ಬಾಕಿಬಾಬಾಚ್ಯಾ ಕಾವ್ಯಾಂತ್ಲೊ ಪ್ರತಿರೋಧಿ ಆನಿ ಉಪರೋಧಿ ಸ್ವರ್ - 2
 - ರಾಜಯ್ ಪವಾರ್
(ಭಾರತ್ ಭುಂಯ್ಚೆರ್ ಜಲ್ಮೊನ್ ಗೆಲ್ಲೊ ಉಂಚ್ಲೊ ಕವಿ ಬಾಕಿಬಾಬ್ ಬೋರ್ಕರಾಚಿ ಜಲ್ಮಶತಾಬ್ದಿ ಆದ್ಲ್ಯಾ ವರ್ಸಾಚ್ಯಾ ನವೆಂಬ್ರಾಂತ್ ಸುರು ಜಾಲ್ಲಿ. ಆಂವ್ದುಂ ನವೆಂಬ್ರಾ ಪಾಸುನ್ ತಿ ಮುಕಾರ್ ವೆತಲಿ. ಹೊ ಉತ್ಸವ್ ಗೊಂಯಾಂತ್ ಮಾತ್ರ್ ನ್ಹಯ್, ಆಯ್ಲೆವಾರ್ ಮಂಗ್ಳುರಾಂತಯ್ ಚಲ್ಲೊ. ಕವಿತಾ ಟ್ರಸ್ಟಾನ್ ವಿಶ್ವ ಕೊಂಕಣಿ ಕೇಂದ್ರ್ ಹಾಂಚೆ ಸಾಂಗಾತಾ ಮೆಳೊನ್ ಎಕಾ ದಿಸಾಚೆಂ ಕಾರ್ಯೆಂ ಜೂನ್ ಮ್ಹಯ್ನ್ಯಾಚೆ ತೆರಾ ತಾರಿಕೆರ್ ಘಡೊವ್ನ್ ಹಾಡಲ್ಲೆಂ. ತ್ಯಾ ಸಂದರ್ಭಾರ್ ಪ್ರೊ. ನಾರಾಯಣ್ ದೇಸಾಯಿ ಹಾಚ್ಯಾ ಅಧ್ಯಕ್ಷಪಣಾಖಾಲ್ ಜೆಂ ವಿಚಾರ್ ಸಾತೆಂ ಚಲಲ್ಲೆಂ, ತ್ಯಾ ಸಂದರ್ಭಾರ್ ಗೊಂಯಾಂ ಥಾವ್ನ್ ಆಯಿಲ್ಲ್ಯಾ ದೊಗಾಂನಿ ಆಪ್ಲೆ ಪ್ರಬಂಧ್ ಮಾಂಡಲ್ಲೆ. ತ್ಯಾ ಪಯ್ಕಿ ರಾಜಯ್ ಪವಾರಾಚೊ ಪ್ರಬಂಧ್ ಕಂತಾಂ ಕಂತಾಂನಿ ಹಾಂಗಾಸರ್ ಪರ್ಗಟ್ ಕರ್ತಾಂವ್ - ಸಂಪಾದಕ್)
ಬಾಕಿಬಾಬಾಂ ಮಧ್ಲೊ `ಸೈಮ್ಕವಿ', `ಪ್ರೇಮ್ಕವಿ' ಜಿತ್ಲೊ ಮಹತ್ವಾಚೊ ತಿತ್ಲೋಚ್ ತಾಂಚೆ ಮಧ್ಲೊ `ಸ್ವಾಭಿಮಾನಿ ಕವಿ'ಯ್ ಮಹತ್ವಾಚೊ. ಬಾಕಿಬಾಬಾಂಚಿ ಕೊಂಕಣಿ ಆನಿ ಮರಾಠಿ ಭಾಶೆಂತ್ಲಿ ಕವಿತಾ ವಾಚ್ತಕೀಚ್ ಸಾದರ್ಪಣಾನ್ ಏಕ್ ಗಜಾಲ್ ಜಾಣ್ವಾತಾ ತಿ ಅಶಿ ಕಿ ಬಾಕಿಬಾಬಾಂಚೆ ಕೊಂಕಣಿ ಕವಿತೆಂತ್ ಜಾಣ್ವಪಿ `ಪ್ರತಿರೋಧಿ' ಸ್ವರ್ ಮರಾಠಿ ಕವಿತೆಂತ್ ಜಾಣ್ವನಾ. ದೋನ್ಯ್ ಭಾಸಾಂತ್ಲ್ಯಾ ಕವಿತಾಂನಿ ಗೊಂಯ್ ಆಯ್ಲಾಂ ಪುಣ್ ಭುಂಯ್-ಭಾಶೆಚೊ ಸ್ವಾಭಿಮಾನ್ ಆನಿ ತಾಂಚಿ ರಾಖಣ್ ಕರ್ಪಾ ಸಂಬಂಧಾಂತ್ಲೊ ಪ್ರತಿರೋಧ್ ಮಾತ್ ಮರಾಠಿ ಪರಸ್ ಕೊಂಕಣಿ ಕವಿತೆಂತ್ಚ್ ಚಡ್ ಪ್ರಮಾಣಾಂತ್ ಅಧೋರೆಖಿತ್ ಜಾಲ್ಲೊ ಪಳೊಂವ್ಕ್ ಮೆಳ್ತಾ. ತಾಂಚೆ ಕವಿತೆಂತ್ ಗಾಂಧಿ ಆನಿ ಲೋಹಿಯಾಂಚ್ಯಾ ವಿಚಾರಾಂಚೊ ಪ್ರಭಾವ್ ಜಾಣ್ವತಾ. ಬಾಕಿಬಾಬಾಂಚ್ಯಾ ಸೈಮ್ಕವಿತಾಂಚೆರ್, ಪ್ರೇಮ್ಕವಿತಾಂಚೆರ್ ಜಾಯ್ತ್ಯೊ ಚರ್ಚಾ, ಪರಿಸಂವಾದ್, ಪ್ರಪತ್ರಾಂ ತಯಾರ್ ಜಾಲ್ಯಾಂತ್. ಬಾಕಿಬಾಬಾಂಚೆ ಕವಿತೆಂತ್ಲಿ ಉತ್ರಾವಳ್ ಮ್ಹಳ್ಯಾರೂಚ್ ಏಕ್ ಅಭ್ಯಾಸಾಚೊ ವಿಷಯ್. ತಾಂಚೆ ಕವಿತೆಂತ್ಲೊ, ತಿ ಮಾಗೀರ್ ಮರಾಠಿ ಆಸುಂ ವಾ ಕೊಂಕಣಿ, ತಾಂತುಂತ್ಲೊ ಅನುಪ್ರಾಸ್ ನದ್ರೆಂತ್ ಭರ್ಪಾ ಸಾರ್ಕೊ ಆಸ್ತಾ. ತಾಚ್ಯಾ ನಾದ್ಮಯ್ ನಾಂವಾತೂಚ್ ಬ, ಕ ಆನಿ ರ ಅಕ್ಷರಾಂಚೊ ಅನುಪ್ರಾಸ್ ಆಸ್ಪಾವ್ಲಾ ತಾಚಿ ಹಿ ಅನುಪ್ರಾಸಾನ್ ಭರಿಲ್ಲಿ ಕಾವ್ಯವಾಣಿ ಮ್ಹಳ್ಯಾರ್ ಏಕ್ ದೈವಿ ದೇಣ್ಗಿಚ್ ಮ್ಹಣೊಂಕ್ ಫಾವೊ. ಹಾಂವ್ ತಾಚೆ ಶಬ್ದಾವಳಿಚೆರ್ ವಾ ನಾದ್ಮಯತೆಚೆರ್ ಭಾಷ್ಯ್ ಕರುಂಕ್ ಸೊದನಾ. ಆಜ್ವೆರ್ ಜಾಯ್ತ್ಯಾ ಜಣಾಂನಿ ತಾಚೆರ್ ಭಾಷ್ಯ್ ಕೆಲಾಂ. ತೆಂಚ್ ತೆಂಚ್ಪಣ್ ಠಾಳ್ಪಾಖಾತೀರ್, ತಾಂಚ್ಯಾಂತ್ಲ್ಯಾ ಸ್ವಾಭಿಮಾನಿ ಗೊಂಯ್ಕಾರಾನ್, ಆಪ್ಲೆಂ ಸ್ವತ್ವ್ ಶಬ್ದ್ ಬದ್ಧ್ ಕರ್ತಾನಾ ಜೊ ಏಕ್ `ಪ್ರತಿರೋಧಿ ಸ್ವರ್' ಆಪ್ಲೆ ಕವಿತೆಂತ್ಲ್ಯಾನ್ ಮಾಂಡ್ಲೊ, ತೊ ಅಧೋರೆಖಿತ್ ಕರ್ಪಾಚೊ ಹೆತ್ ಹಾಂಗಾ ಬಾಳ್ಗಿಲಾ.
ಆಪ್ಲೆ ಪಿರಾಯೆಚ್ಯಾ ಣವ್ವ್ಯಾ ವರ್ಸಾ ಬಾಕಿಬಾಬಾನ್ ಪಯ್ಲೊ ಅಭಂಗ್ ರಚ್ಲೊ. ಘರಾಂತ್ ಸಾಂಜ್ಚ್ಯಾ ವೆಳಾರ್ ಭಜನಾಂ ಮ್ಹಣ್ಪಾಚೊ ತಾಂಗೆರ್ ನೆಮ್ ಆಸ್ತಾಲೊ. ಭಜನಾಂ ಸೊಂಪ್ಲ್ಯಾ ಉಪ್ರಾಂತ್ ತಾಂಕಾಂ (ಭುರ್ಗ್ಯಾಂಕ್) ಎಕಾದ್ರೊ ಶ್ಲೋಕ್, ವೊವಿ ವಾ ಅಭಂಗ್ ಮ್ಹಣುನ್ ದಾಕೊಂವ್ಚೊ ಪಡ್ಟಾಲೊ. ಏಕ್ ದೀಸ್ ಹಿ ಪಾಳಿ ಬಾಕಿಬಾಬಾಚೆರ್ ಆಯ್ಲಿ ತೆನ್ನಾಂ ತಾಣೆ ಸ್ವತಾಚೊ ಅಭಂಗ್ ರಚುನ್ ತಾಂತುನ್ ನಿಮಾಣೆಕಡೆನ್ `ಬಾಕಿ ಮ್ಹಣೆ' ಅಶಿಂ ಉತ್ರಾಂ ಘಾಲುನ್ ಅಭಂಗ್ ಮ್ಹಣ್ಲೊ. ತ್ಯಾವೆಳಾರ್ ತಾಗೆಲ್ಯಾ ಚುಲ್ತ್ಯಾನ್ ತಾಕಾ ತಶೆಂ ಕರ್ಚೆಂ ನ್ಹಯ್ ಮ್ಹಣ್ ಶಿಟ್ಕಾಯ್ಲೊ ಆನಿ ಆಜ್ಯೆನ್ ತರ್ `ಪರ್ತುನ್ ಲೇಖನಾಚೆ ಭಾನ್ಗಡೆಕ್ ವಚ್ಚೊ ನಾ' ಮ್ಹಣ್ ಉತರ್ ಘೆತ್ಲೆಂ. ಪುಣ್ ಬಾಕಿಬಾಬಾನ್ ಆಪ್ಲೆ ಭಿತರ್ಲ್ಯಾ ಕವಿಕ್ ಶೆಣ್ಪಾಕ್ ದೀಂವ್ಕ್ ನಾ. ತಾಂಣಿ ಆಜ್ಯೆಚ್ಯಾ ಸೊಪುತಾಚೋಯ್ ಪ್ರತಿರೋಧ್ ಕೆಲೊ ಆನಿ ತಿಚ್ಯಾ ಬಂದನಾಕ್ ಪಾಳೊ ದೀನಾಸ್ತಾನಾ ಲೀಪ್-ಚೊರ್ಯಾಂ ಕಾವ್ಯರಚನಾ ಕರೀತ್ ರಾವ್ಲೊ.
ಸಮಾಜಾಂತ್ ಜರಿ ಕಾವ್ಯಾಕ್ ಸುವಾತ್ ಆಶಿಲ್ಲಿ ತರೀ `ಕವಿ'ಕಡೆನ್ ಪಳೊವ್ಪಾಚಿ ಥೊಡ್ಯಾಂಚಿ ನದರ್ ವೆಗ್ಳಿ ಆಶಿಲ್ಲಿ. ಕವಿ ಮ್ಹಳ್ಯಾರ್ ಕೊಣ್ ತರೀ `ಪಿಸೊ' ವಾ `ಉಪೇಗ್ ನಾಶಿಲ್ಲೊ' ಅಶೆ ನದ್ರೆನ್ ಪಳೊವ್ಪ್ ಜಾತಾಲೆಂ. ಮಾತ್ ಬಾಕಿಬಾಬಾಂನಿ ಅಸಲ್ಯಾ ಲೊಕಾಂಕ್ ಕೆನ್ನಾಂ ಲೆಖ್ಲೆಚ್ ನಾಂತ್. ಆಪುಣ್ ಏಕ್ `ಕವಿ' ಹಾಚೊ ಅಭಿಮಾನ್ ತೆ ಉಗ್ತೆಪಣಾನ್ ಮಿರೊಂವ್ಕ್ ಲಾಗ್ಲೆ. ತೆ ಜೆನ್ನಾಂ ಜೆನ್ನಾಂ ಫೊನಾಚೆರ್ ಉಲಯ್ತಾಲೆ ತೆನ್ನಾಂ ತೆನ್ನಾಂ `ಆಯ್ ಏಮ್ ಪೊಯೆಟ್ ಬೋರ್ಕರ್ ಸ್ಪೀಕಿಂಗ್' ಮ್ಹಣ್ ಸುರ್ವಾತ್ ಕರ್ತಾಲೆ. ಥಿಲ್ಲರ್ ಮತಾಂಚೊ ವಾ ವಿಚಾರಾಂಚೊ ತಾಂಣಿ ಪ್ರತಿರೋಧ್ ಕೆಲೊ ಹಾಚಿ ಹಿ ಏಕ್ ದೇಖ್ ಮ್ಹಣುಂ ಯೆತಾ.
ಬಾಕಿಬಾಬಾಂಕ್ ಏಕ್ `ಆನಂದ್ಯಾತ್ರಿ' ಮ್ಹಣ್ ವೊಳ್ಕತಾತ್. ಹೊ ಸೈಮ್ಕವಿ, ಪ್ರೇಮ್ಕವಿ ಅಚಕೀತ್ `ಕ್ರಾಂತಿ-ಕವಿ' ಕಸೊ ಜಾಲೊ? 18 ಜ್ಯೂನ್ 1946 ಹ್ಯಾ ದಿಸಾ ಮಡ್ಗಾಂವಾಂ ಡೊ. ರಾಮ್ ಮನೋಹರ್ ಲೋಹಿಯಾನ್ ಸುಟ್ಕೆಝುಜಾಚೆಂ ಆಹ್ವಾನ್ ಕರ್ಪಿ ಕ್ರಾಂತಿಕೀಟ್ ಪೆಟಯ್ಲಿ. ಬಾಕಿಬಾಬಾನೂಯ್ ಹೆ ಸಭೆಕ್ ಹಾಜ್ರಿ ಲಾಯಿಲ್ಲಿ. ಥಂಯ್ಚ್ಯಾನ್ ಪ್ರೇರಿತ್ ಜಾವ್ನ್ ತಾಂಣಿ ಸುಟ್ಕೆಝುಜಾಂತ್ ಉಡಿ ಘೆತ್ಲಿ. ತ್ಯಾಚ್ ದಿಸಾ ತಾಂಣಿ ಮರಾಠಿಂತ್ಲ್ಯಾನ್ ‘ತ್ರಿವಾರ್ ಮಂಗಲ್ವಾರ್’ ಹಿ ಕವಿತಾ ರಚ್ಲಿ ಆನಿ ದುಸ್ರ್ಯಾ ದಿಸಾ ತಿಚೆಂ ಆಪೂಣ್ ಶಿಕಯ್ತಾಲೊ ತೆ ಕೆಪೆಂಚೆ ಶಾಳೆಂತ್ ತಿಚೆಂ ಜಾಹೀರ್ ವಾಚನ್ ಕೆಲೆಂ. ಹಿ ಕವಿತಾ ಆಯ್ಕೂನ್ ಕುಶಿಚ್ಯಾ ವರ್ಗಾಂತ್ ಶಿಕೊವ್ಪಿ ಎಕಾ ಪುರ್ತುಗೇಜ್ ಶಿಕ್ಷಾಕಾನ್ ಯೇವ್ನ್ ಬಾಕಿಬಾಬಾಕ್ ಧಮ್ಕಾಯ್ಲೊ ಲೆಗಿತ್. ಪುಣ್ ಬಾಕಿಬಾಬ್ ತಾಕಾ ಬದ್ಲೊ ನಾ. ತ್ಯಾಚ್ ದಿಸಾ ತಾಂಣಿ ಆಪ್ಲ್ಯಾ ಭಾವೊಜಿಕ್, ಗುಂಡು ಆಮೋಣ್ಕಾರಾಕ್, ಚೀಟ್ ಬರಯ್ಲಿ, ‘ದೇಶ್ಭಕ್ತ್ ಲೋಹಿಯಾಂ ಸಾರ್ಕ್ಯಾ ಮ್ಹಾನ್ ಫುಡಾರ್ಯಾಂ ವರ್ವಿಂ ಕಾಲ್ ಮಡ್ಗಾಂವಾಂ ಸುಟ್ಕೆ ಝುಜಾಚೊ ಮುಹೂರ್ತ್ ಜಾಲೊ... ತಾಂಚೆ ಫಾಟೋಫಾಟ್ ಆಮ್ಚೆ ಣವ್-ಧಾ ಕಾರ್ಯೆಕರ್ತೆ ಬಂದ್ಖಣೀಂತ್ ಗೆಲೆ.. ಸಭೆಕ್ ಸುಮಾರ್ ತೀನ್ ಹಜಾರಾಂ ವಯ್ರ್ ಲೊಕಾಂಚಿ ಗರ್ದಿ ಲಾಬ್ಲಿ.. ನೋಕ್ರಿ ಸೊಡ್ಲೆ ಶಿವಾಯ್ ಮ್ಹಾಕಾ ಹ್ಯಾ ಕಾರ್ಯಾಂತ್ ಪಡಪ್ ನೈತಿಕ್ ನದ್ರೆನ್ ಯೋಗ್ಯ್ ದಿಸನಾ. ಮ್ಹಣುನ್ ಸಗ್ಳೆ ಧೊಕೆ ಪತ್ಕರೂನ್ ಆನಿ ಮುಖಾಲ್ಲಿ ಜೀಣ್ ದೇಶಾಖಾತೀರ್ ಖರ್ಚ್ ಥಾರೊವ್ನ್ ಹಾಂವ್ ಫಾಲ್ಯಾಂಚ್ ಮ್ಹಜೊ ರಾಜಿನಾಮೊ ಸಾದರ್ ಕರ್ಪಾಚೊ ಆಸಾಂ.... ಸುಟ್ಕೆ ಝುಜಾಕ್ ಆರಂಭ್ ಜಾಲಾ.. ಆತಾಂ ಆಘಾತ್ ಸಹನ್ ಕರ್ಪಾಕ್ ಆನಿ ಸರ್ವಸ್ವ್ ಪಣಾಕ್ ಲಾವ್ಪಾಕ್ ತಯಾರ್ ರಾಂವ್ಚೆಂ ಪಡ್ತಲೆಂ. ಹೊ ನಿರ್ಣಯ್ ಹಾಂವೆಂ ಪುರಾಯ್ ವಿಚಾರ್ ಕರೂನಚ್ ಘೆತ್ಲಾ. ಭಾವನೆಚ್ಯಾ ಭರಾಂತ್ ಘೆಂವ್ಕ್ ನಾ ಆನಿ ಕೊಣಾಚೆಂಚ್ ಚೆಂಪಣ್ ಯೆವ್ಪಾಕ್ ಸಂದ್ ಉರ್ಚಿ ನ್ಹಯ್ ಮ್ಹಣೊನ್ ತೊ ರೊಕ್ಡ್ಯಾನ್ ರೊಕ್ಡೊ ಜಾಹಿರೂಯ್ ಕೆಲಾ.. ಜಯ್ ಹಿಂದ್, ತುಜೋಚ್ ಬಾಕಿ. ಗೊಂಯ್ಚ್ಯಾ ಇತಿಹಾಸಾಂತ್ 19 ದಶೆಂಬರಾ ಇತ್ಲೆಂಚ್ 18 ಜ್ಯೂನಾಕ್ ಮಹತ್ವ್ ಆಸಾ. 18 ಜ್ಯೂನಾಕ್ ಲಾಗುನಚ್ ಆಮ್ಕಾಂ 19 ದಶೆಂಬರ್ ಮೆಳೊಂಕ್ ಪಾವ್ಲೊ. ಹೆ ಪಯ್ಲೆ ವಯ್ಲೆ ಕ್ರಾಂತಿ ಕೀಟಿಚಿ ಗಜಾಲ್ ಬಾಕಿಬಾಬಾನ್ ಆಪ್ಲ್ಯಾ ಕವನಾಂತ್ಲ್ಯಾನ್ ಮಾಡ್ಲಿ.
‘ಮಹಾತ್ಮಾ ಗಾಂಧಿ ಆಯ್ಲೊ ರೆ
ಗೊಂಯಾಂತ್ ಆಮ್ಚ್ಯಾ ಪಾವ್ಲೊ ರೆ
ಲೋಹಿಯಾನ್ ಹಾಡ್ಲೊ ಬಾವ್ಟೊ ತಾಚೊ
ಮಡ್ಗಾಂವ್ ಶಾರಾಂತ್ ಲಾಯ್ಲೊ ರೆ’
ಹೆಂ ಕವನ್ ಉಪ್ರಾಂತ್ ಲೊಕಾಂಚೆ ಜಿಬೆರ್ ಘೊಳ್ಳೆಂ ಆನಿ ‘ಕ್ರಾಂತಿ-ಕವನ್’ ಜಾಂವ್ಕ್ ಪಾವ್ಲೆಂ. ತಾಂಚಿ ‘ಪಾಂಯ್ಜಣಾಂ’ತ್ಲಿ ‘ಪವಿತ್ರ್ ಹೊ ಮಂಗ್ಳಾರ್’ ಹಿ ಕವಿತಾಯ್ ಹ್ಯಾಚ್ ದಿಸಾಕ್ ಧರುನ್ ಘಡ್ಲಿ.
ಪವಿತ್ರ್ ಹೊ ಮಂಗ್ಳಾರ್ ಆಯ್ಚೊ ಪವಿತ್ರ್ ಹೊ ಮಂಗ್ಳಾರ್
ಆಜ್ ಗಾಜ್ತಲೊ ಧೆಂಕ್ ಶಿಂವಾಚೊ ಹಾಂಗಾಚ್ ಹ್ಯಾ ಮ್ಹೂರ್ತಾರ್
... ಯಾ ವಾರ್ಯಾಂನೊ ಫುಲಯಾ ಆಮ್ಚ್ಯಾ ಕಾಳ್ಜಾಂತ್ಲೆ ಇಂಗ್ಳೆ
... ಹಿಚೆಚ್ ಆಮಿ ಪೂತ್ ಹಿಚ್ಯಾಸ್ತಂವ್ ದೀಂವ್ ರಗ್ತಾಚಿ ಧಾರ್
... ದಿಪಾ ರಾಣ್ಯಾಚೆಂ ನಿ ಪಿಂತಾಂಚೆಂ ಘೆವ್ನ್ ವ್ಹಡ್ ನಾಂವ್
ಘಾಲುನ್ ಬೊಟಾ ಘಾವ್ ಚಲಾ ರೆ ನವೆ ತಿಳೆ ಲಾಂವ್
(ಪವಿತ್ರ್ ಹೊ ಮಂಗ್ಳ್ರಾರ್, ಪಾಂಯ್ಜಣಾಂ)
ಕವಿ ಹಾಂಗಾ ದಿಪಾಜಿ ರಾಣೆ ಆನಿ ಪಿಂಟೊಚ್ಯಾ ಬಂಡಾಚಿ ಯಾದ್ ಕರುನ್ ದಿತಾ ಆನಿ ತೆ ಪರಂಪರೆಕ್ ಧರುನ್ ಕಪಲಾರ್ ‘ರಗ್ತಾಚೆ ತಿಳೆ’ ಲಾವ್ನ್ ಪರ್ತುನ್ ಎಕ್ದಾಂ ಝುಜ್ಪಾಚಿ ತಯಾರಿ ದಾಖಯ್ತಾ. ಗೊಂಯ್ ಮುಕ್ತಿ-ಚಳುವಳಿ ವೆಳಾರ್ ಆಮ್ಚಿ (ಗೊಂಯ್ಚಿ) ಲೋಕ್ಸಂಖ್ಯಾ ಆಶಿಲ್ಲಿ ಸಾತ್ ಲಾಖ್. ಹ್ಯಾ ಸಾತ್ ಲಾಖ್ ಲೊಕಾಂಚೊ ಆವಾಜ್ ಜಾವ್ನ್ ಬಾಕಿಬಾಬ್ ಉಲಯ್ತಾಲೆ. ತೆ ನಿಖ್ಟೆ ಉಲೊಂವ್ಕ್ ನಾತ್ ತರ್ ತಾಂಣಿ ಫುಡಾರಾಚ್ಯಾ ನವ್ಯಾ ಯುಗಾಚೊ ಹಾವೆಸ್ ಮನಾಂತ್ ಬಾಳ್ಗುನ್ ‘ಜೊ ಕಿತೆಂ ಅನ್ಯಾಯ್ ಚಲ್ಲಾ’ ತಾಚೊ ವಿರೋಧ್ ಕೆಲೊ. ತಾಂಣಿ ಬರಯ್ಲೆಂ,
ಸಾತ್ ಲಾಖ್ ಗೊಂಯ್ಕಾರ್ ಆಮಿ, ಯುಗ್ ನವೆಂ ಫುಲಯ್ತಲೆ
ಅಂದ್ಲ್ಯಾಂತ್ ಮಂತ್ರ್ ಜಿವಿಂ,ತೆ ಫಾಲ್ಯಾಂ ಉಲಯ್ತಲೆ
...ಝೊಮುನ್ ಘೆಂವ್ಕ್ ವಯ್ಲಿ ಘುಡಿ
ಹೊಮ್ಖಣಾಂತ್ ಆಮ್ಚಿ ಉಡಿ
ಮಾಣ್ಸುಕೆಚ್ಯಾ ಫಾಯ್ಚ್ಯಾ ಜಿಣೆನ್ ದೆವಾಂಕಯ್ ಭಾಳೈತಲೆ.
(ನವೆಂ ಯುಗ್, ಪಾಂಯ್ಜಣಾಂ)
ಗೊಂಯಾಂತ್ ತೆನ್ನಾಂ ‘ಜಯ್ ಹಿಂದ್’ ಅಶಿಂ ಉತ್ರಾಂ ಉಚಾರ್ಲ್ಯಾರ್ ಪಸುನ್ ಬಂದ್ಖಣ್ ಫಾವೊ ಜಾತಾಲಿ. ಹಿಂದುಸ್ತಾನ್ ಆನಿ ಗೊಂಯ್ ವೆಗ್ಳಿಂ ಉರಿಲ್ಲಿಂ. ಸಾಡೆಚಾರ್ಶಿಂ ವರ್ಸಾಂ ಆಪ್ಲೊ ಶೆಕ್ ಚಲೊವ್ನ್ ಭಾರತಾಪಾಸುನ್ ವೆಗ್ಳೆ ದವರಿಲ್ಲ್ಯಾನ್ ತಾಂಚೊ ಆರ್ತ್ ಸ್ವರ್ ದೇಶ್ ಭಾವಾಂಕ್ ಸಾದ್ ಘಾಲುಂಕ್ ಲಾಗ್ಲೊ ಆನಿ ತೆಂ ಕರ್ತಾನಾಂಚ್ ಪ್ರಾಣೂಯ್ ದಿವ್ಪಾಚಿ ತಯಾರಿ ದಾಖಯ್ಲಿ.
ಜಾಗ್ ರೆ ಬೆಗಿಂ ಜಾಗ್
ಭಾರತಾಚ್ಯಾ ಧ್ವಜ್ಯಾ ಮ್ಹಜ್ಯಾ, ಜಾಗ್ ರೆ ಬೆಗಿಂ ಜಾಗ್
ದರ್ಯಾವೆಳೆರ್ ಖಂಗ್ತಾ ತುಜಿ ಸೊಬಿತ್ ಏಕ್ ಬಾಗ್
ವ್ಹಂಕ್ಲೊ ಕಶ್ಯೊ ಮಾಡ್ಯೊ ಥಂಯ್ಚ್ಯೊ ಖಾಂಬ್ಲೆ ಕಶೆ ಮಾಡ್
ಚಾರ್ಶಿಂ ವರ್ಸಾಂ ಲಾಗುನ್ ಪಾಖೆ ಜಾಂವ್ಕ್ ಲಾಗ್ಲೆ ಪಾಡ್
.. ಆಂತ್ ಆತಾಂ ಪಳೊಂವ್ ನಾಕಾ ಮಾರ್ ರೆ ಬೆಗಿಂ ದಾಂಗ್
ತೆ ಖಾತೀರ್ ಉಖ್ಲಾಸಾಕ್ ಪ್ರಾಣೂಯ್ ಜಾಲ್ಯಾರ್ ಮಾಗ್
(ಧ್ವಜಾಚಿ ಜಾಗ್ವಣ್, ಪಾಂಯ್ಜಣಾಂ)
(ಆನಿಕಯ್ ಆಸಾ...)
ಬಾಕಿಬಾಬಾಚ್ಯೊ ಕವಿತಾ:
| 
