ಗಣತಂತ್ರ್ ದಿಸಾಚಿ ಕವಿಗೋಷ್ಟಿ: ವಿಲ್ಸನ್ ಕಟೀಲಾಚ್ಯಾ ಕವಿತೆಂಚ್ಯಾ ಪಾವ್ಳ್ಯಾಂಕ್ ಧಾದೊಸ್ ಜಾಲ್ಲೆ ಗೊಂಯ್ಕಾರ್
ಇನ್ಸ್ಟಿಟ್ಯೂಟ್ ಮಿನೇಜಸ್ ಬ್ರಗಾಂಜಾ ಪಣ್ಜಿ, ಗೊಂಯ್ ಹಾಣಿಂ ಭಾರತೀಯ ಗಣತಂತ್ರ್ ದಿಸಾಸುವಾಳ್ಯಾರ್ ಹ್ಯಾಚ್ ಜನೆರಾಚ್ಯಾ ಪಂಚ್ವೀಸ್ ತಾರಿಕೆರ್, ಪಣ್ಜೆಚ್ಯಾ ರಾಜ್ಯ್ ವಸ್ತುಸಂಗ್ರಹಾಲಯಾಂತ್ ಆಸಾ ಕೆಲ್ಲಿ ಕವಿಗೋಶ್ಟಿ ಬೋವ್ ಆಪುರ್ಬಾಯೆಚಿ ಜಾಂವ್ಕ್ ಪಾವ್ಲಿ.
ಇನ್ಸ್ಟಿಟ್ಯೂಟ್ ಮಿನೇಜಸ್ ಬ್ರಗಾಂಜಾ ಹಾಚೊ ವಾವ್ರಾಡಿ ಮೋಹನ್ ದಾಸ್ ಹಾಂಣಿ ಜಮಲ್ಲ್ಯಾ ಸರ್ವ್ ಕವಿಂಕ್ ಆನಿ ಕಾವ್ಯ ರಸಿಕಾಂಕ್ ಸ್ವಾಗತ್ ಕೆಲೊ. "ಆಮಿ ವರ್ಸಾಕ್ ಫಕತ್ ದೋನ್ ಪಾವ್ಟಿಂ ಕವಿಗೋಶ್ಟಿ ಮಾಂಡುನ್ ಹಾಡ್ತಾಂವ್. ಪಯ್ಲಿ ಗಣರಾಜ್ಯ್ ದಿಸಾಸುವಾಳ್ಯಾರ್ ಜನೆರ್ 25 ತಾರಿಕೆರ್ ಆನಿ ದುಸ್ರಿ ಸ್ವಾತಂತ್ರ್ ದಿಸಾ ಸುವಾಳ್ಯಾರ್ ಆಗೋಸ್ತ್ 14 ತಾರಿಕೆರ್" ಅಶಿ ಬೋವ್ ಮಟ್ವ್ಯಾನ್ ಆಪ್ಲ್ಯಾ ವಾವ್ರಾವಿಶಿಂ ಝಳಕ್ ದಿಲಿ.
ಉಪ್ರಾಂತ್ ಉಲಯಿಲ್ಲೊ ಕೇಂದ್ರ ಅಕಾಡೆಮಿಚೊ ಕೊಂಕ್ಣಿ ಸಲ್ಹಾಗಾರ್ ಸಮಿತಿಚೊ ನಿಮಂತ್ರಕ್ ಆನಿ ತಶೆಂಚ್ ಕವಿಗೋಶ್ಟಿಚೊ ಅಧ್ಯಕ್ಶ್ ಪುಂಡಲೀಕ್ ನಾಯಕ್ ಮ್ಹಣಾಲೊ-" ಆಜ್ ಆಯ್ಕೊವ್ಪಿ ಲೋಕ್ ಬೋವ್ ಉಣೊ ಆಸಾ. ಹಾಂಗಾಸರ್ ಮಾತ್ರ್ ನ್ಹಂಯ್ ಸಗ್ಳ್ಯಾ ದೆಶಾಂತ್ ಹಿಚ್ ಪರಿಗತ್. ತರೀ ಕವಿತಾ ಬರಂವ್ಚ್ಯೊ ಉಣ್ಯೊ ಜಾಂವ್ಕ್ ನಾಂತ್. ಗಾಂವಾಂನಿ ವಚೊನ್ ಲೊಕಾಸಂಗಿಂ ಮೆಳೊನ್ ಕವಿತಾ ಆಯ್ಕೊಂಚಿ ಪ್ರಕ್ರಿಯಾ ಚಾಲು ಕರಿಜೆ" ಮ್ಹಣಾಲೊ.
(ಅಧ್ಯಕ್ಷ್ ಸ್ಥಾನಾ ವಯ್ಲ್ಯಾನ್ ಪುಂಡಲೀಕ್ ನಾಯ್ಕ್ ಉಲಯ್ತಾನಾ)
(ವಿಲ್ಸನ್ ಕಟೀಲ್ ಆಪ್ಣಾಚ್ಯೊ ಕವಿತಾ ಸಾದರ್ ಕರ್ತಾನಾ)
ಉಪ್ರಾಂತ್ ಬೋವ್ ಆಪುರ್ಬಾಯೆಚಿ ಕವಿಗೋಶ್ಟಿ ಚಲ್ಲಿ. ಕವಿಗೋಶ್ಟಿಚೊ ಅಧ್ಯಕ್ಶ್ ಪುಂಡಲೀಕ್ ನಾಯ್ಕಾಸವೆಂ ಹೆರ್ ಆಟ್ ಭಾಶೆಂಚ್ಯಾ ಧಾ ಜಣ್ ಕವಿಂನಿ ಆಪಾಪ್ಲ್ಯೊ ಕವಿತಾ ಸಾದರ್ ಕೆಲ್ಯೊ. ಚಡಾವತ್ ಕವಿಗೋಶ್ಟಿಂನಿ ಆಸ್ಚೆಬರಿ ಆಪ್ಲೆ ಮಾಂಯ್ ಭಾಶೆಚಿ ವಡ್ವಿಕಾಯ್ ಗಾಜಂವ್ಚ್ಯೊ ವಾ ಉತಳ್ಪಣಿ ಪ್ರಕೃತೆಚಿ ಬಡಾಯ್ ಸಾಂಗ್ಚ್ಯೊ ಕವಿತಾ ಬಿಲ್ಕುಲ್ ಹಾಂಗಾಸರ್ ನಾತ್ಲ್ಯೊ. ಜಿಣಿಯೆಚಿಂ ಮುಳಾಂ ಸೊದ್ಚ್ಯೊ, ವೆವಸ್ತೆಚಿ ಟಿಕಾ ಕರ್ಚ್ಯೊ, ಸಮಾಜೆಚ್ಯಾ ಘಡಿತಾಂಕ್ ಸ್ಪಂದನ್ ಕರ್ಚ್ಯೊ-ಅಸಲ್ಯಾ ಕವಿತೆಂನಿ ಉಣ್ಯಾ ತರೀ ಜಮ್ಲ್ಲ್ಯಾ ಲೊಕಾಕ್ ಧಾದೊಸ್ ಕರಯ್ಲೆಂ. ಚಡ್ತಾವ್ ಕವಿತೆಂನಿ ಕಳ್ತಲೆಂ ಕೀ ಪ್ರಸ್ತುತ್ ರಾಜಕೀಯ್ ವಾ ಸಾಮಾಜಿಕ್ ವೆವಸ್ತೆಥಂಯ್ ಕವಿಂಕ್ ಧಾದೊಸ್ಕಾಯ್ ನಾ ಮ್ಹಣ್.
(ಮಹಾಬಲೇಶ್ವರ್ ಸೈಲ್, ಪುಂಡಲೀಕ್ ನಾಯ್ಕ್, ದಿಲೀಪ್ ಬೋರ್ಕರಾ ಸಾಂಗಾತಾ ವಿಲ್ಸನ್ ಕಟೀಲ್)
(ಕವಿಗೋಷ್ಟಿಂತ್ ಭಾಗ್ ಘೆತಲ್ಲ್ಯಾ ಕವಿಂ ಸಾಂಗಾತಾ ಸಂಘಟಕ್ ತಶೆಂ ದಿಲೀಪ್ ಬೋರ್ಕರ್)
ಕವಿಗೋಷ್ಟಿಂತ್ ಶ್ರೀಮತಿ ಜಯಶ್ರೀ ಎಸ್ ಹರ್ಮಳ್ಕರ್ (ಹಿಂದಿ), ವಿಲ್ಸನ್ ಕಟೀಲ್ ಆನಿ ನಿಲ್ಬಾ ಖಾಂಡೇಕಾರ್ (ಕೊಂಕಣಿ), ಗಣೇಶ್ ವಿಸ್ಪುತಾಯ್ ಆನಿ ಸಂತೋಶ್ ಶೆಣೈ (ಮರಾಠಿ), ಶ್ರೀಮತಿ ಆರ್ಯಾಂಬಿಕಾ (ಮಲಯಾಳಮ್), ಹಿತೇನ್ ಆನಂದ್ಪಾರಾ (ಗುಜ್ರಾಥಿ), ಡೊ ಮೊಹ್ಸಿನ್ ಜಲಗಣ್ಚಿ (ಉರ್ದು), ವಿಷ್ಣು ನಾಯ್ಕ್ (ಕನ್ನಡ) ತಶೆಂ ನಿಖಿಲೇಶ್ವರ್ (ತೆಲುಗು) - ಹ್ಯಾ ಕವಿಂನಿ ಭಾಗ್ ಘೆತ್ಲೊ. ಮಂಗ್ಳುರ್ ಥಾವ್ನ್ ಹೆ ಕವಿಗೋಷ್ಟಿಕ್ ಪಾವಲ್ಲ್ಯಾ ವಿಲ್ಸನ್ ಕಟೀಲಾನ್ ಕವಿತಾ ಪಬ್ಲಿಕೇಶನ್ಸಾನ್ ಆಯ್ಲೆವಾರ್ ಪರ್ಗಟ್ ಕೆಲ್ಲ್ಯಾ ತಾಚ್ಯಾಚ್ `ಪಾವ್ಳೆ' ಪುಸ್ತಕಾಂತ್ಲಿಂ ಥೊಡಿಂ ಚುಟ್ಕುಲಾಂ ತಶೆಂ `ಆಜ್ಯಾಪಿ ಮನ್ಶಾಂಕ್' ಕವಿತಾ ಸಾದರ್ ಕೆಲ್ಯೊ.
ಕೊಂಕ್ಣೆಚೆ ನಾಂವಾಡ್ದಿಕ್ ಕಾಣಿಯೆಗಾರ್ ಶ್ರೀ ಮಹಾಬಲೇಶ್ವರ್ ಸಯ್ಲ್, ಬಿಂಬ್ ಸಂಪಾದಕ್ ತಶೆಂ ಗೊಂಯ್ ಕೊಂಕಣಿ ಅಕಾಡೆಮಿಚೆ ಅಧ್ಯಕ್ಷ್ ದಿಲೀಪ್ ಬೋರ್ಕಾರ್ ಹೆ ಕವಿಗೋಶ್ಟಿಚೆ ಆಯ್ಕೊವ್ಪಿ ಜಾವ್ನ್ ಹಾಜರ್ ಆಸ್ಲ್ಲೆ. ಅಕ್ರೇಕ್ ಕವಿತಾ ಸಾದರ್ ಕೆಲ್ಲ್ಯಾ ಸರ್ವ್ ಕವಿಂಕ್ ಉಗ್ಡಾಸಾಚಿ ಕಾಣಿಕ್ ದಿಲಿ. ಇನ್ಸ್ಟಿಟ್ಯೂಟ್ ಮಿನೇಜಸ್ ಬ್ರಗಾಂಜಾ ಹಾಚೊ ಉಪಾಧ್ಯಕ್ಶ್ ಅಶೋಕ್ ಪರಬ್ ಹಾಣಿಂ ಧನ್ಯವಾದ್ ಸಮರ್ಪಿಲೆ.
ಉಪ್ರಾಂತ್ ರಾತಿಂ 8 ವೊರಾರ್ ಸರ್ವ್ ಕವಿಂಕ್ ಸಾಹಿತಿಂಕ್ ಶೆರಾಂತ್ಲ್ಯಾ ಎಕಾ ಹೊಟೆಲಾಂತ್ ಜೆವ್ಣಾಚಿ ವೆವಸ್ತಾ ಆಸ್ಲ್ಲಿ. ಜೆವ್ಣಾಸವೆಂ ಸರ್ವಾಂನಿ ಸಾಹಿತ್ಯಾವಿಶಿಂ ಜಾಯ್ತೊ ಗಜಾಲಿ ಕೆಲ್ಯೊ. ವೆವೆಳ್ಯಾ ಗಾಂವ್ಚ್ಯಾ, ವೆವೆಗ್ಳ್ಯಾ ಭಾಶೆಂಚ್ಯಾ, ವೆವೆಗ್ಳೆ ಕಾಲೆತಿಚ್ಯಾ ಕವಿಂಸವೆಂ ವಾಂಟುನ್ ಘೆತ್ಲ್ಲ್ಯಾ ಜೆವ್ಣಾಕ್ ಬೋವ್ ವಿಶೇಸ್ ರೂಚ್ ಆಸ್ಲ್ಲಿ.