ಸಂಪಾದಕೀಯ್:
ಪಂಚೇಂದ್ರಿಯಾಂ ಉಗ್ತಿಂ ದವರ್ಲ್ಯಾರ್ ಸೃಜನಾತ್ಮಕ್ ಸಕತ್ ಬಳ್ವಂತ್ ಜಾತಾ
ಆದ್ಲ್ಯಾ ವರ್ಸಾ ಆಮಿ ಆಸಾ ಕೆಲ್ಲ್ಯಾ ಅಖಿಲ್ ಭಾರತೀಯ್ ಭುರ್ಗ್ಯಾಂಚ್ಯಾ ಕವಿತಾ ಸ್ಪರ್ಧ್ಯಾಂತ್ ತಿಸ್ರೆಂ ಇನಾಮ್ ಫಾವೊ ಜಾಲ್ಲಿ ಕವಿತಾ ಹಾಂಗಾಸರ್ ಆಮಿ ಪರ್ಗಟ್ ಕೆಲ್ಯಾ. ಪ್ರಜೋತಿ ಶಿರೋಡ್ಕಾರ್ ಗೊಂಯ್ಚ್ಯಾ ಪಿಲೆರ್ನಾಂತ್ಲ್ಯಾ ಚಬ್ಬೀ ಚೀಕ್ಸ್ ಸ್ಪ್ರಿಂಗ್ ವ್ಯಾಲಿ ಹೈಸ್ಕುಲಾಂತ್ ಶಿಕ್ಚೆಂ ವಿದ್ಯಾರ್ಥಿಣ್. ಆಪ್ಣೆಂ ಸದಾಂ ಚಲ್ಚೆ ಪಾಂಯ್ ವಾಟೆವಿಶಿಂ ತಿ ಲಿಖ್ತಾ ಆನಿ ವಾಟೆ ಭೊಂವ್ತಣಿಚ್ಯೊ ಕಾಂಯ್ ಬರ್ಯೊ ಗಜಾಲಿ ಹೆ ಕವಿತೆಂತ್ ದಿಪ್ಕಾಯ್ತಾ.
ನಿಳ್ಯೊ ಝರಿ, ಪಾಚ್ವಿಂ ಝಾಡಾಂ, ಶೀತಳ್ ವಾರೆಂ, ವಾಟೆರ್ ಬಾಗ್ವಲ್ಲೆ ವಾಶೆ, ಲ್ಹಾನ್ ವಹ್ಡ್ ದೊಂಗರ್ - ಸಗ್ಳೆ ಹೆ ವಾಟೆರ್ ವೆತಾಂ ವೆತಾಂ ಪಳೆಂವ್ಕ್ ಭೊಗುಂಕ್ ಮೆಳ್ತಾತ್ ತರ್, ಪ್ರಜೋತಿನ್ ಆಪ್ಲಿಂ ಇಂದ್ರಿಯಾಂ ಸಗ್ಳಿಂ ಉಗ್ತಿಂ ದವರ್ಲ್ಯಾಂತ್ ಆನಿ ತ್ಯಾವರ್ವಿಂ ತಾಚಿ ಸೃಜನಾತ್ಮಕ್ ಸಕತ್ ಇತ್ಲೆ ಲ್ಹಾನ್ ಪ್ರಾಯೆರಚ್ ಬಳ್ ಜೊಡುನ್ ಯೆತಾ ಮ್ಹಳ್ಳೆಂ ಖರೆಂ ಜಾತಾ.
ಆಮಿ ಆದ್ಲ್ಯಾ ವರ್ಸಾ ಹೊ ಕವಿತಾ ಸ್ಪರ್ಧೊ ಸುರು ಕೆಲ್ಲೊ. ಭಾಗ್ ಘೆತಲ್ಲ್ಯಾ ಸರ್ವಯ್ ಭುರ್ಗ್ಯಾಂಕ್ ಸರ್ಟಿಫಿಕೆಟ್ಯೊ ತಶೆಂ ಜಿಕಲ್ಲ್ಯಾಂಕ್ ಇನಾಮಾಂ ಆಮಿ ಧಾಡುನ್ ದಿಲ್ಯಾಂತ್. ಹ್ಯಾ ವರ್ಸಾ ಸಪ್ಟೆಂಬರ್ ಮ್ಹಯ್ನ್ಯಾಂತ್ ಪರ್ತ್ಯಾನ್ ಹೊ ಸ್ಪರ್ಧೊ ಆಮಿ ಜಾಹೀರ್ ಕರ್ತಾಂವ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮ್ಹಜ್ಯಾ ಗಾಂವ್ಚಿ ವಾಟ್
ಲ್ಹಾನ್ ವ್ಹಡ್ ದೊಂಗ್ರಾ ಮಧ್ಲ್ಯಾನ್ ಸರ್ಲ್ಯಾ ಹಿ ವಾಟ್
ವಾಂಕ್ಡಿಂ ತಿಂಕ್ಡಿಂ ವಳಣಾ ಮೊಡೀತ್ ಪಾರ್ ಕರೀತ್ ಘಾಟ್
ವ್ಹಡ್ ವ್ಹಡ್ ಆಡ್ವಿಂ ತಿಡ್ವಿಂ ಆಯ್ಲ್ಯಾಂ ಝಾಡಾಂ ದಾಟ್
ಕಾಂಯ್ ಬರಿ ಸೊಭಿತ್ ಮ್ಹಜ್ಯಾ ಗಾಂವ್ಚಿ ವಾಟ್
ದೋನ್ಯ್ ದೆಗೆನ್ ಟೆಂಕ್ಡ್ಯೊ ಉಬ್ಯೊ ದಾಖಯ್ತ್ ಆಪ್ಲಿ ಪಾಠ್
ನಿಳ್ಯಾ ನಿಳ್ಯಾ ಝರ್ಯಾಂನಿ ಮಾರ್ಲ್ಯಾ ತಾಂಚೆರ್ ಪಾಟ್
ಪಾಂಚ್ವ್ಯಾ ಪಾಂಚ್ವ್ಯಾ ಝಾಡಾಂನಿ ದಿಲಾ ತಾಂಕಾಂ ಸಾಥ್
ಕಾಂಯ್ ಬರಿ ಸೊಭಿತ್ ಮ್ಹಜ್ಯಾ ಗಾಂವ್ಚಿ ವಾಟ್
ಥಂಡ್ ಶೀತಳ್ ವಾರೆಂ ವ್ಹಾಂವ್ತಾ ಸದ್ದ್ಯಾ ಥಂಯ್ ಸಪಾಟ್
ಕೆನ್ನಾಂಯ್ ಮನೀಸ್ ಥಕ್ಚೊ ನಾ ವರ್ಸಾಚೊ ಲೆಗೀತ್ ಸಾಟ್
ಅಭಿಮಾನ್ ಮ್ಹಾಕಾ ಆಸಾ ತಿಚೊ ಸಾಂಗ್ತಾಂ ಹಾಂವ್ ತಾಟ್
ಕಾಂಯ್ ಬರಿ ಸೊಭಿತ್ ಮ್ಹಜ್ಯಾ ಗಾಂವ್ಚಿ ವಾಟ್
-ಪ್ರಜೋತಿ ಶಿರೋಡ್ಕಾರ್