ಪಿ. ಎನ್. ಶಿವಾನಂದ ಶೆಣೈಕ್ ಕವಿತಾ ಟ್ರಸ್ಟ್ - ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್ - 2011
ಕೊಂಕಣಿ ಕವಿತೆಚೆ ಸಮಗ್ರ್ ವಾಡಾವಳಿ ಖಾತೀರ್ ವಾವುರ್ಚ್ಯಾ ಕವಿತಾ ಟ್ರಸ್ಟಾನ್ ದಿಂವ್ಚೊ ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್, 2011 ವ್ಯಾ ವರ್ಸಾ ಕೊಟ್ಟಾಯಮಾಂತ್ ವಸ್ತಿ ಕರ್ಚೊ ಕೊಂಕಣಿ ಕವಿ ಪಿ. ಎನ್. ಶಿವಾನಂದ ಶೆಣೈಕ್ ಫಾವೊ ಜಾಲಾ. ಹೊ ಪುರಸ್ಕಾರ್ ರು. 10,000 ನಗ್ದೆ, ಯಾದಸ್ತಿಕಾ ತಶೆಂ ಮಾನ್ಪತ್ರ್ ಆಟಾಪ್ತಾ.
ಜನೆರ್ 8, 2012 ತಾರಿಕೆರ್ ಮೂಡುಬೆಳ್ಳೆ, ಕಟ್ಟಿಂಗೇರಿ, ಮುದಾರ್ಥ ಘರ್ಚ್ಯಾ ಆಂಗ್ಣಾಂತ್ ಚಲ್ಚ್ಯಾ ‘ಕವಿತಾ ಫೆಸ್ತ್’ ಸಂದರ್ಭಾರ್ ಗೊಂಯ್ ವಿಶ್ವವಿದ್ಯಾಲಯಾಚ್ಯಾ ಇಂಗ್ಲಿಷ್ ವಿಭಾಗಾಚಿ ಸಾಂಗಾತಿ ಪ್ರೊಫೆಸರ್ ಡೊ. ಕಿರಣ್ ಬುಡ್ಕುಲೆ ಹೊ ಪುರಸ್ಕಾರ್ ಶಿವಾನಂದ ಶೆಣೈಕ್ ಭೆಟಯ್ತಲಿ.
ಕೊಚ್ಚಿ ಬಂದರ್ ಟ್ರಸ್ಟಾಚೊ ನಿವೃತ್ತ್ ಇಜ್ನೆರ್ ಜಾವ್ನಾಸ್ಚ್ಯಾ ಶಿವಾನಂದ ಶೆಣೈನ್ ‘ಕಿರ್ಕಿರ್’ ತಶೆಂ ‘ಚಾಂಗಪಣಾಚೆ ಸಂತ್’ ಅಶೆಂ ದೋನ್ ಕವಿತಾ ಸಂಗ್ರಹ್ ಪರ್ಗಟ್ ಕೆಲ್ಯಾತ್. ತೊ ಕೊಂಕಣಿ ಮಾತ್ರ್ ನ್ಹಯ್ ಮಲಯಾಳಮ್ ಭಾಶೆಂತಯ್ ಬರಯ್ತಾ. ಮಲಯಾಳಮಾಂತ್ ತಾಚಿಂ ದೋನ್ ಮಟ್ವ್ಯಾ ಕಾಣಿಯಾಂಚಿಂ ಪುಸ್ತಕಾಂ ಪರ್ಗಟ್ ಜಾಲ್ಯಾಂತ್. 1968 ಇಸ್ವೆ ಥಾವ್ನ್ ಕವಿತಾ ಬರೊಂವ್ಚೊ ಶಿವಾನಂದ ಶೆಣೈ ಸದ್ದ್ಯಾ ಕೇಂದ್ರ್ ಸಾಹಿತ್ಯ ಅಕಾಡೆಮಿಚ್ಯಾ ಕೊಂಕಣಿ ಸಲ್ಹಾಗಾರ್ ಸಮಿತಿಚೊ ಸಾಂದೊ.
ತಾಚ್ಯೊ ಕವಿತಾ ಮಲಯಾಳಮ್ ಸಮಾಜೆಂತ್ಲೆ ಥರಾವಳ್ ವಿಷಯ್ ಹಾತಾಳ್ತಾತ್ ಜಾಲ್ಲ್ಯಾನ್ ಕೊಂಕಣಿ ವಾಚ್ಪ್ಯಾಂಕ್ ಎಕಾ ನವ್ಯಾಚ್ ಅನ್ಭೋಗಾನ್ ಧಲಯ್ತಾತ್. ತಾಣೆ ಆಪ್ಲ್ಯಾ ಕವಿತಾಂನಿ ಘೊಳಂವ್ಚಿ ಭಾಸ್ ಆನಿ ಉಬ್ಯೊ ಕರ್ಚ್ಯೊ ಪ್ರತಿಮಾ ಕೊಂಕಣಿ ಕಾವ್ಯಶೆತಾಕ್ ನವೆಪಣಾಂತ್ ನ್ಹೆಸಯ್ತಾತ್ ಮ್ಹಣೊನ್ ಪುರಸ್ಕಾರ್ ಸಮಿತಿನ್ ಸಾಂಗ್ಲಾಂ.
ನಾಮ್ಣೆಚೊ ಕೊಂಕಣಿ ಕವಿ ರಮೇಶ್ ವೆಳುಸ್ಕಾರ್ ‘ಕವಿತಾ ಫೆಸ್ತ್’ ಉಗ್ತಾವಣ್ ಕರ್ಚೊ ಆಸೊನ್, ಹ್ಯಾ ಫೆಸ್ತಾಕ್ ಗೊಂಯ್, ಕೇರಳ, ಮುಂಬಯ್, ಬೆಂಗ್ಳುರ್, ಮೈಸೂರ್, ಮಂಗ್ಳುರ್ ತಶೆಂ ಪರ್ಗಾಂವಾ ಥಾವ್ನ್ ಪ್ರತಿನಿಧಿ ಹಾಜರ್ ಜಾತಲೆ. ಸಾಹಿತ್ಯಾಂತ್ ತಶೆಂ ಕವಿತೆಂತ್ ಆಸಕ್ತ್ ಆಸ್ಚ್ಯಾ ಸಮೇಸ್ತಾಂಕ್ ಹ್ಯಾ ಫೆಸ್ತಾಂತ್ ಭಾಗ್ ಘೆವ್ಯೆತಾ.
ಅಸ್ಸಾಮ್ ರಾಜ್ಯಾಚ್ಯಾ ರಂಜಿತ್ ಗೊಗೊಯ್ ಆನಿ ಪಂಗ್ಡಾಥಾವ್ನ್ ಬಿಹು ಗಾಣಿಂ ತಶೆಂ ನಾಚ್ ಹ್ಯಾ ಫೆಸ್ತಾಚೆಂ ವಿಶೇಸ್ ಆಕರ್ಶಣ್ ಆಸ್ತಲೆಂ. ಹೊ ಜಾನಪದ್ ನಾಚ್, ಸಾಹಿತ್ಯ ಆಕಾಡೆಮಿ ನವಿ ಡೆಲ್ಲಿ ಹಾಂಚ್ಯಾ ಪ್ರಾಯೋಜಕಪಣಾಖಾಲ್ ಚಲ್ತಲೊ. ಬೆಳ್ಳೆವಿಶನಾನ್ ಹ್ಯಾ ಫೆಸ್ತಾ ಖಾತೀರ್ ಕವಿತಾ ಟ್ರಸ್ಟಾ ಸಾಂಗಾತಾ ಹಾತ್ ಮೆಳಯ್ಲಾ.
ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್ ದುಬಾಯ್ಚ್ಯಾ ಮೆರಿಟ್ ಫ್ರೈಟ್ ಸಿಸ್ಟಮ್ಸ್ ಹಾಚೊ ಮ್ಹಾಲಕ್ ಜೋಸೆಫ್ ಮಥಾಯಸಾನ್ ಆಪ್ಲ್ಯಾ ಕುಟ್ಮಾಚ್ಯಾ ನಾಂವಾರ್ ದಿಂವ್ಚೊ ಆಸೊನ್, ಹ್ಯಾ ಆದಿಂ ಅರುಣಾ ರಾವ್ ಕುಂದಾಜೆ, ಮುಂಬಯ್, ಲಿಯೊ ಡಿಸೋಜಾ (ಕಾವ್ಯದಾಸ್), ಮಂಗ್ಳುರ್ ಆನಿ ಕಾಶಿನಾಥ ಶಾಂಬಾ ಲೊಲಿಯೆಂಕಾರ್ ಗೊಂಯ್ ಹಾಂಕಾಂ ಫಾವೊ ಜಾಲಾ.