ಅತ್ಮ್ಯಾ ಸಾಂಗಾತಾ ಸಂವಾದ್ ಕೆಲ್ಯಾರ್ ಸುಖ್ ಲಾಭ್ತಾ: ಕುಂದಾಪುರಾಂತ್ ಚಿನ್ನಾ ಕಾಸರ್ಗೋಡ್
ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿನ್ ಹ್ಯಾಚ್ ಮಾರ್ಚ್ 24 ತಾರಿಕೆರ್ ದೊನ್ಪಾರಾಂ ಕುಂದಾಪುರ್ಚ್ಯಾ ನಾರಾಯಣಗುರು ಕಾಂಪ್ಲೆಕ್ಸಾಚ್ಯಾ ಕ್ಷೇಮಧಾಮಾಂತ್ `ಕವನಾಮೃತ' ನಾಂವಾಚಿ ಕೊಂಕಣಿ ಕವಿಗೋಶ್ಠಿ ಮಾಂಡುನ್ ಹಾಡಲ್ಲಿ. ಹ್ಯಾ ಸಂದರ್ಭಾರ್ ಕುಂದಾಪುರ್, ಕೆನರಾ ಬೆಂಕಾಚೊ ಚೀಫ್ ಮ್ಯಾನೇಜರ್ ಕೆ. ಉಮೇಶ ಪೈ ಉದ್ಘಾಟಕ್ ಜಾವ್ನ್ ಆಯಿಲ್ಲೊ ತರ್ ಅಕಾಡೆಮಿಚೊ ಅಧ್ಯಕ್ಷ್ ಕಾಸರಗೋಡು ಚಿನ್ನಾ ಅಧ್ಯಕ್ಷ್ ಜಾವ್ನ್ ಬಸಲ್ಲೊ. ಸಾಹಿತಿ ತಶೆಂ ಜಾದೂಗಾರ್ ಓಂ ಗಣೇಶ್, ಕುಂದಾಪುರ್ ಪತ್ರಕರ್ತಾಂಚ್ಯಾ ಸಂಘಾಚೊ ಅಧ್ಯಕ್ಶ್ ವಿನಯ್ ಪಾಯ್ಸ್, ಉದ್ಯಮಿ ಅಶೋಕ್ ಶೇಟ್ ಮಾನಾಚೆ ಸೈರೆ ಜಾವ್ನ್ ಆಯಿಲ್ಲೆ ತರ್ ಮೆಲ್ವಿನ್ ರೊಡ್ರಿಗಸಾನ್ ಕವಿಗೋಷ್ಟಿಚೆಂ ಅಧ್ಯಕ್ಷಪಣ್ ಘೆತಲ್ಲೆಂ.
ಚೆರ್ಡುವಾಂಕ್ ಎಕೆ ಮಾತೆನ್ ದಿಂವ್ಚಿ ಪಯ್ಲಿ ವಸ್ತ್ ಮ್ಹಳ್ಯಾರ್ ಮಾತೃಭಾಷಾ. ಭಾಸ್ ಶಿಕಚ್ಯಾಕ್ ಲಿಪಿ ಅಗತ್ಯ ನಾ. ಲಿಪಿಚೊ ವಾದ್ ಸೊಡ್ನ್ ಭಾಸ್ ಶಿಕಜೆ. ಪುಣ್ ಭಾಶೆಚ್ಯಾ ವಿಕಾಸಾಖಾತೀರ್ ಲಿಪಿ ಜಾಯ್' ಅಶೆಂ ಸೊಮಯ್ ಜಳೊವ್ನ್ ಕಾರ್ಯಕ್ರಮಾಚೆಂ ಉಗ್ತಾವಣ್ ಕೆಲ್ಲ್ಯಾ ಕೆ ಉಮೇಶ್ ಪೈನ್ ಸಾಂಗ್ಲೆಂ. `ಏಕ್ ಪೊಳೊ ದೋನ್ ತೀನ್ ಹೊಟ್ಲಾಂನಿ ತೀನ್ ಚ್ಯಾರ್ ದೀಸ್ ಖಾವ್ಯೆತ್. ಪುಣ್ ಸದಾಂಯ್ ಖಾಂವ್ಕ್ ಕಾಂಟಾಳೊ ಯೆತಾ. ಪುಣ್ ತೊಚ್ ಪೊಳೊ ಆವಯ್ನ್ ಯಾ ಬಾಯ್ಲೆನ್ ಸದಾಂಯ್ ಕರ್ನ್ ದಿಲೊ ತರ್ ಆಮಿ ಖಾತಾಂವ್. ಹಾಕಾ ಮಾತೃವಾತ್ಸಲ್ಯ ಕಾರಣ್. ಭಾಸಯ್ ತಶೀಚ್. ಆಮ್ಚೆ ಆವಯ್ನ್ ದಿಲ್ಲಿ ಭಾಸ್ ಖಂಯ್ ಗೆಲ್ಯಾರಿ ಆಮಿ ಸೊಡ್ಚಿ ನ್ಹಯ್' ಅಶೆಂ ತಾಂಣಿ ವಿನವ್ಣಿ ಕೆಲಿ.
ಆಜ್ ಬೊಬ್ ಮಾರುನ್ ಸರ್ವಾಂಕ್ ಕವಿಗೋಶ್ಟಿಕ್ ಆಪೊಂವ್ಚೆಂ ಗರ್ಜ್ ಉದೆಲ್ಯಾ. ಹೆಂ ಆಮ್ಚೆಂ ದುರ್ದೈವ್. ಲಗ್ನಾಮಾಟ್ವಾಂತ್ ಬಸೊನ್ ವೊವಿಯೊ ಮ್ಹಣ್ಚೆಂಚ್ ಕವಿಗೋಷ್ಟಿ ಮ್ಹಣ್ ಲೆಕ್ಚೊ ಲೋಕ್ ಆಸಾ. ತಾಂತುಂ ಕವಿಗೋಷ್ಟಿಚೆಂ ಲಕ್ಶಣ್ ಆಸಲ್ಲೆಂ ಜಾಂವ್ಕ್ ಪುರೊ. ಪುಣ್ ಸಾಹಿತ್ಯ್ ಕಿತ್ಲೆಂ ಆಸ್ತಾಲೆಂ ಸಾಂಗ್ಚ್ಯಾಕ್ ಜಾಯ್ನಾ' ಅಶೆಂ ಸೈರೊ ಜಾವ್ನ್ ಆಯಿಲ್ಲ್ಯಾ ಓಂ ಗಣೇಶ್ ಹಾಣಿಂ ಸಾಂಗ್ಲೆಂ.
ಲೊಕಾಂನಿ ವಾಂಟೊ ಘೆತ್ಲ್ಯಾರ್ ಮಾತ್ರ್ ಖಂಯ್ಚೀಂಯ್ ಕಾರ್ಯಕ್ರಮಾಂ ಯಶಸ್ವಿ ಜಾತಾತ್' ಮ್ಹಣೊನ್ ಅಶೋಕ್ ಶೇಟ್ ತಶೆಂ ವಿನಯ ಪಾಯ್ಸ್ ಹಾಂಣಿ ಸಾಂಗ್ಲೆಂ.
ಆಪ್ಲ್ಯಾ ಅಧ್ಯಕ್ಷೀಯ್ ಉಲೊವ್ಪಾಂತ್ `ಅಕಾಡೆಮಿಲಾಗಿಂ ದುಡು ಧಾರಾಳ್ ಆಸಾ. ಪುಣ್ ಸರ್ಕಾರಾನ್ ಸಾಂದೆ ಯೆದೊಳ್ ನೇಮಕ್ ಕರುಂಕ್ ನಾತಲ್ಲ್ಯಾನ್ ಖರ್ಚ್ ಕರುಂಕ್ ಉಪಾಯ್ ನಾ ಜಾಲಾ. ಹಿ ದುಖಾಚಿ ಗಜಾಲ್' ಅಶೆಂ ಚಿನ್ನಾ ಕಾಸರಗೋಡಾನ್ ಸಾಂಗ್ಲೆಂ. ಫುಡ್ಲೆ ಪಿಳ್ಗೆಕ್ ಭಾಸ್ ಉರೊಂವ್ಚೆಂ ಕಾಮ್ ಅಕಾಡೆಮಿ ಕರೀತ್ ಆಸಾ ಮ್ಹಣೊನ್ ಸಾಂಗಲ್ಲ್ಯಾ ತಾಂಣಿ ಕಥೊಲಿಕ್ ಸಮಾಜಾನ್ ಕೊಂಕಣಿ ಸಾಹಿತ್ಯಾಕ್ ದಿಲ್ಲೆ ದೇಣ್ಗಿಚಿ ಬರ್ಪೂರ್ ತೊಖ್ಣಾಯ್ ಕೆಲಿ. `ಅತ್ಮ್ಯಾಸಾಂಗಾತಾ ಸಂವಾದ್ ಕೆಲ್ಯಾರ್ ಸುಖ್ ಮೆಳ್ತಾ' ಮ್ಹಣೊನ್ ಕವಿಂಕ್ ಉದ್ದೇಸುನ್ ತಾಂಣಿ ಮ್ಹಳೆಂ.
ಹ್ಯಾ ಸಂದರ್ಭಾರ್ ಅಕಾಡೆಮಿ ಪುರಸ್ಕಾರ್ ಜೊಡಲ್ಲೊ ಕವಿ ಮೆಲ್ವಿನ್ ರೊಡ್ರಿಗಸಾಕ್ ಫುಲಾಂ, ಫಳಾಂ, ಯಾದಸ್ತಿಕಾ ದೀವ್ನ್ ಆನಿ ಶೊಲ್ ಪಾಂಗ್ರುನ್ ಮಾನ್ ಕೆಲೊ.
ಕವಿಗೋಷ್ಟಿಚೆಂ ಪ್ರಾಸ್ತಾವಿಕ್ ಭಾಷಣ್ ಕೆಲ್ಲ್ಯಾ ಮೆಲ್ವಿನ್ ರೊಡ್ರಿಗಸಾನ್ ಮೌನಪಣಾಂತ್ ಕಸಲೆಚ್ ಸಬ್ದ್ ಆಸನಾಂತ್ ತರೀ, ತಾಕಾ ಹಜಾರಾಂನಿ ಭೊಗ್ಣಾಂ ಆಶಾರ್ ಪಾಶಾರ್ ಕರ್ಚಿ ತಾಂಕ್ ಆಸ್ತಾ ಮ್ಹಳೆಂ. ಹರ್ಯೆಕಾ ಕವಿಚಿ ಕವಿತಾ ವಿಶ್ಲೇಷಣ್ ಕೆಲ್ಲ್ಯಾ ತಾಣೆಂ ಕವಿಂಚಿ ಅದ್ಭುತ್ ಉತ್ರಾಂ ಸಕತ್, ಆನಿ ಆಪುರ್ಬಾಯೆಚ್ಯಾ ಕವಿತಾ ವಾಚನಾಚಿ ತೋಖ್ಣಾಯ್ ಕೆಲಿ. ಬರೆ ಕವಿತೆಚ್ಯಾ ಲಕ್ಷಣಾಂವಿಶಿಂ ಉಲೊವ್ನ್, `ಹ್ಯೊ ಪುರಾಯ್ ಗಜಾಲಿ ಬರೆ ಕವಿತೆಕ್ ಗರ್ಜೆಚ್ಯೊ ಆಸಾತ್ ತರೀ, ಎಕಾ ಕವಿನ್ ಬರೊ ಮನೀಸ್ ಜಾಲ್ಯಾ ಖೆರೀತ್ ಬರೊ ಕವಿ ಜಾಂವ್ಕ್ ಸಾಧ್ಯ್ ನಾ' ಮ್ಹಣೊನ್ ಸಾಂಗ್ಲೆಂ.
ಚಡಾವತ್ ಕವಿಂನಿ ಸೈಂಭಾವಿಶಿಂ ಆನಿ ಆವಯ್ ವಿಶಿಂ ಕವಿತಾ ವಾಚ್ಲ್ಯೊ. ಡೊ ನಾಗೇಶ್ ಕುಮಾರ್ ರಾವಾನ್ ದಾಕ್ತೆರಾಂಕಯ್ ಗೂಣ್ ಕರುಂಕ್ ಸಾಧ್ಯ ನಾತಲ್ಲ್ಯೊ ಗಜಾಲಿ ಆವಯ್ ಕಶಿ ಗೂಣ್ ಕರುಂಕ್ ಸಕ್ತಾ ಮ್ಹಳ್ಳೆವಿಶಿಂ `ಆವ್ಸುಕ್ ಮಾತ್ರ್ ಸಾಧ್ಯ್' ಕವಿತೆಂತ್ ವಾಚುನ್ ಸಾಂಗ್ಲೆಂ. ತಾಚಿ `ಸೊರ್ರಿ ಡಿಯರ್' ಕವಿತಾ ಹಾಸ್ಯಮಯ್ ಆಸಲ್ಲಿ ಆನಿ ಬಾಮಣ್-ಬಾಯ್ಲೆಚ್ಯಾ ಸಂಬಂಧಾವಿಶಿಂ ಆಸಲ್ಲಿ. ಸ್ವಾತಿ ಶೇಟಾನ್ ಯುಗಾದಿ ಸಂದರ್ಭಾಕ್ ಲಗ್ತಿ ಕವಿತಾ ವಾಚ್ಲಿ. `ಆಜ್ ವಾಪಸ್ ಸುರ್ಯೋದಯ್ ಜಾಲ್ಲಾ, ಆಗ್ಯಾನಾಚೊ ಕಾಳೊಕ್ ದೂರ್ ಗೆಲ್ಲಾ' ಮ್ಹಳ್ಳ್ಯಾ ತಿಣೆಂ ಪಯ್ಲೆ ಪಾವ್ಟಿಂ ಆಪ್ಣೆಂ ಕವಿತಾ ಬರಯಿಲ್ಲ್ಯಾನ್ ಆನಿ ತಸಲೊ ಆವ್ಕಾಸ್ ಲಾಭಲ್ಲ್ಯಾನ್ ಆಪ್ಣಾಚ್ಯಾ ಜಿವಿತಾಂತಯ್ ಸುರ್ಯೋದಯ್ ಜಾಲಾ ಮ್ಹಳ್ಳೊ ಸಂತೊಸ್ ಪರ್ಗಟಾಯ್ಲೊ.
ಕೇಶವ್ ಪೈ ಗಂಗೊಳ್ಳಿನ್ ಮ್ಗಗೆಲ್ ಪ್ರಶ್ನೆಕ್ ಜಾವ್ಕಾ ತುಮ್ಗೆಲ್ ಉತ್ತರ್ ಮ್ಹಣೊನ್ ಸಾಮಾಜಿಕ್ ಸಮಸ್ಯಾಂಕ್ ಸ್ಪಂದನ್ ಕೆಲ್ಲಿ ಕವಿತಾ ವಾಚ್ಲಿ ತರ್, ಲೀನಾ ತಾವ್ರೊ ಹಂಗ್ಳೂರ್ ಹಿಣೆಂ `ಆಮೊಲಿಕ್ ವಸ್ತ್ ಆವಯ್' ಮ್ಹಣೊನ್ ಆವಯ್ಚೆಂ ಗುಣ್ಗಾನ್ ಕರ್ಚಿ ಕವಿತಾ ವಾಚ್ಲಿ. ಪರಿಸರಾವಿಶೀಂಯ್ ತಿಣೆಂ ಆನ್ಯೇಕ್ ಕವಿತಾ ಪೇಶ್ ಕೆಲಿ. ಜ್ಞಾನದೇವ್ ಮಲ್ಯಾನ್ `ಖಂಯ್ ಗೆಲಿಂ ತಿಂ ತುಮ್ಚಿಂ' ಕವಿತಾ ವಾಚ್ಲಿ ತರ್, ನರ್ಮದಾ ಪ್ರಭು ತೆಕ್ಕಟ್ಟೆನ್ `ಅಶ್ಶಿ ಮ್ಹಾಕ್ಕಾ ದಿಸ್ತಾ’ ನಾಂವಾಚಿ ಕವಿತಾ ವಾಚುನ್ ಎಕೆ ಬಾಯ್ಲೆಚೆಂ ಕಾಳೀಜ್ - ಭುರ್ಗ್ಯಾಂಕ್ ಆವಯ್ ಜಾವ್ನ್, ಘೊವಾಕ್ ಬಾಯ್ಲ್ ಜಾವ್ನ್ - ಬೋವ್ ಮಾರ್ಮಿಕ್ ಥರಾನ್ ವಿವಾರಾಯ್ಲೆಂ. ಕೆ ರಮಾನಂದ ಕಾಮತಾನ್ ಆಧುನಿಕ್ ಕಾಳಾಚಿ ಸೊಫ್ಟವೇರ್ ಕವಿತಾ ವಾಚ್ಲಿ ತರ್, ಶೆರಲ್ ಡಿಸೋಜಾ ಸಾಸ್ತಾನ್ ಹಿಣೆಂ ಕುಟ್ಮಾಚಿ ವೀದ್ವಾವ್ಳಿ ಕಶಿ ಜಾಲಿ ಮ್ಹಳ್ಳೆಂ `ಅಂಧ್ಕಾರಾಂತ್ಲೆಂ ಕುಟಮ್' ಕವಿತೆಂತ್ ಸಾಂಗ್ಲೆಂ ಆನಿ ಉಪ್ರಾಂತ್ ಆಪ್ಲ್ಯಾ ಆಜ್ಯಾವಿಶಿಂ ಸುರಸ್ ಕವಿತಾ ವಾಚ್ಲಿ. ಜಯವಂತ ಪೈನ್ ಏಕ್ ಕವಿತಾ ಗಾವುನ್ ದಾಕಯ್ಲಿ ತರ್ ಉಪ್ರಾಂತ್ ಆಪ್ಲ್ಯಾ ಗಾಂವಾವಿಶಿಂ ಕವಿತಾ ವಾಚನ್ ಕೆಲಿ. ಬರ್ನಾರ್ಡ್ ಜೆ ಕೋಸ್ತಾನ್ ವಿಕಾಸಾಚ್ಯಾ ನಾಂವಾರ್ ಮನ್ಶಾಚಿ ಸಂಸ್ಕೃತಿ ಕಶಿ ಆಳ್ವೊನ್ ವೆತಾ ಮ್ಹಣೊನ್ `ಬುಡ್ತುಗೊಲ್' ನಾಂವಾಚೆ ಆಪ್ಣಾಚೆ ಕವಿತೆಂತ್ ವಿವರಾಯ್ಲೆಂ. ಶಶಿ ಎನ್ ಹಾಣೆ `ರಿಟಾಯರ್ಡ್ ಜಾತಾನಾ ಕೊಣ್ ಗತಿ' ನಾಂವಾಚಿ ಕವಿತಾ ವಾಚ್ಲಿ.
ಸುರ್ವೆರ್ ಅಕಾಡೆಮಿಚೊ ರಿಜಿಸ್ಟ್ರಾರ್ ಡೊ. ಬಿ ದೇವದಾಸ್ ಪೈನ್ ಯೆವ್ಕಾರ್ ಭಾಷಣ್ ಕೆಲ್ಲೆಂ ತರ್, ಯು.ಎಸ್. ಶೆಣೈನ್ ಕಾರ್ಯಕ್ರಮ್ ನಿರೂಪಣ್ ಕೆಲೆಂ ಮಾತ್ರ್ ನ್ಹಯ್ ನಿಮಾಣೆಂ ಸರ್ವಾಂಚೆ ಉಪ್ಕಾರ್ ಆಟಯ್ಲೆ.
अत्म्या सांगाता संवाद केल्यार सुख लाभ्ता: कुंदापुरांत चिन्ना कासरगोड्
करनाटक कोंकणी साहित्य अकाडेमिन ह्याच मारच 24 तारिकेर दोन्पारां कुंदापुरच्या नारायणगुरू कांपलेक्साच्या क्शेमधामांत `कवनामृत' नांवाची कोंकणी कविगोश्ठी मांडुन हाडल्ली. ह्या संदरभार कुंदापुर, केनरा बेंकाचो चीफ म्यानेजर के. उमेश पै उद्घाटक जावन आयिल्लो तर अकाडेमिचो अध्यक्श कासरगोडू चिन्ना अध्यक्श जावन बसल्लो. साहिती तशें जादूगार ಓं गणेश, कुंदापुर पत्रकरतांच्या संघाचो अध्यक्श विनय पायस, उद्यमी अशोक शेट मानाचे सैरे जावन आयिल्ले तर मेल्विन रोड्रिगसान कविगोश्टिचें अध्यक्शपण घेतल्लें.
`चेर्डुवांक एके मातेन दिंव्ची पयली वस्त म्हळ्यार मातृभाशा. भास शिकच्याक लिपी अगत्य ना. लिपिचो वाद सोड्न भास शिकजे. पुण भाशेच्या विकासाखातीर लिपी जाय' अशें सोमय जळोवन कार्यक्रमाचें उग्तावण केल्ल्या के उमेश पैन सांग्लें. `ऎक पोळो दोन तीन होट्लांनी तीन च्यार दीस खाव्येत. पुण सदांय खांव्क कांटाळो येता. पुण तोच पोळो आवयन या बायलेन सदांय करन दिलो तर आमी खातांव. हाका मातृवात्सल्य कारण. भासय तशीच. आम्चे आवयन दिल्ली भास खंय गेल्यारी आमी सोड्ची न्हय' अशें तांणी विनव्णी केलि.
`आज बोब मारुन सरवांक कविगोश्टिक आपोंव्चें गरज उदेल्या. हें आम्चें दुरदैव. लग्नामाट्वांत बसोन वोवियो म्हण्चेंच कविगोश्टी म्हण लेक्चो लोक आसा. तांतूं कविगोश्टिचें लक्शण आसल्लें जांव्क पुरो. पुण साहित्य कित्लें आस्तालें सांग्च्याक जायना' अशें सैरो जावन आयिल्ल्या ಓं गणेश हाणीं सांग्लें.
`लोकांनी वांटो घेत्ल्यार मात्र खंयचींय कार्यक्रमां यशस्वी जातात' म्हणोन अशोक शेट तशें विनय पायस हांणी सांग्लें.
आपल्या अध्यक्शीय उलोव्पांत `अकाडेमिलागीं दुडू धाराळ आसा. पुण सरकारान सांदे येदोळ नेमक करुंक नातल्ल्यान खरच करुंक उपाय ना जाला. ही दुखाची गजाल' अशें चिन्ना कासरगोडान सांग्लें. फुड्ले पिळगेक भास उरोंव्चें काम अकाडेमी करीत आसा म्हणोन सांगल्ल्या तांणी कथोलिक समाजान कोंकणी साहित्याक दिल्ले देण्गिची बरपूर तोख्णाय केली. `अतम्यासांगाता संवाद केल्यार सुख मेळता' म्हणोन कविंक उद्देसुन तांणी म्हळें.
ह्या संदरभार अकाडेमी पुरस्कार जोडल्लो कवी मेल्विन रोड्रिगसाक फुलां, फळां, यादस्तिका दीवन आनी शोल पांग्रुन मान केलो.
कविगोश्टिचें प्रास्ताविक भाशण केल्ल्या मेल्विन रोड्रिगसान मौनपणांत कसलेच सब्द आसनांत तरी, ताका हजारांनी भोग्णां आशार पाशार कर्ची तांक आस्ता म्हळें. हर्येका कविची कविता विश्लेशण केल्ल्या ताणें कविंची अद्भुत उत्रां सकत, आनी आपुरबायेच्या कविता वाचनाची तोख्णाय केली. बरे कवितेच्या लक्शणांविशीं उलोवन, `ह्यो पुराय गजाली बरे कवितेक गरजेच्यो आसात तरी, एका कविन बरो मनीस जाल्या खेरीत बरो कवी जांव्क साध्य ना' म्हणोन सांग्लें.
चडावत कविंनी सैंभाविशीं आनी आवय विशीं कविता वाचल्यो. डो नागेश कुमार रावान दाक्तेरांकय गूण करुंक साध्य नातल्ल्यो गजाली आवय कशी गूण करुंक सक्ता म्हळ्ळेविशीं `आव्सुक मात्र साधय' कवितेंत वाचुन सांग्लें. ताची `सोर्री डियर' कविता हास्यमय आसल्ली आनी बामण्-बायलेच्या संबंधाविशीं आसल्ली. स्वाती शेटान युगादी संदरभाक लग्ती कविता वाच्ली. `आज वापस सुर्योदय जाल्ला, आग्यानाचो काळोक दूर गेल्ला' म्हळ्ळ्या तिणें पयले पाव्टीं आपणें कविता बरयिल्ल्यान आनी तसलो आव्कास लाभल्ल्यान आपणाच्या जिवितांतय सुर्योदय जाला म्हळ्ळो संतोस परगटायलो.
केशव पै गंगोळ्ळिन म्गगेल प्रश्नेक जाव्का तुम्गेल उत्तर म्हणोन सामाजिक समस्यांक स्पंदन केल्ली कविता वाच्ली तर, लीना ताव्रो हंग्ळूर हिणें `आमोलिक वस्त आवय' म्हणोन आवयचें गुण्गान करची कविता वाच्ली. परिसराविशींय तिणें आन्येक कविता पेश केली. ज्ञानदेव मल्यान `खंय गेलीं तीं तुम्चीं' कविता वाच्ली तर, नरमदा प्रभू तेक्कट्टेन `अश्शी म्हाक्का दिस्ता’ नांवाची कविता वाचुन एके बायलेचें काळीज - भुरग्यांक आवय जावन, घोवाक बायल जावन - बोव मारमिक थरान विवारायलें. के रमानंद कामतान आधुनिक काळाची सोफ्टवेर कविता वाच्ली तर, शेरल डिसोजा सास्तान हिणें कुट्माची वीद्वाव्ळी कशी जाली म्हळ्ळें `अंध्कारांत्लें कुटम' कवितेंत सांग्लें आनी उप्रांत आपल्या आज्याविशीं सुरस कविता वाच्ली. जयवंत पैन ऎक कविता गावुन दाकयली तर उप्रांत आपल्या गांवाविशीं कविता वाचन केली. बरनारड जे कोस्तान विकासाच्या नांवार मन्शाची संस्कृती कशी आळवोन वेता म्हणोन `बुड्तुगोल' नांवाचे आपणाचे कवितेंत विवरायलें. शशी एन हाणे `रिटायर्ड जाताना कोण गती' नांवाची कविता वाच्ली.
सुरवेर अकाडेमिचो रिजिस्ट्रार डो. बी देवदास पैन येव्कार भाशण केल्लें तर, यु.एस. शेणैन कार्यक्रम निरूपण केलें मात्र न्हय निमाणें सरवांचे उपकार आटयले.