ಕೆನಡಾಂತ್ ಮಜೆದಾರ್ ಪೆರಿಸ್ ನಾಯ್ಟ್
ಕೊಂಕ್ಣಿ ಸಂಗೀತ್ಕ್ಷೇತ್ರಾಂತ್ ಫಾಮಾದ್ ಕೊಂಕ್ಣಿ ಪದಾಂ ರಚ್ಪಿ/ಗಾವ್ಪಿ ಆನಿಂ ಅಪ್ಲ್ಯಾ ಮಧುರ್ ಆವಾಜಾನ್ ಉಂಚ್ಲಿಂ ಪದಾಂ ಸಂಗೀತ್ ಪ್ರೇಮಿಂಚ್ಯಾ ಕಾಳ್ಜಾಂಚ್ಯಾ ತಡಿಕ್ ಆಪ್ಟಾವ್ನ್ ಅಖ್ಖ್ಯಾ ಕೊಂಕ್ಣಿ ಸಂಸಾರಾಂತ್ ಫಾಮಾದ್ ಜಾಲ್ಲೊ, ಕೊಂಕ್ಣಿ ಸಂಗೀತಾಚೆಂ ಪರ್ಜಳಿಕ್ ನಕ್ತಿರ್, ‘ಯೊಡ್ಲಿಂಗ್ ರಾಯ್’ ತಶೆಂ ‘ಕೊಂಕ್ಣಿ ಕಲಾರತ್ನ್’ ನಾಮಾಂಕಿತ್ ಮೆಲ್ವಿನ್ ಪೆರಿಸ್ ಚರಿತ್ರೆಂತ್ ಪಯಿಲ್ಲೆ ಪಾವ್ಟಿಂ ಮಾಯ್ಗಾಂವಾಂ ಥಾವ್ನ್ 7,500 ಮೈಲಾಂ ಪಯ್ಸಿಲ್ಯಾ ಬಡ್ಗಾ ಅಮೇರಿಕಾಂತ್ಲ್ಯಾ ಕೆನಡಾಕ್ ಪಾವೊನ್ ಥೈಂಚಾ ಕೊಂಕ್ಣಿ ಕಲಾ-ರಸಿಕಾಂಕ್ ಆಪ್ಲ್ಯಾ ಹಾಸ್ತ್ಯಾ-ಉಡ್ತ್ಯಾ ಪದಾನಿಂ ಸಂಗೀತ್ ಆಕಾಸಾರ್ ಧಲಂವ್ಕ್ ಪಾವ್ಲೊ.
ಬಡ್ಗಾ ಅಮೇರಿಕಾಂತ್ ಊಂಚ್ಲಿಂ ಕೊಂಕ್ಣಿ ಕಾರ್ಯಿಂ ಮಾಂಡುನ್ ಹಾಡ್ಚ್ಯಾ ‘ಕೆನರಾ ವರ್ಲ್ಡ್ ಫೌಂಡೇಶನ್’ ಸಂಸ್ಥ್ಯಾನ್ ಕೆನಡಾಂತ್ಲ್ಯಾ ಮಿಸ್ಸಿಸ್ಸಾಗಾ ಶ್ಹೆರಾಂತ್ ವರ್ಸಾವಾರ್ ಸಾದರ್ ಕರ್ಚ್ಯಾ ‘ಕೆನರಾ ಕಲಾ ಸಾಂಜ್’ ಕಾರ್ಯವಳಿಂತ್ ಆಪ್ಲಿ ‘ಪೆರಿಸ್ ನಾಯ್ಟ್’ ಸಂಗೀತ್ ಸಾಂಜ್ ಸಾದರ್ ಕರುಂಕ್ ಮಾಯ್ಗಾಂವಾ ಥಾವ್ನ್ ಕೆನಡಾಕ್ ಪಾವ್ಲ್ಲೊ ಮೆಲ್ವಿನ್ ಪೆರಿಸ್ ಕೆನಡಾಂತ್ ಪ್ರಪ್ರಥಮ್ ಜಾವ್ನ್ "ವಿಲ್ಫಿ ನಾಯ್ಟ್’ ಸಾದರ್ ಕೆಲ್ಲೊ ಕೊಂಕ್ಣಿ ಸಂಗೀತ್ ರಾಯ್ ಕೊಂಕಣ್ ಕೊಗುಳ್ ಅಮರ್ ವಿಲ್ಫಿ ರೆಬಿಂಬಸ್, ದುಸ್ರ್ಯಾನ್ ಕೊಂಕಣ್ ಕಲಾಶ್ರೀ ಕ್ಲೋಡ್ ಡಿಸೊಜಾ, ತಿಸ್ರ್ಯಾನ್ ಸಂಗೀತ್ ಸಾಮ್ರಾಟ್ ಹೆನ್ರಿ ಡಿ’ಸೊಜಾ ಉಪ್ರಾಂತ್ಲೊ ಕೊಂಕ್ಣಿ ಸಂಗೀತ್ ಕಲಾಕಾರ್ ಜಾವುನ್ ಧಾಕ್ಲೊ ರಚುಂಕ್ ಪಾವ್ಲೊ.
ಹೆಂ ಚಾರಿತ್ರಿಕ್ ಕಾರ್ಯೆಂ ಕೆನಡಾಂತ್ಲ್ಯಾ ಮಿಸ್ಸಿಸ್ಸಾಗಾ ಶ್ಹೆರಾಂತ್ ನಾಮ್ಣೆಚೆಂ ಸಾಲ್ ’ಮೆಡೊವಿಲ್ ಥಿಯೆಟರ್’ ಹಾಂತು ಸನ್ವಾರಾ ಜುಲಾಯ್ 10 ವೆರ್ ಸಾದರ್ ಜಾಲೆಂ. ಕೆನಡಾಂತ್ಲೊ ಫಾಮಾದ್ ವ್ಹೆಪಾರಿ ಸಂಸ್ಥೊ ’ಮ್ಯಾಕ್ಸ್ ಮೆಂಡಿಸ್ ಗ್ರೂಪ್’ ಹ್ಯಾ ಕಾರ್ಯಾಚೊ ಪ್ರಮುಖ್ ಪೋಶಕ್. ಹ್ಯಾಚ್ ಸಂಸ್ಥ್ಯಾಚ್ಯಾ ಗುರ್ಕಾರ್ಪಣಾಖಾಲ್ 2005 ಇಸ್ವೆಂತ್ ಸಾದರ್ ಜಾಲ್ಲಿ ’ವಿಲ್ಫಿ ನಾಯ್ಟ್, 2008 ೦ತ್ ‘ಕ್ಲೊಡ್ ನಾಯ್ಟ್’ ಆನಿಂ 2009 ೦ತ್ ‘ಹೆನ್ರಿ ನಾಯ್ಟ್’ ಬಡ್ಗಾ ಅಮೇರಿಕಾಚ್ಯಾ ಚರಿತ್ರೆಂತ್ ಅಮರ್ ಉರ್ಚ್ಯಾ ತಸಲಿಂ ಕೊಂಕ್ಣಿ ಕಾರ್ಯಿಂ. ಸಂಗೀತ್ ಪ್ರೇಮಿನಿಂ ಸಬಾರ್ ತೇಂಪ್ ಥಾವ್ನ್ ಆತುರಾಯೆನ್ ರಾಕೊನ್ ಆಸ್ಲೆಲಿ ಹಿ ಸಂಗೀತ್ ಕಾರ್ಯವಳ್ ದೊನ್ಪಾರಾಂ 1:30 ವರಾರ್ ಭಾರತಾಚ್ಯಾ ತಸೆಂಚ್ ಕೆನಡಾಚ್ಯಾ ರಾಷ್ಟ್ರ್ ಗಿತಾಂ ಸವೆಂ ಸುರ್ವಾತ್ಲಿ. ಕೆನಡಾಂತ್ಲೊ ಫಾಮಾದ್ ಕೊಂಕ್ಣಿ ಕಾರ್ಬಾರಿ, ಕಲಾಸಾಂಜ್ ಕಾರ್ಯಾಕಾರಿ ಸಮಿತಿಚೊ ಪಾಟಿಚೊ ಕಣೊ ತಸೆಂಚ್ ಪೋಶಕ್ ಮಾನೇಸ್ತ್ ಫ್ಲೇವಿಯನ್ ಪಿಂಟೊ ಹಾಣೆಂ ಸಭಿಕಾಂಕ್ ಮಾನಾಚೊ ಯೆವ್ಕಾರ್ ಮಾಗೊನ್ ‘ಯೊಡ್ಲಿಂಗ್ ರಾಯ್’ ಮೆಲ್ವಿನ್ ಪೆರಿಸ್ ಹಾಚಿ ವಳೊಕ್ ಕರುನ್ ದಿಲಿ.
ಆಪ್ಲ್ಯಾ ಕೆನಡಾಂತ್ಲ್ಯಾ ಪ್ರಪ್ರಥಮ್ ಭೆಟೆಚಿ ಕಾಣಿಕ್ ಜಾವ್ನ್ ಮೆಲ್ವಿನ್ ಪೆರಿಸಾನ್ ನವ್ಯಾನ್ ಘಡ್ಲ್ಲೆಂ "ಕೆನಡಾಂತ್ ಕೊಂಕ್ಣಿ ಕಲಾಕಾರಾಂ" ಪದಾ ಸವೆಂ ಪದಾಂ ಸಾಂಜ್ ಸುರ್ವಾತ್ಲಿ. ತಾಣೆಂ ಗಾಯ್ಲೆಲಿಂ ’ಜೇನ್’, ’ಸೊಭಿತ್ ಚಲಿ’, ’ಸೊರೊ ಖಂಯ್ಚೊ?’, ’ಮ್ಹಾತಾರೊ ಘೊವ್’, ’ಏಕ್ ಫ್ರೀ’ ತಸಲ್ಯಾ ಹಾಸ್ತ್ಯಾ ಉಡ್ತ್ಯಾ ಪದಾನಿಂ ಸಾಲ್ಭರ್ ಹಾಜರ್ ಆಸ್ಲ್ಲ್ಯಾ ಲೊಕಾಕ್ ಸಂಗೀತ್ ಆಕಾಸಾರ್ ಧಲಯ್ಲೆಂ. ಗೆಲ್ಯಾ ಎಪ್ರಿಲಾಂತ್ ದೆವಾಧಿನ್ ಜಾಲ್ಲೊ ಆಧುನಿಕ್ ಕೊಂಕ್ಣಿ ಸಂಗೀತಾಚೊ ಬಾಪಯ್ ಕೊಂಕಣ್ ಕೊಗುಣ್ ವಿಲ್ಫಿ ರೆಬಿಂಬಸ್ ಹಾಚೊ ಉಡಾಸ್ ಕಾಡುನ್ ಊಂಚ್ಲ್ಯಾ ಸೊಲ್ಫಾನಿಂ ಗುಂತುನ್ ’ತೊ ತಾಳೊ ಆನಿ ನಾ’ ಮ್ಹಳ್ಳೆಂ ಪದ್ ಆಪ್ಲ್ಯಾ ಮಧುರ್ ಆವಾಜಾನ್ ಮೆಲ್ವಿನಾನ್ ಗಾಯ್ತಾನಾ ಸಾಲ್-ಭರ್ ಆಸ್ಲ್ಲ್ಯಾ ಸಭಿಕಾಂಚ್ಯಾ ದೊಳ್ಯಾ-ಖಾಂಚಿನಿಂ ದುಕಾಂ ಝರಿ ಉದೆಲ್ಯೊ. ಮೆಲ್ವಿನ್ ಪೆರಿಸಾ ಸವೆಂ ಕೆನಡಾಂತ್ಲೆ ಫಾಮಾದ್ ಗಾವ್ಪಿಗಾವ್ಪಿಣ್ಯೊ - ಲಾರಾ ರೆಬೆಲ್ಲೊ, ಸೊನಿಯಾ ಮೊಂತೆರೊ, ಮನೊರಾ ಪಾಯ್ಸ್, ವಿಲ್ಸನ್ ಡಿಸೊಜಾ, ಲೊರೆನ್ಸ್ ಪಿಂಟೊ ಆನಿ ಜೆರಿ ಡಿಮೆಲ್ಲೊ ಹಾಂಣಿ ಸಾಂಗಾತ್ ದಿಲೊ. ಕೆನಡಾಂತ್ಲೊ ಎ.ಆರ್.ರೆಹಮಾನ್ ಮ್ಹಣೊನ್ ನಾಂವಾಡ್ಲಲೊ ತಾಲೆಂತ್ವಂತ್ ಸಂಗೀತ್ಗಾರ್ ಜೊಯ್ಸನ್ ಡಿಸೊಜಾ ಹಾಚ್ಯಾ ಅದ್ಬುತ್ ಸಂಗೀತ್ ದಿಗ್ದರ್ಶನಾನ್ ತಸೆಂಚ್ ಕೆನಡಾಂತ್ಲೆ ಫಾಮಾದ್ ಕ್ಯಾಶುವಲ್ ಎನ್ಕೌಂಟರ್ಸ್ ಹಾಂಚ್ಯಾ ಮಧುರ್ ಸಂಗೀತಾನ್ ಕಾರ್ಯಾಚಿ ಸೊಭಾಯ್ ತಿದೊಡಿ ಜಾಲಿ.
ಸಾಲ್ಭರ್ ಆಸ್ಲ್ಲ್ಯಾ ಕೆನಡಾಂತ್ಲ್ಯಾ ಕಲಾರಸಿಕಾನಿಂ ಮೆಲ್ವಿನಾಚ್ಯಾ ಊಂಚ್ಲ್ಯಾ ಪದಾಂ ಮದ್ಗಾತ್ ಕೆನಡಾಂತ್ಲ್ಯಾ ಲ್ಹಾನ್-ವ್ಹಡ್, ಉದೆತ್ಯಾ ತಸೆಂಚ್ ಫಾಮಾದ್ ಕಲಾಕಾರಾನಿಂ ಸಾದರ್ ಕೆಲ್ಲ್ಯಾ ಸಂಗೀತ್ ನಾಚ್ ಆನಿಂ ಫೊಕಣಾಂಚಿ ರೂಚ್ ಚಾಕ್ಲಿ. ’ಕೆನಡಾಂತ್ಲೊ ಡೊಲ್ಲಾ’ ಖ್ಯಾತೆಚ್ಯಾ ಫ್ಲೇವಿಯನ್ ಪಿಂಟೊಚ್ಯಾ ಸಾಂಗಾತಾಚ್ ಬಾಪ್ ಹೆನ್ರಿ ಆಳ್ವಾ ಹಾಂಚ್ಯಾ ಮುಕೇಲ್ಪಣಾಖಾಲ್ ಸಾದರ್ ಜಾಲ್ಲ್ಯಾ ಫೊಕಾಣಾನಿಂ ಸಭಿಕಾಂಚ್ಯಾ ಕುಸಾಳಾಂನಿ ದೂಖ್ ಹಾಡಯ್ಲಿ. ಹ್ಯಾ ಫೊಕಾಣಾಂನಿ ನ್ಯಾನ್ಸಿ ಮೆಂಡಿಸ್, ಮ್ಯಾಕ್ಸ್ ಮೆಂಡಿಸ್, ವಿಲ್ಸನ್ ಡಿಸೊಜಾ, ರೊನಾಲ್ಡ್ ಮೊಂತೆರೊ, ಪ್ರೆಸಿಲ್ಲಾ ಡಿಸೊಜಾ ಹಾಂಣಿ ಪಾತ್ರ್ ಘೆತ್ಲ್ಲೊ. ಸಂಗೀತ್ ನಾಚಾಂನಿ ವಾಂಟೊ ಘೆತ್ಲ್ಲ್ಯಾ ಕ್ರಿಸ್ಟಲ್ ಲೋಬೊ, ಒಲಿವರ್ ಮತಾಯಸ್, ವಿನಿಶಾ-ಕ್ಲೆರಿಸ್ಸಾ ಡಿಸೊಜಾ, ಸಾಮಾಂತಾ-ಸವಾನ್ನಾ ಗೋವಿಯಸ್, ಮೆಲ್ಡನ್-ಮೇಗನ್ ಪಿರೇರಾ, ಭಾವನಾ-ಸಿಡ್ ಪಿರೇರಾ, ಕ್ಲೆಮೆಂಟಿನಾ-ಲೊರೆಂಟಿನಾ ಡಿಸೊಜಾ, ಜೊಯ್ಲಿನ್ ಪಿಂಟೊ, ನತಾಷಾ ಡಿಸೊಜಾ, ಲಾರ್ಸೆನ್-ಲೊಯ್ಡ್ ಪಿಂಟೊ, ನಿಶಾಂತ್ ಡಿಮೆಲ್ಲೊ ಆನಿ ಪಿಸ್ಟನ್ ಕೆನ್ ಮೊಂತೆರೊ ಹಾಣಿಂ ಆಪ್ಲ್ಯಾ ಊಂಚ್ಲ್ಯಾ ನಾಚಾಂನಿಂ ಲೊಕಾಕ್ ಉತ್ತೀಮ್ ಮನೋರಂಜನ್ ದಿಲೆಂ.
ಪಾಟ್ಲ್ಯಾ ತೀನ್ ಧಾಕ್ಡ್ಯಾಂ ಥಾವ್ನ್ ಆಪ್ಲಿ ನಿಸ್ವಾರ್ಥ್ ಸೆವಾ ದೀವ್ನ್ ಆಸ್ಚೊ ಕೆನಡಾಂತ್ಲ್ಯಾ ಕೊಂಕ್ಣಿ ಸಮಾಜೆಚೊ ಆತ್ಮೀಕ್ ದಿರೆಕ್ತೊರ್ ತಸೆಂಚ್ ಮಿಸ್ಸಿಸ್ಸಾಗಾಂತ್ಲ್ಯಾ ಮಾರ್ತಾ ಆನಿ ಮರಿಯೆಕ್ ಸಮರ್ಪಿಲ್ಲ್ಯಾ ಫಿರ್ಗಜೆ ವಿಗಾರ್ ಮಂಗ್ಳುರ್ಗಾರ್ (ಮೂಡ್ಬೆಳ್ಳೆ) ಬಾಪ್ ಎಡ್ವಿನ್ ಡಿಸೊಜಾಕ್ "ಕಮ್ಯೂನಿಟಿ ಲೀಡರ್ ಎವಾರ್ಡ್’ ಪ್ರಶಸ್ತಿ ಮಾನೇಸ್ತ್ ಪೌಲ್ ಮತಾಯಸ್ ಹಾಣೆಂ ಅರ್ಪಿಲಿ. ಹೆಂ ವೆದಿ ಕಾರ್ಯೆಂ ಮಾನೆಸ್ತಿಣ್ ಮಿರಿಯಮ್ ಪಿಂಟೊ ಹಿಣೆಂ ಅಪುರ್ಬಾಯೆನ್ ಚಲವ್ನ್ ವ್ಹೆಲೆಂ ಸಾಂಗಾತಾಚ್ ಬಾಪ್ ಎಡ್ವಿನಾಚಿ ವಳಕ್ ಮಟ್ವ್ಯಾನ್ ಕರುನ್ ದಿಲಿ.
ಕೆನರಾ ವರ್ಲ್ದ್ ಫೌಂಡೇಶನ್ ಹಾಣಿಂ ಗೆಲ್ಯಾ ವರ್ಸಾ ಸುರ್ವಾತಿಲ್ಲ್ಯಾ ‘ಹೆನ್ರಿ ಆನಿ ರೋಜ್ ಕ್ಯಾಸ್ತೆಲಿನೊ ಎಕ್ಸಲ್ಲೆನ್ಸ್ ಇನ್ ಎಜುಕೇಶನ್ ಎವಾರ್ಡ್’ ಪ್ರಶಸ್ತಿ ಆಪ್ಣಾಯ್ಲೆಲ್ಯಾ ಎರೊನ್ ಪಿಂಟೊ ಆನಿ ಆನಿಶ್ಕಾ ಸಲ್ಡಾನಾ ಹಾಂಕಾ ಐರಿನ್ ಮತಾಯಸ್ ಆನಿ ಇಂಗ್ರೆಡ್ ಪಿರೇರಾ ಹಾಣಿಂ ಸನ್ಮಾನ್ ಕೆಲೊ. ಹೆಂ ವೆದಿ ಕಾರ್ಯೆಂ ಸೇಂಡ್ರಾ ಆಳ್ವಾ ಹಿಣೆಂ ಚಲವ್ನ್ ವ್ಹೆಲೆಂ.
ಮಾನೆಸ್ತಿಣ್ ನ್ಯಾನ್ಸಿ ಮೆಂಡಿಸ್ ಹಿಣೆಂ ಚಲವ್ನ್ ವೆಲ್ಲ್ಯಾ ವೆದಿ ಕಾರ್ಯಾಂತ್ ಕೆನರಾ ವರ್ಲ್ಡ್ ಫೌಂಡೇಶನ್ ತರ್ಫೆನ್ ಅದ್ಯಕ್ಶ್ ಮ್ಯಾಕ್ಸ್ ಮೆಂಡಿಸ್ ಹಾಣೆಂ ಉಂಚ್ಲೊ ಕೊಂಕ್ಣಿ ಸಂಗೀತ್ ಕಲಾಕಾರ್ ಯೊಡ್ಲಿಂಗ್ ರಾಯ್ ಮೆಲ್ವಿನ್ ಪೆರಿಸ್ ಹಾಕಾ ಯಾದಿಸ್ಥಿಕಾ ಅರ್ಪುನ್ "ಕೊಂಕ್ಣಿ ಕಲಾ ಸಂಕೇತ್" ಮ್ಹಳ್ಳೆಂ ಬಿರುದ್ ದೀವ್ನ್ ಮಾನ್ ಕೆಲೊ. ಮೆಲ್ವಿನ್ ಪೆರಿಸಾನ್ ಆಪ್ಲ್ಯಾ ಉಲವ್ಪಾಂತ್ ಹೆಂ ಆಪ್ಲ್ಯಾ ಸಂಗೀತ್ ಜಿವಿತಾಂತ್ಲೆಂ ಏಕ್ ಮಹತ್ತರ್ ಘಡಿತ್ ಮ್ಹಣೊನ್ ಆಪ್ಲೊ ಸಂತೊಸ್ ವೆಕ್ತ್ ಕೆಲೊ. ಕೆನಡಾಂತ್ ಆಪ್ಲಿ ಸಂಗೀತ್ ಸಾಂಜ್ ಸಾದರ್ ಕರುಂಕ್ ಆವ್ಕಾಸ್ ಲಾಬಯಿಲ್ಲ್ಯಾ ಕೆನರಾ ವರ್ಲ್ದ್ ಫೌಂಡೇಶನ್ ಅಧ್ಯಕ್ಸ್ ಮ್ಯಾಕ್ಸ್ ಮೆಂಡಿಸ್, ಫ್ಲೇವಿಯನ್ ಪಿಂಟೊ ಆನಿ ತಾಚ್ಯಾ ಸಾಂಗಾಂಚ್ಯಾಂಚೊ ತಸೆಂಚ್ ಆಪ್ಣಾ ಸವೆಂ ತಾಳೊ-ಸಂಗೀತ್ ದಿಲ್ಲ್ಯಾ ಕಲಾಕರಾಂಚೊ ತಾಣಿಂ ಉಪ್ಕಾರ್ ಆಟಯ್ಲೊ.
ಕೊಂಕ್ಣಿ ಮಾಂಚಿಯೆರ್ ಹಾಸ್ಯಾಂಚೆ ಬೋಂಬ್ ಫುಟವ್ನ್ ಕೊಂಕ್ಣಿ ಸಂಸಾರಾಂತ್ ಆಪ್ಲೆಂಚ್ ಏಕ್ ಸ್ಥಾನ್ ಆಪ್ಣಾಂವ್ಕ್ ಸಕ್ಲ್ಲೊ ಕೊಂಕ್ಣಿ ಹಾಸ್ಯಾಂಚೊ ರಾಯ್ ’ಡೊಲ್ಲಾ’ ಖ್ಯಾತೆಚೊ ಅವಿತಾಸ್ ಎಡೊಲ್ಫಸ್ ಕುಟಿನ್ಹೊ ಹಾಕಾ ತಾಣೆಂ ದಿಲ್ಲ್ಯಾ ಅದ್ಬುತ್ ದೇಣ್ಗೇ ಖಾತಿರ್ ’ಕೆನರಾ ಕಲಾ ಸಂಕೇತ್ ಲೈಫ್ ಟೈಮ್ ಎಚೀವ್ಮೆಂಟ್ ಎವಾರ್ಡ್’ ಮಾನೆಸ್ತ್ ಮಾರ್ಟಿನ್ ಮಿನೇಜಸ್ ಹಾಣೆಂ ಅರ್ಪಿಲ್ಲಿ ಪ್ರಶಸ್ತಿ ಡೊಲ್ಲಾ ತರ್ಫೆನ್ ಕೆನಡಾಂತ್ಲೊ ಡೊಲ್ಲಾ ಫ್ಲೇವಿಯನ್ ಪಿಂಟೊ ಹಾಣೆಂ ಸ್ವೀಕಾರ್ ಕೆಲಿ.
ಕಾರ್ಯಾಚೆ ಅಕ್ರೇಕ್ ಕೆನರಾ ವರ್ಲ್ದ್ ಫೌಂಡೇಶನ್ ಅಧ್ಯಕ್ಶ್ ಮಾನೇಸ್ತ್ ಮ್ಯಾಕ್ಸ್ ಮೆಂಡಿಸಾನ್ ಕಾರ್ಯೆಂ ಯಶ್ ಕರುಂಕ್ ವಾವುರ್ಲೆಲ್ಯಾ ಸರ್ವಾಂಚೊ ಅಭಾರ್ ಮಾಂದ್ಲೊ. ಅಖ್ಖೆಂ ಸಂಗೀತ್ ಕಾರ್ಯೆಂ ಕೆನಡಾಂತ್ ನಾಮ್ಣೆಚೊ ಕಾರ್ಯಾಸುತಾರಿ ಮಾನೇಸ್ತ್ ಡೊನಾಲ್ದ್ ಆಳ್ವಾ ಹಾಣೆಂ ಆಪ್ಲ್ಯಾ ಕುರ್ಕುರಿತ್ ಉತ್ರಾಂನಿ ಆನಿ ವಿಶಿಶ್ಟ್ ಶೈಲೆನ್ ಚಲವ್ನ್ ವ್ಹೆಲೆಂ. ನಿಮಾಣೆಂ ಯೊಡ್ಲಿಂಗ್ ರಾಯ್ ಮೆಲ್ವಿನ್ ಪೆರಿಸ್ ಆನಿಂ ಸಾಂಗಾತ್ಯಾಂನಿ ಗಾಯ್ಲೆಲೆಂ ‘ಹೆಂ ಮಂಗ್ಳುರ್’ ಪದ್ ಸರ್ವಾಂಚಿ ಮನಾಂ ಸಂತೊಸಾಂವ್ಕ್ ಪಾವ್ಲೆಂ.
ಕೆನರಾ ವರ್ಲ್ದ್ ಫೌಂಡೇಶನ್ ಹಾಣಿಂ ಕೆನಡಾಂತ್ ಮಾಂಡುನ್ ಹಾಡ್ಲೆಲೆಂ ‘ಯೊಡ್ಲಿಂಗ್ ರಾಯ್ ಮೆಲ್ವಿನ್ ಪೆರಿಸ್’ ಹಾಚೆಂ ಸಂಗೀತ್ ಕಾರ್ಯೆಂ ಚರಿತ್ರೆಂತ್ ಯಾದ್ಗಾರ್ ಜಾವ್ನ್ ಉರ್ತೆಲೆಂ ತೆಂ ಖಂಡಿತ್.
ಭಾತ್ಮಿ: ಜೆರಿ ಡಿಮೆಲ್ಲೊ, ಬೆಂದುರ್