನ್ ದಿಲೊ ಮ್ಹಳ್ಳಿ ದೇಕಿ ದಿಲಿ. ಉತಳ್ ಸಾಹಿತ್ಯಾಚಿ ಗಂಬೀರ್ಪಣಿ ಆಲೊಚೆನ್ ಕರುಂಕ್ ಘೆತುಲ್ಲ್ಯಾ ಸದ್ರೆ ಸರಾಂನಿ ’ಬ್ಯಾಡ್ ಕೊಯಿನ್ಸ್ ಡ್ರಾಯ್ವ್ ಗುಡ್ ಕಾಯ್ನ್ಸ್ ಅವ್ಟ್ ಒಫ್ ಸರ್ಕ್ಯುಲೇಶನ್’ ಹ್ಯಾ ಕಾಯ್ಯ್ದಾಚೊ ಉಲ್ಲೇಕ್ ಕರ್ನ್ ಖಡಾಖಡ್ ಮ್ಹಳೆಂ ಮುಕ್ತ್ ಛಂದ್ ಮ್ಹಳ್ಯಾರ್ ಮನಾಕ್ ಯೆತಾ ತಶೆಂ ಬರಂವ್ಚೆಂ ನ್ಹಯ್. ದಯಾಕರುನ್ ಮುಕ್ತ್ ಛಂದ್ ವಿಬಾಡಿನಾಕಾತ್. ಗದ್ಯ್ ಆನಿ ಪದ್ಯ್ ಹ್ಯಾ ದೊನಾಂಮಧೆಂ ಮುಳಾವೊ ಭೇದ್ ಆಸ್ಚೊ ಯತಿಚೊ ಮ್ಹಳ್ಳ್ಯಾ ಸದ್ರೆ ಸರಾಂನಿ ಯತಿ ಮ್ಹಳ್ಯಾರ್ ವಿಚಾರ್ ಮ್ಹಣ್ಜೆ ’ಪಾಜ್’ ಮ್ಹಣ್ ಸ್ಪಶ್ಟ್ ಕೆಲೆಂ. ಹ್ಯಾ ಗಜಾಲಿಕ್ ತಾಣಿ ಕುಂದರ್ ದಿವಾಣ್ ಹಾಂಚ್ಯಾ ’ಛಂದಶಾಸ್ತ್ರ ಏಕ್ ಅಧ್ಯಯನ್’ ಹ್ಯಾ ಗ್ರಂಥಾಚೊ ಉಲ್ಲೇಕ್ ದಿಲೊ.
ಆಮ್ಗೆಲಿ ಸಗ್ಳಿ ಸಂಸ್ಕೃತಾಯ್ ಆಮ್ಚೆಮೆರೆನ್ ಪಾವ್ತಾ ಭಾಶೆಕ್ ಲಾಗುನ್ ಮ್ಹಳ್ಳ್ಯಾ ಸದ್ರೆ ಸರಾಂನಿ ಸಂಗೀತ್ ಕಾವ್ಯ್ ಆನಿ ಸಂಗೀತ್ ಹಾಂತು ಕಂಪಾರ್ಟ್ಮೆಂಟಲಾಯ್ಶೇಶನ್ ಆಯಿಲ್ಲ್ಯಾನ್ ಕವಿತೆಚೊ ಶಕ್ತಿಪಾತ್ ಜಾವ್ನ್ ಗೆಲೊ ಮ್ಹಣಾಲೊ ಸದ್ರೆ ಸರ್.
ಕಲಾ ಅಕಾಡೆಮಿಚೊ ಸದಸ್ಯ ಸಚಿವ್ ಪಾಂಡುರಂಗ ಫಳ್ದೇಸಾಯಿ ಹಾಣಿ ಅಬಾರ್ ಮಾಂದ್ಲೊ ಅನಿ ಮ್ಹಣಾಲೊ ಆಜ್ ಜೊಡಲ್ಲ್ಯಾ ಪ್ರೇರಣಾನ್ ವೆಗಿಂಚ್ ಏಕ್ ಕವಿತಾ ಜಮೊ ಬರವ್ನ್ ಕಾಡ್ತಲೊಂ.
ಉಗ್ತಾವಣಾ ಉಪ್ರಾಂತ್ ಪಯ್ಲೊ ಸತ್ರ್ ಛಂದ್ ವಿಚಾರಾಚಿ ಭಾರತೀಯ್ ಪರಂಪರಾ ಹ್ಯಾ ವಿಶಯಾಚೆರ್ ಪ್ರಾ. ಲಕ್ಮಣ್ ಚಿತ್ರೆ ಹಾಂಚ್ಯಾ ಅಧ್ಯಕ್ಷ್ ಪಣಾರ್ ಪಾರ್ ಪಡ್ಲೊ ಆನಿ ಹ್ಯಾ ಸತ್ರಾಂತ್ ಮರಾಠಿ ತರ್ಫೆನ್ ಡೊ. ಶುಭಾಂಗಿ ಪಾತುರ್ಕರ್ ಹಿಣೆ ಆಪ್ಲೆ ವಿಚಾರ್ ಮಾಂಡ್ಲೆ. ತಿ ಮ್ಹಣಾಲಿ ಕಾವ್ಯೆಂ ಕ್ಲಿಷ್ಟ್ ಜಾವ್ನ್ ಫಾಯ್ದೊ ನಾ. ಕವಿತಾರಚನ್ ರೂಕ್ಶ್ ಆಸುನಾಯೆ. ಕಾವ್ಯಾಚೆಂ ಫಾವೊತೆಂ ಅಭಿಸರಣ್ ಜಾಯ್ಜೆ ತರ್ ತಾಂತು ರಂಜಕತಾ ಆನಿ ಆಹ್ಲಾದ್ ಆಸೊಂಕ್ ಜಾಯ್. ವಾಟರ್ ಟೈಟ್ ಕಂಪಾರ್ಟ್ ಮೆಂಟಾಂತ್ ಕಾವ್ಯೆಂ ಉರನಾಯೆ. ದೆಕುನ್ ಛಂದ ಪ್ರಾಸ್ ಸ್ಫಂದ ಪಯ್ಲೊ ಯೇಜೆ ಮ್ಹಣ್ಚ್ಯಾ ಮತಾಕ್ ತಿಣೆ ಆಪ್ಲೊ ಸಹಮತ್ ದಿಲೊ.
1912 ವರ್ಸಾ ಡೊ. ಮಾಧವರಾವ್ ಫಟವರ್ಧನ್ ಹಾಣಿ ಮರಾಠಿ ಭಾಶೆಂತ್ ಛಂದ್ ಶಾಸ್ತ್ರಾ ವಿಶ್ಯಾಂತ್ ಪಯ್ಲೊ ಗ್ರಂಥ್ ಬರವ್ನ್ ಕಾಡ್ಲೊ ಮ್ಹಳ್ಳ್ಯಾ ತಿಣೆ ವೊವಿ ಥಾವ್ಮ್ ಮುಕ್ತ್ ಛಂದ್ ಪರ್ಯಾಂತ್ ಹ್ಯಾ ಗ್ರಂಥಾಂತ್ ಮಾಹೆತ್ ಆಸಾ. ಪೂಣ್ ಛಂದ ಶಾಸ್ತ್ರಾ ವಿಶ್ಯಾಂತ್ ವಿಶ್ಲೇಷಣಾತ್ಮಕ್ ಬೂಕ್ ಬರಯಿಲ್ಲ್ಯಾ ನಾ ಗಾ ಜೋಶಿ ಹಾಣಿ ಮರಾಠಿ ಛಂದ ಶಾಸ್ತ್ರಾಚ್ಯಾ ಅಧ್ಯಯನಾಂತ್ ನವ್ಯಾ ಸಾಧ್ಯತಾಂಕ್ ಅವ್ಕಾಸ್ ಆಸಾತ್ ಮ್ಹಳ್ಳೆ ವಿಶಿಂ ಸಾಂಗ್ಲಾಂ ಮ್ಹಣ್ ಡೊ. ಪಾತುರ್ಕರ್ ಮ್ಹಣಾಲಿ.
ಕಾಳ್ ಸ್ಥಿರ್ ಫಕತ್ ಮನಿಸ್ ಮಾತ್ ಗತಿಶೀಳ್ ಮ್ಹಣ್ ಕಾಳಾತತ್ವಾ ವಿಶ್ಯಾಂತ್ ಸಾಂಗೊನ್ ಆಪ್ಲೆಂ ಉಲವ್ಪ್ ಸುರು ಕೆಲ್ಲ್ಯಾ ಪ್ರಾ. ಲಕ್ಮಣ್ ಚಿತ್ರೆ ಹಾಣಿ ಪದಾಂಕ್ ಕಾವ್ಯೆಂ ಮ್ಹಣ್ಚೆಂ ತರ್ ಲಯಬದ್ಧ್ ಗದ್ಯ್ ಕಾವ್ಯೆಂ ನ್ಹಂಯ್ ಗೀ ? ಮ್ಹಣ್ ಸವಾಲ್ ಉಡಯ್ಲೆಂ. ಶ್ರುತಿ, ಸ್ವರ್ ಆನಿ ಉಚ್ಛಾರ್ ಹೆ ಛಂದ ಶಾಸ್ತಿರಾಚೆ ಮುಕೆಲ್ ಗೂಣ್ ಮ್ಹಳ್ಳ್ಯಾ ಪ್ರಾ. ಚಿತ್ರೆ ಹಾಣಿ ಛಂದಾನ್ ಆನಂದ್ ದೀಜೆ ಮ್ಹಳೆಂ. ವೇದಾಂಚ್ಯಾ ಕಾಳಾಥಾವ್ನ್ ವಾಡೊನ್ ಆಯಿಲ್ಲ್ಯಾ ಸಂಸ್ಕೃತ್ ಛಂದ್ ಶಾಸ್ತಿರಾಚಿ, ಆದಿ ಕವಿ ವಾಲ್ಮೀಕಿ ಥಾವ್ನ್ ಧರುನ್ ವಿಸ್ತಾರ್ ಮಾಹೆತ್ ದೀವ್ನ್ ಪ್ರಾ. ಚಿತ್ರೆ ಮ್ಹಣಾಲೊ : ನೇಮಾಂ ಕಿತ್ಲಿಂಯ್ ಕರುಂಯೆತಾ. ಪೂಣ್ ನಿಯಮಾಂ ಪ್ರಾಸ್ ನಯ್ಸರ್ಗಿಕತೆಕ್ ಮೋಲ್ ಚಡ್.
ಹ್ಯಾ ಸತ್ರಾಂತ್ ಕನ್ನಡ ಭಾಶೆಚ್ಯಾ ಛಂದ ಶಾಸ್ತಿರಾ ವಿಶ್ಯಾಂತ್ ಉಲಯ್ಜೆ ಜಾಲ್ಲೊ ಸಿದ್ಧಲಿಂಗ ಪಟ್ಟಣಶೆಟ್ಟಿ ಯೇಂವ್ಕ್ ನಾ.
ದೊನ್ಪಾರಾ ಉಪ್ರಾಂತ್ಲ್ಯಾ ಕೊಂಕಣಿ ಕವಿತೆಂತ್ಲೆ ಛಂದ್ ವಿಚಾರ್ ಹ್ಯಾ ದುಸ್ರ್ಯಾ ಸತ್ರಾಕ್ ಪುಂಡಲೀಕ ನಾರಾಯಣ್ ನಾಯ್ಕ್ ಹೆ ಅಧ್ಯಕ್ಶ್ ಬಸ್ಲ್ಲೆ ಆನಿ ಡೊ. ಕಿರಣ್ ಬುಡ್ಕುಲೆ ಆನಿ ಪರೇಶ್ ಕಾಮತ್ ಉಲೊವ್ಪಿ ಆಸ್ಲೆ. ಬೆಜಾರಾಯೆಚಿ ಗಜಾಲ್ ಮ್ಹಳ್ಯಾರ್ ದೊಗಾಂಯ್ ಕೊಂಕಣಿ ಕವಿತೆಂತ್ಲೆ ಛಂದ್ ವಿಚಾರ್ ಸೊಡ್ನ್ ಹೆರ್ ಗಜಾಲಿ ಉಲಯ್ಲಿಂ. ಪರೇಶ್ ಕಾಮತ್ ಹಾಚ್ಯಾ ಪ್ರಬಂಧಾಂತ್ ಛಂದ್ ಆನಿ ವ್ರತ್ತಾ ವಿಶ್ಯಾಂತ್ ಉಲ್ಲೇಕ್ ಸಯ್ತ್ ನಾತ್ಲೊ ಬಗರ್ ಆಧುನಿಕ್ ಕೊಂಕ್ಣಿ ಕಾವ್ಯಾಚೇರ್ ಏಕ್ ಸುಕ್ಣ್ಯಾ ನದರ್ ಮಾತ್ ಆಸ್ಲಿ. ಪ್ರಬಂದಾಚ್ಯಾ ಆಕೆರಿಕ್ ಮಾತ್ ಆರ್ವಿಲ್ಯಾ ದಿಸಾಂನಿ ಬರಂವ್ಚ್ಯಾ ಕವಯತ್ರಿಂಚ್ಯಾ ಕಾವ್ಯಾಂತ್ (ಫಕತ್ ನೂತನ್ ಸಾಕರ್ದಾಂಡೆ, ನಯನಾ ಆಡಾರ್ಕಾರ್ ಆನಿ ಮಾಯಾ ಖರಂಗಟೆ ತೆಗಾಂಕ್ ಸೋಡ್ನ್ ) ಸ್ಟಫ್ಚ್ ನಾ ಮ್ಹಣೊನ್ ತಾಣೆ ಸಾಂಗ್ಲೆಂ.
ಡೊ. ಕಿರಣ್ ಬುಡ್ಕುಲೆ ಹಿಣೆ ಮುಕ್ತ್ ಛಂದ್ ಮ್ಹಳ್ಯಾರ್ ಬ್ಲ್ಯಾಂಕ್ ವರ್ಸ್ ಆನಿ ಫ್ರೀ ವರ್ಸ್ ಮ್ಹಳ್ಯಾರ್ ಛಂದ ಮುಕ್ತ್ ಮ್ಹಣ್ ವಿಸ್ಕಾಳಾವ್ನ್ ಸಾಂಗ್ಲೆಂ ಮಾತ್ ನ್ಹಯ್ ಸಾಹಿತ್ಯಾಂತ್ ವಿಚಾರ್ ಆಸ್ತಾನಾ ಗದ್ಯ್ ಜಾತಾ ಭಾವನಾ ಆಸ್ತಾನಾ ಪದ್ಯ್ ಜಾತಾ. ಪೂಣ್ ಭಾವನೆಂತ್ ವಿಚಾರ್ ಆಸ್ತಾತ್ಚ್ ಮ್ಹಳೆಂ. ಛಂದ್ ಮೀಟರ್ ಮ್ಹಣ್ ತುಮ್ಕಾಂ ಜಾಯ್ ತಶೆಂ ಕವೀನ್ ಕವಿತಾ ಬರಯ್ಜೆ ಮ್ಹಣ್ ತುಮಿ ತಾಚ್ಯಾ ಸೃಜನ್ಶೀಳತೆರ್ ಬಂಧಡ್ ಘಾಲ್ತಾತ್? ಮ್ಹಣ್ ಸವಾಲ್ ಕೆಲ್ಲ್ಯಾ ಡೊ. ಬುಡ್ಕುಲೆನ್ ಜರಿ ತರಿ ಕವಿಕ್ ತಾಣೆ ಬರಂವ್ಚ್ಯಾ ಕೊಂಕ್ಣಿ ತಸಲೆ ಭಾಶೆಂತ್ ಮೀಟರಾರ್ ಬಸ್ಚಿಂ ಉತ್ರಾಂ ಉಪಲಬ್ಧ್ ನಾಂತ್ ತರ್, ಕೊಂಕ್ಣಿ ಭಾಶೆಕ್ ಭಾಯ್ಲೆಂ ಶಾಸ್ತ್ರ್ ಬಸನಾ ಮ್ಹಳ್ಳ್ಯಾ ತಿಣೆ ಕವಿಚ್ಯಾ ಚಿಂತ್ಪಾ ಪ್ರಕ್ರಿಯೆಚೆರ್ ಬಂದಡ್ ನಜೊ ಮ್ಹಳೆಂ ಮಾತ್ ನ್ಹಯ್ adopt ಆನಿ adaption ಹಾಂತು ಫರಕ್ ಖೂಪ್ಸೊ ಆಸಾ ಮ್ಹಳೆಂ. ಇಂಗ್ಲಿಶ್ ಕವಿ ಕೀಟ್ಸ್ ಹಾಚ್ಯಾ ಎ ಥಿಂಗ್ ಒಫ್ ಬ್ಯೂಟಿ ಕವಿತೆಚಿ ದೇಕ್ ದಿಲ್ಲ್ಯಾ ಡೊ. ಬುಡ್ಕುಲೆನ್ ವರ್ಡ್ಸ್ ವರ್ತ್ ಪ್ರಾಸ್ ಶೆಲ್ಲಿ ಮೊಡೆಲ್ ಆಸುಂ ಮ್ಹಳೆಂ.
ಛಂದ್ ಅಸುಂ ವಾ ನಾ ಆಸುಂ ಬರೊ ಕವಿ ಬರೆಂ ಕಾವ್ಯೆಂ ರಚ್ತಾ ಮ್ಹಳ್ಳ್ಯಾ ತಿಣೆ ಹ್ಯಾ ಗಜಾಲಿಂಚೆರ್ ಸುಟಾವೆಂ ಉಲೊಣೆಂ ಚಲಜೆ ಮ್ಹಳೆಂ. ಡೊ. ಕಿರಣ್ ಬುಡ್ಕುಲೆ ಮ್ಹಣಾಲಿ ಛಂದ್ ಆನಿ ಮೀಟರ್ ಫಕತ್ ಬರ್ಪಿ ಸಾಹಿತ್ಯಾಕ್ ಲಾಗು ಜಾತಾ. ಮೌಕಿಕ್ ಸಾಹಿತ್ಯಾಕ್ ತಾಚಿ ಬಂದಡ್ ನಾ.
ಪುಂಡಲೀಕ್ ನಾರಾಯಣ್ ನಾಯ್ಕ್ ಮ್ಹಣಾಲೊ: ಆಮ್ಚೆ ಭಾಶೆಕ್ ಆಮ್ಚೆಂಚ್ ಛಂದ್ ಶಾಸ್ತ್ರ್ ಆಸುಂಕ್ ಜಾಯ್ ಹೆಂ ಮಾನ್ಯ್ ಆಸಾ. ಭಾಯ್ರ್ ಥಾವ್ನ್ ಹಾಂಗಾ ಆಯಿಲ್ಲ್ಯಾ ಮಿಶಿಯೊನರಿಂನಿ ಸಯ್ತ್ ಹಾಂಗಾ ತಾಂಚೆ ಛಂದ್ ಶಾಸ್ತಿರ್ ಹಾಡ್ನ್ ಥಾಪುಂಕ್ ನಾ ಆಮ್ಚೆಂಚ್ ಶಾಸ್ತಿರ್ ತಾಣಿ ವಾಪರ್ಲೆಂ. ತಾಂಚೊ ಉದ್ಧೇಶ್ಯೀ ತಿತ್ಲೊಚ್ ತೆ ಆಮ್ಕಾಂ ಕವಿತಾ ಶಿಕಂವ್ಕ್ ಅಯಿಲ್ಲೆ ನ್ಹಯ್, ತಾಂಚೊ ಉದ್ಧೇಶ್ ಆಸ್ಲೊ ಧರ್ಮ್ ಪ್ರಚಾರ್.
ತ್ಯಾ ಉಪ್ರಾಂತ್ ಪ್ರಿಯದರ್ಶಿನಿ ತಡಕೋಡ್ಕರ್ ಹಾಂಚ್ಯಾ ಅಧ್ಯಕ್ಷಪಣಾರ್ `ಕೊಂಕಣಿ ಧಾರ್ಮಿಕ್ ಸಾಹಿತ್ಯಾಂತ್ ಛಂದ್ ಆನಿ ವೃತ್ತ್ ವಿಚಾರ್' ಹ್ಯಾ ವಿಷಯಾಚೆರ್ ಕವಿ ರಾಜಯ್ ಪವಾರ್ ಆನಿ ಫಾ ಲಿನೊ ಡೆಸಾ ಹಾಂಣಿ ಆಪಾಪ್ಲಿಂ ಪೇಪರಾಂ ಸಾದರ್ ಕೆಲಿಂ.
ದುಸ್ರ್ಯಾ ದಿಸಾ ಆಯ್ತಾರಾ 30 ತಾರಿಕೆರ್ ಸಕಾಳಿಂಚ್ಯಾ ಚವ್ತ್ಯಾ ಸತ್ರಾಕ್ ಮಾಧವ ಬೋರ್ಕಾರ್ ಅಧ್ಯಕ್ಶ್ ಬಸಲ್ಲೊ ಆನಿ ಡೊ. ಮಾಧವಿ ಸರ್ದೇಸಾಯ್ ಆನಿ ಭೂಷಭ್ ಭಾವೆ ಹಾಂಣಿ ವಿಚಾರ್ ಮಾಂಡ್ಲೆ. ಲಯ್ ಆನಿ ಛಂದ್ ಪದಾಂನಿ ಮಾತ್ ನ್ಹಯ್ ಗದ್ಯಾಂತೀ ಆಸಾ ಮ್ಹಣ್ ದಾಕ್ಲೆ ದಿವ್ನ್ ವಿವರಾಯಿಲ್ಲ್ಯಾ ಮಾಧವಿನ್ ಅಕ್ಶರಾಂಕ್ ಮಾತ್ರಾ ಘಾಲ್ನ್ ಮೆಜ್ಚೆಂ ಚುಕಿಚೆಂ ಮ್ಹಳೆಂ ಮಾತ್ ಏಕ್ಚ್ ಸಬ್ದ್ ಮರಾಠೆಂತ್ ಆನಿ ಕೊಂಕ್ಣೆಂತ್ ಮಾತ್ ನ್ಹಯ್ ಗೊಂಯಾಂತ್ ಆನಿ ಮಂಗ್ಳುರಾಂತ್ ಸಯ್ತ್ ಕಸೊ ವೆವೆಗ್ಳ್ಯಾ ಆವಾಜಾಂತ್ ಉಚ್ಚಾರ್ ಜಾತಾ ಮ್ಹಣ್ ವಿಸ್ಕಳಾವ್ನ್ ಸಾಂಗ್ಲೆಂ. ಗೇಯ ಕವಿತೆಂತ್ ಚಾಲ್ ಪಯ್ಲಿ ಯೆತಾ ಉಪ್ರಾಂತ್ ಉತ್ರಾಂ ಮ್ಹಣ್ಯೀ ತಿ ಮ್ಹಣಾಲಿ.
ಭೂಷಣ್ ಭಾವೆ ಹಾಣಿ ಬಾಕಿಬಾಬ್ ಬೋರ್ಕರ್ ಹಾಂಚ್ಯಾ ದೋನ್ ಕವಿತಾ ಜಮ್ಯಾಂಚೆರ್ ಆಪ್ಲೊ ಪ್ರಬಂದ್ ಮಾಂಡ್ಲೊ ಆನಿ ಅಕ್ಶರಾಂ ಮೆಜ್ಲ್ಯಾರೀ, ಆವಾಜ್ ಮೆಜ್ಲ್ಯಾರೀ ತಾಚ್ಯಾ ಖಂಯ್ಚ್ಯಾಯೀ ಕೊಂಕಣಿ ಕವಿತೆಂತ್ ಮೀಟರ್ ನಾ ಮ್ಹಳೆಂ. ಪೂಣ್ ತಾಚೆ ಹರ್ ಮರಾಠಿ ಕವಿತಾ ಸಾರ್ಕೆ ಛಂದ್ ಶಾಸ್ತಿರಾಚ್ಯಾ ಮೀಟರಾಚೆರ್ ಆಸಾತ್ ಮ್ಹಳೆಂ. ಹೆಂ ಆಯ್ಕೊನ್ ಸಭೆಕ್ ಪುಂಡಲೀಕ್ ನಾಯ್ಕ್ ಮ್ಹಣಾಲೊ ಬಾಕಿಬಾಬಾಂಕ್ ಕೊಣೆಂಯೀ ತಾಂಚಿ ಠೀಕಾ ಕೆಲ್ಯಾರ್ ಬೋವ್ ಆವಡ್ಟಾಲಿ ಆನಿ ಆಜ್ ಭೂಷಣಾಚೊ ಪ್ರಬಂಧ್ ಆಯ್ಕಾಲ್ಲೊ ತರ್ ಬಾಕಿಬಾಬ್ ಆನಂದಾನ್ ನಾಚ್ತೊ ಮ್ಹಣಾಲೊ.
ಮಾಧವ್ ಬೋರ್ಕಾರ್ ಹೊ ಮ್ಹಣಾಲೊ - ಹರ್ ಭಾಶೆಕ್ ತಾಚೋಚ್ ಸ್ವಭಾವಿಕ್ ತಾಳ್ ಆಸಜೆಚ್. ಕೊಂಕ್ಣೆಂತೀ ತೊ ಆಸಾ.
ನಾಗೇಶ್ ಕರ್ಮಲಿ ಹಾಂಚ್ಯಾ ಅಧ್ಯಕ್ಶ್ ಪಣಾರ್ ಪಾಂಚ್ವೆಂ ಸತ್ರ್ ಚಲ್ಲೆಂ ಆನಿ ಹಾಂತುಂ ಕವಿತಾ ಟ್ರಸ್ಟ್ ಅಧ್ಯಕ್ಸ್ ಮೆಲ್ವಿನ್ ರೊಡ್ರಿಗಸ್ ಆನಿ ರಮೇಶ್ ಪಯ್ಯನೂರ್ ಹಾಂಣಿ ಪ್ರಬಂದ್ ಮಾಂಡ್ಲೆ. ಕವಿ ವೆಲ್ವಿನಾನ್ ಲುವಿಸ್ ಮಸ್ಕರೇನ್ಹಸ್, ಚಾ ಫ್ರಾ ದೆಕೊಸ್ತಾ, ಸಾವೆರ್ ಮೆಂದೊಸ್, ಎಡ್ವರ್ಡ್ ನೊರೆನ್, ವಿಲ್ಫಿ ರೆಬಿಂಬಸ್ ತಶೆಂ ಹೆರಾಂಚ್ಯಾ ಕವಿತೆಂಚೆ ದಾಕ್ಲೆ ದೀವ್ನ್ ಕಾನಡಿ ಲಿಪಿಯೆಂತ್ಲ್ಯಾ ಛಂದ್ ಶಾಸ್ತಿರಾಚಿ ಝಳಕ್ ದಿಲಿ ಮಾತ್ ನ್ಹಯ್ ಹಾಂಗಾಸರ್ ಅಕ್ಷರಾಂ ಮೆಜೂನ್ ಗಣ್ ಕರುಂಕ್ ಜಾಯ್ನಾ ಮ್ಹಳೆಂ. ಸಾಂಗಾತಾ ಛಂದ್ ಮುಕ್ತ್ ಕವಿತೆಂನಿಂಯ್ ಸುರಾಯ್ ಆಸಾ ಮ್ಹಣೊನ್ ಸಾಂಗೊನ್ ಎಚ್ಚೆಮ್ ಪೆರ್ನಾಳ್ ತಶೆಂ ಸ್ವತಾಚ್ಯಾ ಕವಿತಾಂಚೆ ದಾಕ್ಲೆ ದಿಲೆ.
ಕೇರಳ ರಾಜ್ಯಾಚ್ಯಾ ಕೊಂಕಣಿ ಕಾವ್ಯಾಚ್ಯಾ ಛಂದ್ ಶಾಸ್ತಿರಾ ವಿಶ್ಯಾಂತ್ ಉಲವ್ನ್ ರಮೆಶ್ ಪಯ್ಯನೂರ್ ಮ್ಹಣಾಲೊ ಜಶೆಂ ಕಾಕಾಳಿನ್ ಮಲೆಯಾಳಮ್ ಭಾಶೆಂತ್ ಛಂದ್ ರಚ್ಲ್ಯಾತ್ ತಶೆಂ ಕೊಂಕ್ಣೆಂತ್ ಕೊಣೆ ತರಿ ಛಂದ್ ರಚುಂಕ್ ಜಾಯ್.
ಹ್ಯಾ ಸತ್ರಾಕ್ ಅಧ್ಯಕ್ಷ್ ಬಸುಲ್ಲೊ ನಾಗೇಶ್ ಕರ್ಮಲಿ ಉಲವ್ನ್ ಮ್ಹಣಾಲೊ : ಮರಾಠಿ ವಾ ಕನ್ನಡ ಛಂದ ಶಾಸ್ತ್ರ್ ಆಸಾ ತಶೆಂ ಕೊಂಕ್ಣೆಕ್ ಘೆಂವ್ಕ್ ಜಾಯ್ನಾ ಆನಿ ನಜೊ. ಕೊಂಕ್ಣೆಕ್ ಕೊಂಕ್ಣೆಚೆಂಚ್ ಛಂದ ಶಾಸ್ತ್ರ್ ಆಸುಂಕ್ ಜಾಯ್. ಜಶೆಂ ಬೆಂಗಾಲಿಂತ್ ಸಂಸ್ಕೃತ್ ಶಾಸ್ತಿರ್ ಬಸೊಂಕ್ ನಾ ಮ್ಹಣ್ ಬೆಂಗಾಳಿ ಛಂದ್ ಶಾಸ್ತಿರ್ ನಿರ್ಮಾಣ್ ಜಾಲೆಂ ತಶೆಂ ಕೊಂಕಣಿಕ್ ಕೊಂಕಣಿಚೆಂ ಛಂದ್ ಶಾಸ್ತಿರ್ ಜಾಯ್. ಕೊಂಕ್ಣೆಕ್ ಕೋಣ್ ತರಿ ಫಟವರ್ಧನ್ ವಾ ಜೋಶಿ ತಸಲ್ಯಾಚಿ ಗರ್ಜ್ ಆಸಾ. ತೆ ಪರ್ಯಾಂತ್ ಬರವ್ಪ್ಯಾಂನೋ ಸಯ್ಮಾಚೊ ಆವಾಜ್ ಆಯ್ಕಾ ಆನಿ ಬರಯ್ತ್ ರಾವಾ. ಮಾತ್ರಿಂ ಮೆಜೂಂಕ್ ವಚಾನಾಕಾತ್, ತೆಂ ಕಾಮ್ ಕರೂಂಕ್ ಫಿಲ್ಮೀ ಲೋಕ್ ಆಸಾ.
ನಿಮಾಣೆಂ ಹನುಮಂತ್ ಚೋಪ್ಡೆಕಾರಾನ್ ಆಖ್ಖ್ಯಾ ದೋನ್ ದಿಸಾಂಚ್ಯಾ ಕಾರ್ಯಾಚೊ ನಿಯಾಳ್ ಕೆಲೊ ಆನಿ ಆಪ್ಲಿಂ ಥೊಡಿಂ ಸುಚನಾಂ ದಿಲಿಂ. ಸಮಾರೋಪ್ ಕಾರ್ಯಾಚೊ ಅಧ್ಯಕ್ಷ್ ಎಡ್ವೊಕೇಟ್ ಉದಯ್ ಭೆಂಬ್ರೊ ಉಲೊವ್ನ್: ‘ಜಶೆಂ ಆಮಿ ಲೊಣ್ಚೆಂ ಚಡ್ ಕಾಳ್ ಬಾಳ್ವೊಂಕ್ ತಾಕಾ ಮೀಟ್ ಆನಿ ತೇಲ್ ಚಡಿತ್ ಘಾಲ್ತಾಂವ್, ತಶೆಂ ಏಕ್ ಕವಿತಾ ಚಡ್ ಕಾಳ್ ಲೊಕಾಮಧೆಂ ಉರೊಂಕ್ ಛಂದ್ ಗರ್ಜೆಚೊ ಮ್ಹಳೆಂ. ಜರ್ ತರ್ ಶೆಕ್ಡ್ಯಾಂ ಆದ್ಲಿಂ ಲೋಕ್ ಗಿತಾಂ ಆಜೂನಯ್ ಆಮ್ಚ್ಯಾ ಲೊಕಾಚ್ಯಾ ತೊಂಡಾರ್ ಉರ್ಲ್ಯಾಂತ್ ಜಾಲ್ಯಾರ್ ಗೇಯತೆಚ್ಯಾ ಆಧಾರಾರ್. ಆನಿ ಗೇಯತಾ ಯೆತಾ ಛಂದಾಚ್ಯಾ ಆಧಾರಾಚೆರ್ ಮ್ಹಣೊನ್ ತಾಂಣಿ ಉದಾರಣಾಂ ದೀವ್ನ್ ಸಾಂಗ್ಲೆಂ. ಹ್ಯಾಚ್ ದೆಕುನ್ ಆಯ್ಚ್ಯಾ ಕವಿಂನಿ ಛಂದ್ ಮುಕ್ತ್ ಬರಯ್ಲೆಂ ತರೀ ಪರ್ವಾ ನಾ, ಪುಣ್ ತ್ಯೊ ಬರಯಿಲ್ಲ್ಯೊ ಕವಿತಾ ಛಂದ್ ಕರುಂಕ್ ಶಿಕಜೆ ಮ್ಹಳೆಂ. ಮುಕಾರುನ್ ಉಲಯಿಲ್ಲ್ಯಾ ತಾಣೆ ಆಜ್ ಕಾವ್ಯೆಂ ಛಂದಾ ಸೊಡುನ್ ಬೋವ್ ಮುಕಾರ್ ಪಾವ್ಲಾಂ ತರ್ ಹೊ ಎಕಾ ನಮುನ್ಯಾಚೊ ಕಾವ್ಯಾಚೊ ವಿಕಾಸ್ ಮ್ಹಣುಂಯೆತಾ ಕಾಂಯ್ ಮ್ಹಳ್ಳೊ ವಿಚಾರ್ ಮಾಂಡ್ಲೊ. ಸಕ್ಕಡಯ್ ಛಂದ್ ಮುಕ್ತ್ ಕವಿತಾ ಬರೊವ್ನ್ ಗೆಲೆ ತರ್, ಭಾವ್ ಗಿತಾಂ ಬರೊಂವ್ಚಿಂ ಕೊಣೆಂ ಮ್ಹಳ್ಳೆಂ ಸವಾಲ್ ಘಾಲೆಂ. ಜರಿ ತರಿ ಆಮಿ ಕಾವ್ಯಾಂತ್ ಛಂದ್ ನಾಕಾ ಮ್ಹಣ್ತಾಂವ್ ತರ್ ಛಂದಾಚೆಂ ಶಿಕಪ್ ಕರ್ಚಿ ಗರ್ಜಚ್ ನಾ ಮ್ಹಣೊನ್ ಜಾಲೆಂ - ಅಶೇಂಯ್ ತಾಣೆಂ ಸಾಂಗ್ಲೆಂ.
ಡೊ, ಖುರ್ಶಿದ್ ಅಲಮಾನ್ ಧನ್ಯವಾದ್ ದೀವ್ನ್ ಬೋವ್ ಆಪುರ್ಬಾಯೆಚ್ಯೊ ದೋಹಾ - ಜ್ಯೊ ಕಬೀರಾಚ್ಯಾ ನಾಂವಾನ್ ಆಪ್ಣೆಂಚ್ ಬರಯಿಲ್ಲ್ಯೊ - ತ್ಯೊ ಪೇಶ್ ಕೆಲ್ಯೊ.
- ವರ್ದಿ: ಎಚ್ಚೆಮ್ ಪೆರ್ನಾಲ್; ತಸ್ವೀರ್ಯೊ: ವಿತೊರಿ ಕಾರ್ಕಳ್