ಕವಿತಾ:

ಮೊಡ್ಕ್ಯೊ

                         ಮೊಡ್ಕ್ಯೊ ಚಡ್ತಾವ್
                         ದೋನ್ ಪಾವ್ಟಿಂ ತಾಪ್ತಾತ್.

                         ಪಯ್ಲೆಂ-
                         ಧುವ್ನ್ ಆಂಗ್ಣಾಂತ್ ಸುಕ್ತಾನಾ
                         ದುಸ್ರೆಂ-
                         ರಾಂದ್ಣಿರ್ ಆದಾನ್ ಚಡ್ತಾನಾ

                         ಹ್ಯಾ ದೊನಾಂಇ ಮಧೆಂ
                         ಫರಕ್ ಬರ್‍ಪೂರ್

                         ಪಯ್ಲ್ಯಾಂತ್ ಮೊಡ್ಕ್ಯೊ
                         ವೊಮ್ತ್ಯೊ, ರಿತ್ಯೊ
                         ಪುಣ್ ದುಸ್ರ್ಯಾಂತ್
                         ಉದಾರ್‍ಯೊ, ಭರ್‌ಲ್ಲ್ಯೊ

                         ಪಯ್ಲ್ಯಾಂತ್ ತಾಪ್ತಾತ್ ವೊತಾಕ್
                         ಆನಿ ದುಸ್ರ್ಯಾಂತ್ ಉಜ್ಯಾಕ್
                         ಹಾಂಗಾಸರ್,

                         ಉಕಡ್ಟಾ, ಶಿಜ್ತಾ, ಖತ್ಕತ್ತಾ
                         ತಾಂದುಳ್ ಆಸ್‍ಲ್ಲೊ ಪೇಜ್ ಜಾತಾ
                         ಉದಕ್ ಆಸ್‍ಲ್ಲೆಂ ನೀಸ್ ಜಾತಾ

                         ಧಾಂಪ್ಲ್ಯಾರಯಿ ಥಾಲಿ ಲೊಟುನ್
                         ಉಮಾಳೊ ಭಾಯ್ರ್ ವ್ಹಾಳ್ಟಾ
                         ಮೊಡ್ಕ್ಯೊ ಲಾಸೊನ್ ಲಾಸೊನ್ ಭಿಜ್ತಾತ್
                         ಪುಣ್ ಪಯ್ಲ್ಯಾಂತ್ ಫಕತ್ ಸುಕ್ತಾತ್.

                         ಆತಾಂ ತರಯಿ ಕಳ್ಳೆಂ ಆಸ್ತಲೆಂ-

                         ಭಿತರ್
                         ಉಜೊ ಪೆಟ್ಲ್ಯಾ ಶಿವಾಯ್
                         ಭಾಯ್ಲ್ಯಾ
                         ವೊತಾ ಭ್ರಮಿದೆಂತ್ ಕೆನ್ನಾಂಯ್...

                         ಪೇಜ್ ಶಿಜನಾ.

-ವಿಲ್ಸನ್, ಕಟೀಲ್