ಫೆಬ್ರೆರ್ 3: ಆಕಾಶ್ವಾಣಿ ಮಂಗ್ಳುರ್ ಕೇಂದ್ರಾಚೆರ್ ಕವಿತಾ ಟ್ರಸ್ಟ್ ಥಾವ್ನ್ ಏಕ್ ಸಾಹಿತೀಕ್ ಸಾಂಜ್ ಕಾರ್ಯಾವಳ್
ಆಕಾಶ್ವಾಣಿ ಮಂಗ್ಳುರ್ ಕೇಂದ್ರಾನ್ ಪಾಟ್ಲ್ಯಾ ಮ್ಹಯ್ನ್ಯಾ ಥಾವ್ನ್ ಬಾವೀಸ್ ಮಿನುಟಾಂಚಿ `ಏಕ್ ಸಾಹಿತೀಕ್ ಸಾಂಜ್' ಕಾರ್ಯಾವಳ್ ವಿತ್ರಾಂವ್ಕ್ ಸುರು ಕೆಲ್ಯಾ. ಮಂಗ್ಳುರ್ ಆನಿ ಆಸ್ಪಾಸ್ಚ್ಯಾ, ಸಾಹಿತಿಕ್ ವಾವ್ರಾಂತ್ ಮೆತೆರ್ ಜಾವ್ನಾಸ್ಚ್ಯಾ ಸಂಘ್ ಸಂಸ್ಥ್ಯಾಂಕ್ ಹೆಂ ಕಾರ್ಯಕ್ರಮ್ ದೀಂವ್ಕ್ ಆವ್ಕಾಸ್ ಆಸಾ. ಆದ್ಲ್ಯಾ ಮ್ಹಯ್ನ್ಯಾಂತ್ `ಕಿಟಾಳ್.ಕೊಮ್' ಜಾಳಿಸುವಾತೆ ತರ್ಫೆನ್ ಅಸಲಿ ಏಕ್ ಸಾಹಿತೀಕ್ ಕಾರ್ಯಾವಳ್ ಆಕಾಶ್ವಾಣಿನ್ ವಿತ್ರಾಯಿಲ್ಲಿ. ಆತಾಂ ಹ್ಯಾಚ್ ಫೆಬ್ರೆರ್ 3 ತಾರಿಕೆರ್ ಸಾಂಜೆರ್ 6:15 ವೊರಾಂಚೆರ್ `ಕವಿತಾ ಟ್ರಸ್ಟಾ'ಚೆ ಕಾರ್ಯಾವಳಿಚಿ ವಿತ್ರಾವ್ಣಿ ಜಾತಲಿ.
ಕಾರ್ಯಾವಳಿಂತ್ ಭಾಗ್ ಘೆತಲ್ಲಿಂ: ಎಚ್ಚೆಮ್ ಪೆರ್ನಾಳ್, ಎಂಡ್ರ್ಯೂ ಎಲ್ ಡಿಕುನ್ಹಾ, ಎವ್ರೆಲ್ ರೊಡ್ರಿಗಸ್, ಮೆಲ್ವಿನ್ ರೊಡ್ರಿಗಸ್ (ಬಸ್ಲ್ಯಾಂತ್), ವಿನ್ಸಿ ಪಿಂಟೊ ಆಂಜೆಲೊರ್, ವಿಲಿಯಮ್ ಪಾಯ್ಸ್, ವೆಂಕಟೇಶ ನಾಯಕ್ (ಉಬಿಂ)
(ಆಕಾಶ್ವಾಣಿ ಅಧಿಕಾರಿ ಫ್ಲೋರಿನ್ ರೊಚ್ ಸಾಂಗಾತಾ)
ಹಿ ಕಾರ್ಯಾವಳ್ 22 ಮಿನುಟಾಂಚಿ ಆಸೊನ್, ಕೊಂಕಣಿ ಕಾವ್ಯಾ ಭೊಂವ್ತಿಂ ಸಗ್ಳೆ ವಿಷಯ್ ಆಸ್ತಲೆ. ಹ್ಯಾ ಕಾರ್ಯಾಚೆಂ ಸಂಚಾಲನ್ ಕವಿತಾ ಟ್ರಸ್ಟಾಚಿ ಖಜಾನಿ ಎವ್ರೆಲ್ ರೊಡ್ರಿಗಸ್ ಹಿಣೆಂ ಕೆಲಾಂ.
ಸಗ್ಳ್ಯಾ ಕಾರ್ಯಾಂತ್ ತೀನ್ ವಾಂಟೆ ಆಸೊನ್, ಪಯ್ಲೆಂ ಕವಿತಾ ಟ್ರಸ್ಟಾಚೊ ಟ್ರಸ್ಟಿ ವಿಲಿಯಮ್ ಪಾಯ್ಸ್ ಕವಿತಾ ಆನಿ ಚಿತ್ರಕಲಾ: ಅಭಿವ್ಯಕ್ತೆಚಿಂ ದೋನ್ ರುಪಾಂ ವಿಷಯಾಚೆರ್ ಆಪ್ಲೆ ವಿಚಾರ್ ಮಾಂಡ್ತಲೊ. ದುಸ್ರ್ಯಾ ಭಾಗಾಂತ್ ಕವಿತಾ ಟ್ರಸ್ಟಾಚೊ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸ್ ಕವಿಗೋಷ್ಟಿ ಚಲೊವ್ನ್ ವ್ಹರ್ತಲೊ. ಹೆ ಕವಿಗೋಶ್ಟಿಂತ್ ತೊ ತಾಚಿ ಸ್ವತಾಚಿ ಕವಿತಾ ವಾಚ್ತಲೊ ಜಾಲ್ಯಾರ್, ಕವಿ ಎಂಡ್ರ್ಯೂ ಎಲ್ ಡಿಕುನ್ಹಾ, ವೆಂಕಟೇಶ ನಾಯಕ್ ಆನಿ ವಿನ್ಸಿ ಪಿಂಟೊ ಆಂಜೆಲೊರ್ ಭಾಗ್ ಘೆತಲೆ. ನಿಮಾಣೆಂ ಕವಿ ತಶೆಂ ವಿಮರ್ಶಕ್ ಎಚ್ಚೆಮ್ ಪೆರ್ನಾಳ್, ಮೆಲ್ವಿನ್ ರೊಡ್ರಿಗಸಾಚೆ ಹೆ ರೆಂವೆನ್ ಕವಿತೆಚಿ ವಿಸ್ಕಳಾವ್ಣಿ ಕರ್ತಲೊ.