ಅನೀಶಾ, ಡೇನಿಯಲ್, ಶಿಫಾನಿಕ್ ಕವಿತಾ ಟ್ರಸ್ಟ್ - ಅಖಿಲ್ ಭಾರತ್ ಕೊಂಕಣಿ ಕವಿತಾ ಲಿಖ್ಚೆ ಸರ್ತೆಂತ್ ಇನಾಮಾಂ
ಕವಿತಾ ಟ್ರಸ್ಟಾನ್ ವರ್ಸಾವಾರ್ ಮಾಂಡುನ್ ಹಾಡ್ಚ್ಯಾ ದೆವಾಧಿನ್ ಚಾರ್ಲ್ಸ್ ಆನಿ ತೆರೆಜಾ ರೊಡ್ರಿಗಸ್ ಸ್ಮಾರಕ್ ಭುರ್ಗ್ಯಾಂಚ್ಯಾ, ಅಖಿಲ್ ಭಾರತ್ ಕೊಂಕಣಿ ಕವಿತಾ ಬರೊಂವ್ಚೆ ಸರ್ತೆಂತ್ ಗೊಂಯ್ಚ್ಯಾ ಭುರ್ಗ್ಯಾಂಕ್ ಪಯ್ಲೆಂ ಆನಿ ದುಸ್ರೆಂ ಇನಾಮ್ ಫಾವೊ ಜಾಲಾಂ ತರ್, ಮಂಗ್ಳುರ್ ಬಜ್ಪೆಚ್ಯಾ ಭುರ್ಗ್ಯಾಕ್ ತಿಸ್ರೆಂ ಇನಾಮ್ ಫಾವೊ ಜಾಲಾಂ.
ಪಾಟಾಪಾಟ್ ಪಾಂಚ್ವ್ಯಾ ವರ್ಸಾ ಚಲಲ್ಲೆ ಹೆ ಸರ್ತೆಂತ್ ಸ-ವೆ ಕ್ಲಾಶಿ ಥಾವ್ನ್ ಧಾ-ವೆ ಪರ್ಯಾಂತ್ಲ್ಯಾ, ಗೊಂಯ್ ತಶೆಂ ಕರ್ನಾಟಕಾಚ್ಯಾ 79 ಭುರ್ಗ್ಯಾಂನಿ ವಾಂಟೊ ಘೆತಲ್ಲೊ. ಪಯ್ಲೆಂ ಇನಾಮ್ ಗೊಂಯ್ಚ್ಯಾ ಕೆಪೆಂತ್ಲ್ಯಾ ಹೋಲಿ ಕ್ರೊಸ್ ಶಾಳೆಂತ್ ಆಟ್ವೆ ಕ್ಲಾಶಿಂತ್ ಶಿಕ್ಚ್ಯಾ ಅನೀಶಾ ನಾಯ್ಕ್ ಗಾಂವ್ಕಾರಾಕ್ ಮೆಳ್ಳಾಂ. ತಾಕಾ ರುಪಯ್ 2000 ನಗ್ದಿ, ಯಾದಸ್ತಿಕಾ ತಶೆಂ ಸರ್ಟಿಫಿಕೆಟ್ ಮೆಳ್ತಲಿ. ದುಸ್ರೆಂ ಇನಾಮ್ ಗೊಂಯ್ಚ್ಯಾ ಮೊಂಟೇ ದೆ ಗಿರಿಂ ಲಾಗ್ಸಾರ್ಚ್ಯಾ ಸೈಂಟ್ ಎಂಟೊನೀಸ್ ಶಾಳೆಂತ್ ಆಟ್ವೆ ಕ್ಲಾಸಿಂತ್ ಶಿಕ್ಚ್ಯಾ ಡೇನಿಯಲ್ ಫೆರ್ನಾಂಡಿಸಾಕ್ ಲಾಭ್ಲಾಂ. ತಾಕಾ ರುಪಯ್ 1000, ಯಾದಸ್ತಿಕಾ ತಶೆಂ ಸರ್ಟಿಫಿಕೆಟ್ ಲಾಭ್ತಲಿ ಜಾಲ್ಯಾರ್ ತಿಸ್ರೆಂ ಇನಾಮ್ ಮಂಗ್ಳುರ್ ಬಜ್ಪೆ ಲಾಗ್ಸಾರ್ ಆಸ್ಚ್ಯಾ ಲಿಟಲ್ ಫ್ಲವರ್ ಹೈಯರ್ ಪ್ರೈಮರಿ ಶಾಳೆಂತ್ ಸವೆಂ ಕ್ಲಾಶಿಂತ್ ಶಿಕ್ಚ್ಯಾ ಶಿಫಾನಿ ಡಿ’ಸೋಜಾಕ್ ಫಾವೊ ಜಾಲಾಂ. ತಾಕಾ ರುಪಯ್ 750, ಯಾದಸ್ತಿಕಾ ತಶೆಂ ಸರ್ಟಿಫಿಕೆಟ್ ಮೆಳ್ತಲಿ.
ಅನೀಶಾ ನಾಯ್ಕ್, ಡೇನಿಯಲ್ ಫೆರ್ನಾಂಡಿಸ್, ಶಿಫಾನಿ ಡಿ’ಸೋಜಾ
ಹಿಂ ಸರ್ವ್ ಇನಾಮಾಂ ಜನೆರ್ 8, 2012 ತಾರಿಕೆರ್ ಉಡುಪಿ ಜಿಲ್ಲ್ಯಾಚ್ಯಾ ಮೂಡುಬೆಳ್ಳೆಂತ್ ಚಲ್ಚ್ಯಾ ‘ಕವಿತಾ ಫೆಸ್ತ್’ಸಂದರ್ಭಾರ್ ದಿತಲೆ.
ಅನೀಶಾ ನಾಯ್ಕ್ ಗಾಂವ್ಕಾರಾನ್ ಯೆದೊಳಚ್ ಜಾಯ್ತ್ಯೊ ಕವಿತಾ ಬರಯ್ಲ್ಯಾತ್. ಸರ್ತೆಕ್ ಧಾಡಲ್ಲೆ ‘ಮನ್ ಮ್ಹಜೆಂ’ ಕವಿತೆಂತ್ ಭುರ್ಗ್ಯಾಂಚೆಂ ಮನ್ ಕಶೆಂ ಆಸ್ತಾ ಮ್ಹಣೊನ್ ತಿಣೆಂ ಸೊಭಿತ್ ಥರಾನ್ ವರ್ಣಿಲಾಂ. ತಶೆಂ ವರ್ಣಿತಾನಾ ಭುರ್ಗ್ಯಾಚೆ ನೆಂಟೆ ಮತಿಕ್ ಝಳ್ಕೊಂಚ್ಯಾ ಬರ್ಪೂರ್ ರೂಪಕಾಂಚೊ ತಿಣೆ ಉಪೇಗ್ ಕೆಲಾ. ಡೇನಿಯಲ್ ಫೆರ್ನಾಂಡಿಸಾಕ್ ಇನಾಮ್ ಮೆಳಲ್ಲ್ಯಾ ವಗ್ತಾ ಲಾಭಲ್ಲೊ ಸಂತೊಸ್ ವಿಶೇಸ್. ಕವಿತಾ ಆಪ್ಣೆಂಚ್ ಬರಯಿಲ್ಲಿ ಆನಿ ತಿ ಧಾಡ್ಚೆ ಪಯ್ಲೆಂ ಆಪ್ಣಾಚೆ ಟೀಚೆರಿನ್ ಸುಧಾರಣ್ ಕರ್ಚಿ ಕಶೆಂ ಮ್ಹಣೊನ್ ಸಮ್ಜಯ್ಲೆಂ ಅಶೆಂ ತೊ ಮ್ಹಣ್ತಾ. ‘ಫಾಲ್ಯಾಂಚೊ ಸೂರ್ಯ್’ ಕವಿತೆಂತ್ ತೊ ‘ಮನೀಸಪಣ್ ಆಮಿ ಪರ್ತ್ಯಾನ್ ಹಾಡುಂಯಾಂ ಆನಿ ಸರ್ಗಾರ್ ಆಮಿ ಜಾಗೊ ಮೆಳೊವ್ಯಾಂ’ ಅಶೆಂ ಸಾಂಗೊನ್ ಆಮ್ಚೆ ಸಮಾಜೆಚೆರ್ ಬೋಟ್ ಜೊಕ್ತಾ. ಶಿಫಾನಿ ಡಿ’ಸೋಜಾಚಿ ಆವಯ್ ಸರಿತಾ ಡಿಸೋಜಾ ಪ್ರಕಾರ್ ಶಿಫಾನಿನ್ ಆಪ್ಣೆಂ ಜಾವ್ನ್ ಹಿ ಕವಿತಾ ಬರಯಿಲ್ಲಿ. ಆಪ್ಣೆಂ ಕಾಂಯಿಂಚ್ ತಾಕಾ ಮಜತ್ ಕೆಲ್ಲಿ ನಾ. ಶಿಫಾನಿಕ್ ಕವಿತಾ ಬರೊಂವ್ಚಿ ಪ್ರತಿಭಾ ಜಲ್ಮಾಥಾವ್ನ್ ಆಯ್ಲ್ಯಾ ತಶೆಂ ದಿಸ್ತಾ. ಶಿಫಾನಿ ಸವೆ ಕ್ಲಾಶಿಚೆಂ ಭುರ್ಗೆಂ. ತಾಚೆ ಪ್ರಾಯೆತೆಕಿದ್ ತಾಚೆ ಕವಿತೆಂತ್ಲೆಂ ಮುಗ್ಧ್ ಚಿಂತಪ್ ಝಳ್ಕತಾ. ತಿಣೆಂ ಚಂದ್ರೆಮಾಚೆರ್ ಕವಿತಾ ಬರಯ್ಲ್ಯಾ
ಪಾಂಚ್ ವರ್ಸಾಂನಿ ಚಲಲ್ಲ್ಯಾ ಹ್ಯಾ ಎಕೆ ಸರ್ತೆಂತ್ ಯೆದೊಳ್ ಪಾಸುನ್ 901 ಭುರ್ಗ್ಯಾಂನಿ ವಾಂಟೊ ಘೆತ್ಲಾ. ಭುರ್ಗ್ಯಾಂ ಮಧೆಂ ಕವಿತಾ ಬರೊಂವ್ಚ್ಯಾಂತ್ ಹುಮೆದ್ ಭರ್ಚಿಚ್ ಹೆ ಸರ್ತೆ ಪಾಟ್ಲೊ ಶೆವೊಟ್ ಆಸಾ.
ಹರ್ಯೆಕ್ ವರ್ಸಾ ಪಯ್ಲೆಂ ಇನಾಮ್ ಜೊಡಲ್ಲ್ಯಾ ವಿದ್ಯಾರ್ಥಿಕ್ ಮುಕ್ಲ್ಯಾ ವರ್ಸಾ ಕವಿತಾ ಫೆಸ್ತ್ ಸಂದರ್ಭಾರ್ ಚಲ್ಚ್ಯಾ ಕವಿಗೋಷ್ಟಿ ವೆಳಾರ್ ಮ್ಹಾಲ್ಗಡ್ಯಾಂ ಸವೆಂ ಭಾಗ್ ಘೆಂವ್ಚೊ ಸಂದ್ರಾಪ್ ಮೆಳ್ತಾ. ಆದ್ಲ್ಯಾ ವರ್ಸಾ ಪಯ್ಲೆಂ ಇನಾಮ್ ಜೊಡಲ್ಲಿ ವಿದ್ಯಾರ್ಥಿಣ್ ಕವಿತಾ ಡಿ ಫೊಂಡೆಕಾರ್ ಹ್ಯಾ ವರ್ಸಾ ಕವಿಗೋಷ್ಟಿಂತ್ ಭಾಗ್ ಘೆತಲಿ.
ಹಿ ಸರ್ತ್, ಕವಿ ಮೆಲ್ವಿನ್ ರೊಡ್ರಿಗಸಾನ್ ಆಪ್ಲ್ಯಾ ಆವಯ್-ಬಾಪಾಯ್ಚ್ಯಾ ನಾಂವಾರ್ ಪ್ರಾಯೋಜಿತ್ ಕೆಲ್ಯಾ.