ಸಾಹಿತ್ಯಾ ಖಾತೀರ್ ನೋಬೆಲ್ ಪ್ರಶಸ್ತಿ ಜೊಡಲ್ಲಿ ಪೋಲೆಂಡಾಚಿ ಕವಯಿತ್ರಿ ವಿಸ್ವಾವಾ ಶಿಂಬೊರ್ಸ್ಕಾ ಆನಿ ನಾ.
ಸಾಹಿತ್ಯಾ ಖಾತೀರ್ ನೋಬೆಲ್ ಪ್ರಶಸ್ತಿ ಆಪ್ಣಾಯಿಲ್ಲಿ ಪೋಲಿಶ್ ಕವಯಿತ್ರಿ ವಿಸ್ವಾವಾ ಶಿಂಬೊರ್ಸ್ಕಾ ಆಪ್ಲೆ 88 ವರ್ಸಾಂ ಪ್ರಾಯೆರ್, ಫೆಬ್ರೆರ್ 1 ತಾರ್ಕೆರ್ ಬುದ್ವಾರಾ ಕ್ರಾಕೋವಾಂತ್ಲ್ಯಾ ಆಪ್ಲ್ಯಾ ಘರಾ ಪೊಪ್ಸಾಚ್ಯಾ ಕೆನ್ಸರಾನ್ ಅಂತರ್ಲಿ. ವಿಸ್ವಾವಾ ಶಿಂಬೊರ್ಸ್ಕಾ ಸಿಗ್ರೆಟ್ ವೊಡ್ಚ್ಯಾಂತ್ ಆಕೇರ್ ಪಾಸುನ್ ಖಾಡುಂ ಘಾಲುಂಕ್ ಪಾವ್ಲಿನಾ.
ಪಾಟ್ಲ್ಯಾ ಪಾಂಚ್ ದಶಕಾಂಚ್ಯಾ ಕಾವ್ಯಜಿವಿತಾಂತ್, ಪೋಲಿಶ್ ಕವಯಿತ್ರಿ ವಿಸ್ವಾವಾ ಶಿಂಬೊರ್ಸ್ಕಾ ಬೋವ್ ಅಪ್ರೂಪ್ ಪರ್ಗಟ್ ಕಾರ್ಯಾಂನಿ ಮೆತೆರ್ ಜಾತಾಲಿ ಜಾಲ್ಲ್ಯಾನ್ ಎಕಾ ಪತ್ರಾನ್ ತಿಕಾ (ಬೆ)ನಾಂವಾಡ್ದಿಕ್ ನಟಿ ಗ್ರೆಟಾ ಗಾರ್ಬೊ ಮ್ಹಣೊನ್ ಆಪಯಿಲ್ಲೆಂ.
ಪುಣ್ 1996 ವ್ಯಾ ವರ್ಸಾ ತಿಕಾ ಸಂಸಾರಾಕ್ ಆಪ್ಣಾಚೆಂ ದಾರ್ ಉಗ್ತೆಂ ಕರ್ಚೆಂ ಪಡ್ಲೆಂ. ಸಾಹಿತ್ಯಾ ಖಾತೀರ್ ತ್ಯಾ ವರ್ಸಾ ತಿಕಾ ನೋಬೆಲ್ ಪುರಸ್ಕಾರ್ ಲಾಭಲ್ಲೊ ಆನಿ ಸಂಸಾರ್ ತಿಚೆ ಪ್ರತಿಕ್ರಿಯೆ ಖಾತೀರ್ ಲಾಲೆವ್ನ್ ಆಸಲ್ಲೊ.
ಲೊಕಾಚಿ ದಾಢ್ ಇತ್ಲಿ ಜಾಲಿಕಿ, ದೋನ್ ವರ್ಸಾಂ ಪರ್ಯಾಂತ್ ತಿಕಾ ಕಿತೆಂಚ್ ಬರೊಂವ್ಕ್ ಜಾಲೆಂನಾ. ಹ್ಯಾ ದುರಂತಾಕ್ ತಿಣೆ `ಸ್ಟೊಕ್ಹೊಮ್ ದುರಂತ್' ಮ್ಹಣೊನ್ ಎಕಾ ಸಂದರ್ಭಾರ್ ವೊಲಾಯಿಲ್ಲೆಂ.
ತಿ ಇತ್ಲಿ ಸಲೀಸಾಯೆನ್ ಕವಿತಾ ಬರಯ್ತಾಲಿ ಕಿ, ಸ್ವೀಡಿಶ್ ಎಕಾಡೆಮಿನ್ ನೋಬೆಲ್ ಪ್ರಶಸ್ತಿ ದಿಂವ್ಚ್ಯಾ ಸಂದರ್ಭಾರ್ ಮೊಝಾರ್ಟಾಚಿ ಸೃಜನಾತ್ಮಕ್ ಸಲೀಸಾಯ್ ತಶೆಂ ಬಿಥೊವಾನಾಚಿ ಉಚಾಂಬಳಾಯ್ ತಿಚ್ಯಾ ಕಾವ್ಯಾಂತ್ ದೆಖ್ಯೆತ್ ಅಶೆಂ ಸಾಂಗಲ್ಲೆಂ.
ಪೋಲೆಂಡಾಚೊ ಅಧ್ಯಕ್ಷ್ ಬ್ರೊನಿಸ್ಲಾವ್ ಕೊಮೊರೊವಸ್ಕಿನ್ ತಿಕಾ ಪೋಲೆಂಡಾಚೊ ರಾಕಣ್ ಭಡ್ವೊ ಮ್ಹಣೊನ್ ಆಪಯ್ಲಾಂ. ತಿಕಾ ಜಾಯ್ತೆ ಈಷ್ಟ್ ಆಸಲ್ಲೆ. 1980 ವರ್ಸಾ ಸಾಹಿತ್ಯಾ ಖಾತೀರ್ ನೋಬೆಲ್ ಜೊಡಲ್ಲೊ ಪೋಲಿಶ್ ಕವಿ ಝೆಸ್ಲಾವ್ ಮಿಲೋಝ್ ತಶೆಂ ಫಿಲ್ಮ್ ನಿರ್ಮಾಪಕ್ ವೂಡಿ ಎಲೆನ್ ಹ್ಯಾ ಪಯ್ಕಿ ಪ್ರಮುಖ್. ತಿಚೆಂ View Witha a Grain of Sand ಪುಸ್ತಕ್ 1995 ವರ್ಸಾ ಇಂಗ್ಲಿಷಾಂತ್ ಪರ್ಗಟ್ ಜಾಲ್ಯಾ ಉಪ್ರಾಂತ್ ಸಂಸಾರ್ಭರ್ ತಿಚ್ಯೊ ಕವಿತಾ ಲೊಕಾಂನಿ ಆಸ್ವಾದನ್ ಕೆಲ್ಯೊ.
ವೂಡಿ ಎಲೆನಾನ್ ತಿಚೆವಿಶಿಂ ಏಕ್ ಡೊಕ್ಯುಮೆಂಟರಿ ಸೈತ್ ನಿರ್ಮಾಣ್ ಕೆಲಾಂ. ಹೆ ಡೊಕ್ಯುಮೆಂಟರಿಚೆಂ ನಾಂವ್ Sometimes Life is Bearable.