ಕವಿ, ಜ್ಯೇಷ್ಠ್ ಪತ್ರಕಾರ್ ಆನಿ ಸಾಹಿತ್ಯಿಕ್, ಸಮೀಕ್ಷಕ್ ನರೇಂದ್ರ ಬೋಡ್ಕೆ (57) ಅಂತರ್ಲೆ
ಕವಿ, ಜ್ಯೇಷ್ಠ್ ಪತ್ರಕಾರ್ ಆನಿ ಸಾಹಿತ್ಯಿಕ್, ಸಮೀಕ್ಷಕ್ ನರೇಂದ್ರ ಬೋಡ್ಕೆ (57) ಜನೆರಾಚೆ 7 ತಾರಿಕೆರ್ ಫಾಂತೊಡೆರ್ ಪುಣೆಚ್ಯಾ ಸಹ್ಯಾದ್ರಿ ಆಸ್ಪತ್ರೆಂತ್ ಸಂಸಾರಾಕ್ ಅಂತರ್ಲೆ.
ಸರಲ್ಲ್ಯಾ ಆದ್ಲ್ಯಾ ದಿಸಾ ಸಾಂಜೆರ್ ತಾಂಕಾಂ ಸ್ವಾಸ್ ಘೆವ್ಪಾಕ್ ತ್ರಾಸ್ ಜಾಂವ್ಕ್ ಲಾಗಲ್ಲ್ಯಾನ್ ಪುಣೆಚ್ಯಾ ಸಹ್ಯಾದ್ರಿ ಆಸ್ಪತ್ರೆಂತ್ ದಾಖಲ್ ಕೆಲ್ಲೆಂ. ಥಂಯ್ ತಾಚೆರ್ ಉಪಚಾರ್ ಚಾಲು ಆಸ್ತಾನಾ ತಾಂಕಾಂ ಮರಣ್ ಆಯ್ಲೆಂ.
7
ತಾರಿಕೆರ್ ಸಾಂಜೆರ್ ಪುಣ್ಯಾಂತ್ಲ್ಯಾ ವೈಕುಂಠ್ ಮಸುಂಡೆಂತ್ ತಾಂಚೆ ಕುಡಿಚೆರ್ ನಿಮಾಣೆ ಸಂಸ್ಕಾರ್ ಕೆಲೆ. ಹ್ಯಾ ವೆಳಾರ್ ನಾಮ್ಣೆಚೆ ಸಾಹಿತ್ಯಿಕ್ ಹಾಜರ್ ಆಸಲ್ಲೆ.
ನರೇಂದ್ರ ಬೋಡ್ಕೆ ಹಾಂಚೊ ಜಲ್ಮ್ 23 ದಶೆಂಬರ್ 1954 ಹ್ಯಾ ದಿಸಾ ಸಾಂಖ್ಳೆ ಜಾಲ್ಲೊ. ತಾಂಣಿ ಮರಾಠಿಂತ್ಲ್ಯಾನ್ ಎಮ್. ಎ. ಕೆಲ್ಲಿ ಆನಿ ಸೌಂದರ್ಯಶಾಸ್ತ್ರ್ (ತತ್ವಗಿನ್ಯಾನ್) ಪಯ್ಲೆ ಶ್ರೇಣಿಂತ್ ಪಾಸ್ ಜಾಲ್ಲೆ. ತಾಂಕಾಂ ತೆ ಖಾತೀರ್ ಮುಂಬಯ್ ವಿದ್ಯಾಪೀಠಾಚೆಂ ಎನ್. ಸಿ. ಕೇಳ್ಕರ್ ಭಾಂಗ್ರಾ ಪದಕ್ ಫಾವೊ ಜಾಲ್ಲೆಂ. ತಾಂಣಿ ಅರ್ಥಶಾಸ್ತ್ರಾಂತ್ ಆನಿ ಮರಾಠಿಂತ್ ಬಿ.ಎ. (ಹೊನರ್) ಕೆಲ್ಯಾ. ಸರ್ವಸಾಧಾರಣ್ ಫಾಯ್ದೊ ಹೆ ವಿಶಿಂ ತಾಂಣಿ ಅಭ್ಯಾಸ್ ಕೆಲ್ಲೊ.
ಕೊಂಕಣಿ ಭಾಶೆಚೊ ದಿಶ್ಟಾವೊ ಜಾಲ್ಲೆ ಖಾತೀರ್ ಹಾಲಿಂ ತೆಂಪಾರ್ ಗೊಂಯ್ಚಿ ಆವಯ್ ಭಾಸ್ ಆಶಿಲ್ಲೆ ಕೊಂಕಣಿ ಖಾತೀರ್ ವಾವ್ರ್ ಕರ್ಪಾಚೆಂ ತಾಂಣಿ ಥಾರಾಯಿಲ್ಲೆಂ. ಹಾಲಿಂಚ್ಯಾ ದಿಸಾಂನಿ ತೆ `ಸುನಾಪರಾಂತ್' ದಿಸಾಳ್ಯಾರ್ `ಉಜ್ವಾಡಾಚಿಂ ಉತ್ರಾಂ' ಹೆಂ ಸದರ್ ಬರಯ್ತಾಲೆ.
2010
ವರ್ಸಾಂ ತಾಂಚೊ `ಅನಾರ್ಯಾ' ಹೊ ಕೊಂಕಣಿ ಕವಿತಾ ಝೆಲೊ ಗೋವಾ ಕೊಂಕಣಿ ಅಕಾಡೆಮಿನ್ ಉಜ್ವಾಡಾಯ್ಲಾ. ಕೊಂಕಣಿ ವಾಕ್ಸರ್ ಕೋಶ್ ಹ್ಯಾ ವಾವ್ರಾಕ್ ತಾಂಣಿ ಸ್ವತಾಕ್ ವೊಂಪುನ್ ಘೆತಿಲ್ಲೆಂ.
ಬೋಡ್ಕೆಚೆಂ ಸಾಹಿತ್ಯ್ ಸಮೃದ್ಧಿ ಖೂಬ್ ವ್ಹಡ್ ಆಸ್ಲಿ.
ಬೋಡ್ಕೆ ಹಾಂಚೆ ಸ ಮರಾಠಿ ಕವಿತಾ ಸಂಗ್ರಹ್ (ಪಂಖ್ಸೈಲ್, ಸನ್ಮುಖ್, ಸರ್ಪಸತ್ರ್, ಶುಕ್ಶಕುನ್, ಸಾಮಲ್, ಹಸ್ತಾ ಖೆಳ್ತಾ ಗಡಿ) ಉಜ್ವಾಡಾಕ್ ಆಯ್ಲ್ಯಾತ್. ಸೂಮನ್ಸಮೀಕ್ಷಾ, ಗಹಿವರ್ಲೆಲಾ ಮಹಾಶಬ್ದ್, ಅಸ್ವಸ್ಥ್ ವಸುಂಧರಾ, ಪಣಜಿ ತೆ ಪುಣೆ ವ್ಹಯಾ ನಾಗ್ಪುರ್, ರೀಯಲ್ ಹೀರೊ ಅಡೀಜ್ ಅಕ್ಷರೆ, ಸಾಹಿತ್ಯಾಚೆ ಸತ್ವ್ - ಹಿಂ ತಾಂಚಿಂ ಹೆರ್ ಪುಸ್ತಕಾಂ.
ನರೇಂದ್ರ ಬೋಡ್ಕೆ ಹಾಂಣಿ ಮುಂಬಯ್ ಆಕಾಶವಾಣಿಚೆರ್ ಹಂಗಾಮಿ ಕೊಂಕಣಿ ವೃತ್ತನಿವೇದಕ್ ಮ್ಹಣ್ ಕಾಮ್ ಕೆಲಾಂ. ಮಹಾರಾಷ್ಟ್ರ ರಾಜ್ಯ ಸಾಹಿತ್ಯ ಪುರಸ್ಕಾರ್, ಗೋವಾ ಕಲಾ ಅಕಾಡೆಮಿ, ಗೋವಾ ಹಿಂದು ಎಸೋಸಿಯೇಶನ್, ಮರಾಠಿ ಸಾಹಿತ್ಯ್ ಪರಿಶದ್ ಹಾಂಚೆ ಸಬಾರ್ ಪುರಸ್ಕಾರ್ ಕವಿ ಬೋಡ್ಕೆ ಹಾಂಕಾಂ ಫಾವೊ ಜಾಲ್ಲೆ.
`
ಉಮಂಗ್' ಹ್ಯಾ ಸಾತೊಳ್ಯಾಂತ್ಲ್ಯಾನ್ ತಾಂಣಿ ಪತ್ರಗಾರಿಕೆಕ್ ಸುರ್ವಾತ್ ಕೆಲ್ಲಿ. ತಾಚೆಂ ಪಯ್ಲಿಂ ಕೊಲ್ವಾಳ್ಚೆ ಎಕೆ ಶಾಳೆಂತ್ ತೆ ಶಿಕಯ್ತಾಲೆ. ಉಪ್ರಾಂತ್ ತಾಂಣಿ ಗೋಮಾಂತಕ್ ದಿಸಾಳ್ಯಾಂತ್ ಉಪಸಂಪಾದಕ್ ಮ್ಹಣ್ ಸೆವಾ ದಿಲಿ. ಗೋಮಾಂತಕ್ ಸೊಡುನ್ ಉಪ್ರಾಂತ್ ತೆ ದೈನಿಕ್ ನವಪ್ರಭಾಂತ್ ರುಜು ಜಾಲೆ. ಪತ್ರಗಾರಿಕಾ ಸೊಡುನ್ ತೆ ಮುಂಬಯ್ ಗೆಲೆ. ಥಂಯ್ ತಾಂಣಿ ನವಶಕ್ತಿ, ಸಕಾಳ್ ಹ್ಯಾ ದಿಸಾಳ್ಯಾಂನಿ ಕಾಮ್ ಕೆಲೆ ಉಪ್ರಾಂತ್ ಕಲ್ಯಾಣಾಚೆ ಬಿರ್ಲಾ ಕೊಲೆಜಿಂತ್ ಆನಿ ಉಪ್ರಾಂತ್ ಮುಂಬಯ್ಚ್ಯಾ ಎಮ್ಡಿ ಕೊಲೆಜಿಂತ್ ಪ್ರಾಧ್ಯಾಪಕ್ ಮ್ಹಣ್ ಕಾಮ್ ಕೆಲೆಂ. ತ್ಯಾಚ್ ವೆಳಾರ್ ಶಂಕರ್ ಕೊಲ್ಹಾಪುರೆ ಹಾಂಣಿ ಸುರ್ವಾತ್ ಕೆಲ್ಲ್ಯಾ `ರಾಜಧಾನಿ' ಹ್ಯಾ ನೆಮಾಳ್ಯಾಂತ್ ಕಾರ್ಯಕಾರಿ ಸಂಪಾದಕ್ ಮ್ಹಣ್ ತಾಂಣಿ ಕಾಮ್ ಕೆಲೆಂ. ವೈಯುಕ್ತಿಕ್ ಕಾರಣಾಂಕ್ ಲಾಗುನ್ ತೆ ಪರತ್ ಗೊಂಯಾಂತ್ ಆಯ್ಲೆ ಆನಿ ತಾಂಣಿ `ಬುಲಂದ್' ಹೆಂ ಸಾತೊಳೆಂ ಸುರು ಕೆಲೆಂ. ತೆ ಉಪ್ರಾಂತ್ `ಲೋಕಸತ್ತೆ'ಚೆ ಪುಣೆ ಆವೃತ್ತಿಚೊ ಮುಖ್ಯ ಉಪಸಂಪಾದಕ್ ಮ್ಹಣ್ ಕಾಮ್ ಕೆಲೆಂ.