ಸಾಮಾಜಿಕ್ ಸಮಸ್ಯಾಂಕ್ ಸ್ಪಂದನ್ ಕರ್ಚೆಂ ಕಾಳೀಜ್ ಕವಿಕ್ ಆಸಾಜಾಯ್: ಎಚ್ಚೆಮ್ ಪೆರ್ನಾಳ್
ಕೊಂಕಣಿ ಭಾಷಾ ಮಂಡಳ್, ಮಹಾರಾಷ್ಟ್ರಾ ಹಾಂಣಿ ಹ್ಯಾಚ್ ಮಾರ್ಚ್ ಮ್ಹಯ್ನ್ಯಾಚೆ 23 ತಾರಿಕೆರ್ ಸುಕ್ರಾರಾ ದೊನ್ಪಾರಾಂ ಅಂಧೇರಿ ಉದೆಂತಿಂತ್ ಆಸ್ಚ್ಯಾ ಮಹಾಕಾಳಿ ಗ್ಯಾನ್ ಆಶ್ರಮಾಂತ್ ಕೊಂಕಣಿ ಕವಿತಾ ಕಾರ್ಯಾಗಾರ್ ತಶೆಂ ಕವಿ ಸಮ್ಮೇಳನ್ ಮಾಂಡುನ್ ಹಾಡಲ್ಲೆಂ.
ಭಾಷಾ ಮಂಡಳಾಚೊ ಅಧ್ಯಕ್ಷ್ ಜೊನ್ ಡಿಸಿಲ್ವಾನ್ ಹ್ಯಾ ಕಾರ್ಯಾಗಾರಾಚೆಂ ಉಗ್ತಾವಣ್ ಕೆಲೆಂ. ಫಾಮಾದ್ ಕೊಂಕಣಿ ನಾಟಕ್ಕಾರ್, ನಟ್ ಫ್ರಾನ್ಸಿಸ್ ಫೆರ್ನಾಂಡಿಸ್ ಕಾಸ್ಸಿಯಾ ಮಾನಾಚೊ ಸೈರೊ ಜಾವ್ನ್ ಹಾಜರ್ ಆಸಲ್ಲೊ ತರ್, ಕಿಟಾಳ್ ಜಾಳಿಜಾಗ್ಯಾಚೊ ಸಂಪಾದಕ್, ಕವಿ ತಶೆಂ ವಿಮರ್ಶಕ್ ಹೆನ್ರಿ ಮೆಂಡೊನ್ಸಾ (ಎಚ್ಚೆಮ್ ಪೆರ್ನಾಳ್) ಹಾಂಣಿ ಸಂಪನ್ಮೂಳ್ ವ್ಯಕ್ತಿ ಜಾವ್ನ್ ಕಾರ್ಯಾಗಾರ್ ಚಲೊವ್ನ್ ವೆಲೆಂ.
‘ಕವಿಂಕ್ ಕ್ರಾಂತಿ ಕರ್ಯೆತ್ ಜಾಲ್ಲೊ ಅನ್ಭೋಗ್ ಆಸಾ. ಕವಿಕ್, ಕವಿತಾ ರಚ್ತಾನಾ ಸಾಮಾಜಿಕ್ ಹುಸ್ಕೊ ಆಸೊಂಕ್ ಜಾಯ್. ಆಪ್ಲ್ಯಾ ಕವಿತಾಂ ದ್ವಾರಿಂ ಸಮಾಜಾಕ್ ಬದ್ಲೊಂಚಿ ಜವಾಬ್ದಾರಿ ಕವಿಂಕ್ ಆಸ್ಲ್ಯಾರ್ ತಾಂಕಾಂ ಸಮಾಜ್ಮುಖಿ ಜಾಂವ್ಕ್ ಸಾಧ್ಯ್ ಆಸಾ. ಕವಿಂನಿ ಅಲಂಕಾರ್, ಪ್ರತಿಮಾ ಆನಿ ರೂಪಕಾಂ ಮ್ಹಳ್ಯಾರ್ ಕಿತೆಂ ಮ್ಹಣೊನ್ ಸಮ್ಜೊಂಚಿ ಗರ್ಜ್ ಆಸಾ. ಸಾಮಾಜಿಕ್ ಸಮಸ್ಯಾಂಕ್ ಸ್ಪಂದನ್ ಕರ್ಚೆಂ ಕಾಳೀಜ್ ಕವಿಂಲಾಗಿಂ ಆಸ್ಲ್ಯಾರ್ ತಾಂಕಾಂ ಲೊಕಾಮೊಗಾಳ್ ಕವಿ ಜಾಂವ್ಕ್ ಸಾಧ್ಯ್ ಆಸಾ’ ಮ್ಹಣೊನ್ ಎಚ್ಚೆಮ್ ಪೆರ್ನಾಳಾನ್ ಸಾಂಗ್ಲೆಂ.
‘ಮಾಂಯ್ಭಾಶೆಚೆಂ ಮಹತ್ವ್ ಸಮ್ಜೊನ್ ಘೆಂವ್ಚೊ ಕಾಳ್ ಉದೆಲಾ. ಆವಯ್ಚ್ಯಾ ಉಸ್ಕ್ಯಾರ್ ಬಸೊನ್ ಮಾಯ್ಭಾಸ್ ಶಿಕಲ್ಲ್ಯಾ ಆಮಿ ಆಜ್ ಆಖ್ಖ್ಯಾ ಸಂಸಾರಾಕ್ ಸಮ್ಜೊಂಕ್ ಸಕ್ಲ್ಯಾಂವ್. ಅಸಲಿಂ ಕಾರ್ಯಾಗಾರಾಂ ಭಾಷೆಚೆ ವಾಡಾವಳಿ ಖಾತೀರ್ ಗರ್ಜೆಚಿಂ’ ಅಶೆಂ ಮಾನಾಚೊ ಸೈರೊ ಫ್ರಾನ್ಸಿಸ್ ಫೆರ್ನಾಂಡಿಸ್ ಕಾಸ್ಸಿಯಾ ಮ್ಹಣಾಲೊ.
‘ಕೊಂಕಣಿ ಭಾಸ್ ಪುರಾತನ್ ಭಾಸ್. ಸೊಳಾವ್ಯಾ ಶೆಕ್ಡ್ಯಾ ಥಾವ್ನ್, ಮಹತ್ವಾಚೆಂ ಸ್ಥಾನ್ಮಾನ್ ಜೊಡುನ್ ಆಪ್ಲಿಚ್ ಮ್ಹಳ್ಳಿ ತಾಕತ್ ಹೆ ಭಾಷೆನ್ ಜೊಡ್ಲ್ಯಾ. ಆಯ್ಚ್ಯಾ ಯುವ ಜನಾಂಗಾ ಮಧೆಂ ಪಾಶ್ಚಾತ್ಯ್ ಸಂಸ್ಕೃತಿಚಿಂ ಪಾಳಾಂ ಬಳ್ವಂತ್ ಜಾವ್ನ್ ಗೆಲ್ಲ್ಯಾನ್ ಮಾಯ್ಭಾಸ್ ಉಲೊಂವ್ಕ್ ತಾಂಕಾಂ ಕಷ್ಟ್ ಮಾರ್ತಾತ್. ಮುಂಬಂಯ್ತ್ ಆಮ್ಕಾಂ ಕೊಂಕಣಿ ಭವನಾಚಿ ಗರ್ಜ್ ಆಸಾ. ಅಸಲ್ಯಾ ಬಾಂದ್ಪಾವರ್ವಿಂ ಕೊಂಕಣಿ ಭಾಷೆಚೊ ಪೋಸ್ ಕರುಂಕ್ ಸಾಧ್ಯ್ ’ ಅಶೆಂ ಕೊ.ಭಾ.ಮ. ಚೊ ಅಧ್ಯಕ್ಷ್ ಜೊನ್ ಡಿಸಿಲ್ವಾನ್ ಸಾಂಗ್ಲೆಂ.
ಉಪ್ರಾಂತ್ ಕವಿ ಆನ್ಸಿ ಪಾಲಡ್ಕಾಚ್ಯಾ ಯೆಜ್ಮಾನ್ಪಣಾಖಾಲ್ ಕವಿಗೋಷ್ಟಿ ಚಲೊನ್ ಸಭಾರ್ ಕವಿಂನಿ ಹಾಂತುಂ ವಾಂಟೊ ಘೆತ್ಲೊ.
ಭಾಷಾ ಮಂಡಳಾಚೊ ಕಾರ್ಯದರ್ಶಿ ಲೊರೆನ್ಸ್ ಡಿಸೋಜಾ ಕಮಾನಿನ್ ಸುರ್ವೆರ್ ಯೆವ್ಕಾರ್ ಕೆಲ್ಲೊ ತರ್, ಸಹ-ಕಾರ್ಯದರ್ಶಿ ಸಿರಿಲ್ ಕ್ಯಾಸ್ತೆಲಿನೊ ಮಲಾಡ್ ಹಾಂಣಿ ಸೈರ್ಯಾಂಕ್ ಫುಲಾಂ ದಿಲಿಂ. ಖಜಾನ್ದಾರ್ ಪೀಟರ್ ಡಿಸೋಜಾನ್ ಉಪ್ಕಾರ್ ಆಟಯ್ಲೆ.
ಹ್ಯಾ ಕಾರ್ಯಕ್ರಮಾಂತ್ ವೊಲ್ಟರ್ ಡಿಸೋಜಾ, ಸಿಪ್ರಿಯನ್ ಆಲ್ಬುಕೆರ್ಕ್, ಸ್ಟೇನ್ಲಿ ಡಾಯಸ್, ವಿಕ್ಟರ್ ಕೊನ್ಸೆಸೊ, ಬೆನೆಡಿಕ್ಟಾ ರೆಬೆಲ್ಲೊ. ಸುಧೀರ್ ಕೊಡಕಣಿ, ಅಲ್ಫೋನ್ಸ್ ಡಿಸೋಜಾ, ಕೆನ್ನಿ ಝುಜಾರ್ತೆ, ಬೆಟ್ಟಿ ನಝರೆತ್, ರೊನ್ ರೊಚ್ ಕಾಸ್ಸಿಯಾ ಆನಿ ಹೆರಾಂ ಹಾಜರ್ ಆಸಲ್ಲಿಂ.
-ವರ್ದಿ ಆನಿ ತಸ್ವೀರ್ಯೊ: ರೊನ್ಸ್ ಬಂಟ್ವಾಳ್
सामाजिक समस्यांक स्पंदन कर्चें काळीज कविक आसाजाय: एच्चेम पेरनाळ्
कोंकणी भाशा मंडळ, महाराशट्रा हांणी ह्याच मारच म्हयन्याचे 23 तारिकेर सुक्रारा दोन्पारां अंधेरी उदेंतिंत आसच्या महाकाळी ग्यान आश्रमांत कोंकणी कविता कार्यागार तशें कवी सम्मेळन मांडुन हाडल्लें.
भाशा मंडळाचो अध्यक्श जोन डिसिल्वान ह्या कार्यागाराचें उग्तावण केलें. फामाद कोंकणी नाटक्कार, नट फ्रान्सिस फेरनांडिस कास्सिया मानाचो सैरो जावन हाजर आसल्लो तर, किटाळ जाळिजाग्याचो संपादक, कवी तशें विमरशक हेन्री मेंडोन्सा (एच्चेम पेरनाळ) हांणी संपन्मूळ व्यक्ती जावन कार्यागार चलोवन वेलें.
‘कविंक क्रांती कर्येत जाल्लो अन्भोग आसा. कविक, कविता रच्ताना सामाजिक हुस्को आसोंक जाय. आपल्या कवितां द्वारीं समाजाक बद्लोंची जवाब्दारी कविंक आसल्यार तांकां समाज्मुखी जांवक साध्य आसा. कविंनी अलंकार, प्रतिमा आनी रूपकां म्हळ्यार कितें म्हणोन सम्जोंची गरज आसा. सामाजिक समस्यांक स्पंदन कर्चें काळीज कविंलागीं आसल्यार तांकां लोकामोगाळ कवी जांवक साध्य आसा’ म्हणोन एच्चेम पेरनाळान सांग्लें.
‘मांय्भाशेचें महत्व सम्जोन घेंवचो काळ उदेला. आवयच्या उसक्यार बसोन मायभास शिकलल्या आमी आज आखख्या संसाराक सम्जोंक सकल्यांव. असलीं कार्यागारां भाशेचे वाडावळी खातीर गरजेचिं’ अशें मानाचो सैरो फ्रान्सिस फेरनांडिस कास्सिया म्हणालो.
‘कोंकणी भास पुरातन भास. सोळाव्या शेकड्या थावन, महत्वाचें स्थान्मान जोडुन आपलिच म्हळ्ळी ताकत हे भाशेन जोडल्या. आयच्या युव जनांगा मधें पाश्चात्य संस्कृतिचीं पाळां बळवंत जावन गेलल्यान मायभास उलोंवक तांकां कश्ट मार्तात. मुंबंयत आम्कां कोंकणी भवनाची गरज आसा. असल्या बांद्पावर्वीं कोंकणी भाशेचो पोस करुंक साध्य ’ अशें को.भा.म. चो अध्यक्श जोन डिसिल्वान सांग्लें.
उप्रांत कवी आन्सी पालडकाच्या येज्मान्पणाखाल कविगोश्टी चलोन सभार कविंनी हांतूं वांटो घेत्लो.
भाशा मंडळाचो कार्यदर्शी लोरेन्स डिसोजा कमानिन सुर्वेर येवकार केल्लो तर, सह-कार्यदर्शी सिरिल क्यास्तेलिनो मलाड हांणी सैर्यांक फुलां दिलीं. खजान्दार पीटर डिसोजान उपकार आटयले.
ह्या कार्यक्रमांत वोल्टर डिसोजा, सिप्रियन आल्बुकेर्क, स्टेन्ली डायस, विक्टर कोन्सेसो, बेनेडिक्टा रेबेल्लो. सुधीर कोडकणी, अल्फोन्स डिसोजा, केन्नी झुजारते, बेट्टी नझरेत, रोन रोच कास्सिया आनी हेरां हाजर आसल्लिं.
-वर्दी आनी तस्वीर्यो: रोन्स बंटवाळ्