ಸಂಪಾದಕೀಯ್:
ಹಿ ಕವಿತಾ ನವ್ಯಾ ಎಕಾ ಧರ್ಮಾಕ್ ಜಲ್ಮ್ ದಿತಾ
ಆಮಿ ಮೊಗಾನ್ ತೊವ್ಲ್ಲ್ಯೊ ಕವಿತಾ ವಾಚುನ್ಚ್ ಆಯ್ಲ್ಯಾಂವ್. ಆಮಿ ಝುಜಾನ್ ವ್ಹಾರಯಿಲ್ಲ್ಯಾ ರಗ್ತಾನ್ ಮಾಖ್ಲ್ಲ್ಯೊ ಕವಿತಾ ವಾಚುನ್ಚ್ ಆಯ್ಲ್ಯಾಂವ್. ಆಮಿ ಸಂಬಂಧಾಂಚಿಂ ಕುಸಾಂ ಪಿಂತ್ರಾಂವ್ಚ್ಯೊ ಕವಿತಾ ಚಾಕೊನ್ಚ್ ಆಯ್ಲ್ಯಾಂವ್. ಆತಾಂ ಹಿ ಕವಿತಾ ಧರ್ಮಾಚ್ಯಾ ಅಸ್ತಿತ್ವಾಚೆರಚ್ ಸವಾಲ್ ಉಡೊವ್ನ್ ಮ್ಹಳ್ಳೆಬರಿ ಹಾಂಗಾಸರ್ ಉಬಿ ಜಾಲ್ಯಾ. ಪಯ್ಲೆ ಪಾವ್ಟಿಂ ಕವಿತಾ ಕುಳಾರಾಚಿ ಭೆಟ್ ಕರ್ಚ್ಯಾ ಕವಿ ನೆಲ್ಸ್ ಬಾರ್ಕುರಾಚೆಂ ಹೆಂ ಧೈರ್, ಹೆಂ ವೆಗ್ಳೆಪಣ್ ಹ್ಯಾ ಎಕಾ ಕಾರಣಾ ಖಾತೀರ್ ಉಟೊನ್ ದಿಸ್ತಾ.
ದರೆಕಾ ಧರ್ಮಾಂನಿ ಮನ್ಶಾಕುಳಾಕ್ ಬಾಂಧುನ್ ಧರಲ್ಲ್ಯೊ ಬಳ್ವಂತ್ ಸಾಂಕ್ಳ್ಯೊ ಥೊಡ್ಯಾಚ್ ಉತ್ರಾಂನಿ ಹಿ ಕವಿತಾ ಅಸ್ಕತ್ ಕರ್ನ್ ಸೊಡ್ತಾ. ಆಯ್ಚಿ ಕರಾಳ್ ನಿಜಾಯ್ ದೊಳ್ಯಾಂ ಫುಡೆಂ ದವರ್ನ್ ಸಾಂಕ್ಳಿಂಚೆ ಎಕೇಕ್ ಗಾಂಚ್ ತುಟೊನ್ ಘಾಲ್ಚೊ ಹೊ ಕವಿ, ಆಪ್ಲೊಚ್ ನವೊ ಧರ್ಮ್ ಹೆ ಕವಿತೆ ಮಾರಿಫಾತ್ ಭುಂಯ್ ಘಾಲ್ತಾ.
ನೆಲ್ಸ್ ಬಾರ್ಕುರಾಚೆ ಸಕ್ತೆಕ್ ಆಮಿ ಸಲಾಮ್ ಮಾರ್ತಾಂವ್. ಫುಡಾರಾಂತ್ಯ್ ಉಂಚಾಯೆಚ್ಯೊ ಕವಿತಾ ತೊ ಆಮ್ಕಾಂ ದಿತಲೊ ಮ್ಹಳ್ಳೊ ಭರ್ವರ್ಸೊ ದವರ್ನ್ ಕವಿತಾ ಕುಳಾರಾಕ್ ತಾಕಾ ಆಮಿ ಯೆವ್ಕಾರ್ ದಿತಾಂವ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ದೇವ್ ಆನಿ ಧರ್ಮ್
ಮನ್ಶಾಸೃಷ್ಟಿ...
ಹಂಕಾರಾನ್ ಜಿಡೆಂ ಫುಲಯ್ತಾನಾ
ಎಕಾಮೆಕಾ ರಗ್ತಾಂ-ಮಾಸಾಂ ಶಿಂದುನ್ ಖಾತಾನಾ
ಶಾಂತಿ-ಮಾಯಾಮೋಗ್ ಉಗ್ತ್ಯಾನ್ ಗ್ರಾಶಿತಾನಾಅ
ಕೊಣೆಂಕಿ ಎಕ್ಲ್ಯಾನ್..
ಅದೃಶ್ಯ್ ಸಕ್ತೆಕ್ ಸಂಸಾರಾರ್ ಉಮ್ಕಳಾಯ್ಲೊ
ಆನಿ ತಾಕಾ ದೇವ್ ಮ್ಹಣ್ ವೊಲಾಯ್ಲೊ
ತಾಕಾ ಭಿಂಯೆವ್ನ್....
ಲೊಕಾನ್ ಆಪ್ಲಿ ಚಾಲ್ ಸಾರ್ಕಿ ಕರ್ಚ್ಯಾಕ್
ಶಾಂತ್-ಸಮಾಧಾನ್ ಆಸಾ ಕರ್ಚ್ಯಾಕ್
ಜಶೆಂ ’ಗೊಂಗೊ' ಯೆತಾ ಮ್ಹಣುನ್
ಹಟ್ ಕರ್ಚ್ಯಾ ಭುರ್ಗ್ಯಾಕ್ ಭೆಶ್ಟಾಂವ್ಚ್ಯಾಪರಿಂ
ತಾಚ್ಯಾ ಭಿಂಯಾನ್...
ಲೋಕ್ ಶಿಸ್ತೆಚಿ ಜಿಣಿ ಜಿಯೆಂವ್ಕ್ ಲಾಗ್ಲೊ
ಎಕಾಮೆಕಾಕ್ ಮೊಗಾನ್ ಪಳೆಂವ್ಕ್ ಲಾಗ್ಲೊ
ಮನ್ಶಾಪಣ್ ರೂಪ್ ರೂಪ್ ದಿಸುಂಕ್ ಲಾಗ್ಲೆಂ.
ಜೆನಾಂ ಅದೃಶ್ಯ್ ಸಕ್ತೆಕ್...
ಲೋಕ್ ಹಜಾರ್ ರುಪಾಂ ದಿತಾನಾ
ತಾಚೆರ್ ಜಾಯ್ತ್ಯೊ ರೆಗ್ರೊ ರುಲಿ ಹಾಡ್ತಾನಾ
ಎಕ್ಲ್ಯಾನ್ ದಿಲ್ಲೆಂ ರೂಪ್ ದುಸ್ರ್ಯಾಕ್ ಸೊಭ್ಲೆಂನಾ
ದುಸ್ರ್ಯಾನ್ ಸಾಂಗಲ್ಲೆಂ ತಿಸ್ರ್ಯಾಕ್ ರುಚ್ಲೆಂನಾ
ತೆನ್ನಾಂ...
ಸಂಸಾರಾರ್ ಉಮ್ಕಳಾಯಿಲ್ಲಿ ಅದೃಶ್ಯ್ ಸಕತ್
ಲೊಕಾಜಿಬೆರ್ ನಿಂದೆಕ್ ಬಲಿ ಜಾಲಿ
ಹಾಂಚ್ಯಾ ಝಗ್ಡ್ಯಾನ್ ತಿ ಸಕ್ಲಾ ಪಡೊನ್
ದೇವ್ ಜಾಲೊ ಚುರಾನ್ ಚುರೊ
ಹಿಂದು, ಕ್ರಿಸ್ತಾಂವ್, ಬೌದ್ಧ್, ಮುಸ್ಲಿಮ್
ಅಲ್ಲಾಹ್, ಜೆಜು, ಜೈನ್, ರಾಮ್
ವಿವಿಧ್ ಧರ್ಮಾಚ್ಯೊ ವಿವಿಧ್ ಮೆರೊ
ಎಕೇಕ್ ಧರ್ಮಾಕ್ ಎಕೇಕ್ ಹೀರೊ
ಹರ್ ಧರ್ಮಾಚೊ ಮುಖೆಲ್ ಇರಾದೊ
ಶಾಂತ್-ಸಮಾಧಾನ್ ಮೋಗ್ ಮಯ್ಪಾಸ್
ಎಕಾ ಧರ್ಮಾವರ್ನಿಂ ದುಸ್ರೊ ಶಿಕಯ್ತಾ
ಉಂಚ್ಲಿಂ ನೈತಿಕ್ ಮೊಲಾಂ
ಪುಣ್ ಆಜ್..
ಎಕ್ಲೊ ಆಪ್ಲೆಂ ಬಳ್ ವಾಡೊಂವ್ಚ್ಯಾಕ್ ಧಾಂವ್ತಾ
ದುಸ್ರೊ ತಾಚೊ ಗಳೊ ಚಿಡ್ಡುಂಕ್ ಪೆಚಾಡ್ತಾ
ತಿಸ್ರೊ ದುಸ್ರ್ಯಾಕ್ ಸಾಂಗಾತ್ ಭಾಸಾಯ್ತಾ
ಪರಿಣಾಮ್ ಜಾವ್ನ್...
ಶಾಂತೆಖಾತೀರ್ ಆಯಿಲ್ಲೊ ದೇವ್
ಧರ್ಮಾನ್ ಜಾವ್ನ್ ಚುರೊ
ಅಶಾಂತೆಚೊ ಉಜೊ ವೊಂಕ್ತಾ.
-ನೆಲ್ಸ್ ಬಾರ್ಕುರ್.