ಕವಿತಾ ಟ್ರಸ್ಟಾಚೆಂ ’ಸಾಹಸಿ ಆನಿ ದಯಾಳಿ ಜಿವಿತಾಂ' ಪುಸ್ತಕ್ ಲೋಕಾರ್ಪಣ್
ಕವಿತಾ ಟ್ರಸ್ಟಾನ್ ಆಪ್ಲ್ಯಾ ಕವಿತಾ ಪಬ್ಲಿಕೇಶನ್ಸ್ ದ್ವಾರಿಂ ಪರ್ಗಟ್ ಕೆಲ್ಲೆಂ ಚಾಳಿಸಾವೆಂ ಪುಸ್ತಕ್ ’ಸಾಹಸಿ ಆನಿ ದಯಾಳಿ ಜಿವಿತಾಂ' ಹ್ಯಾಚ್ ಜುಲಾಯ್ 16, 2026 ತಾರಿಕೆರ್ ಮಂಗ್ಳುರ್ಚ್ಯಾ ಎಮ್. ಸಿ. ಸಿ. ಬೆಂಕಾಚ್ಯಾ ಸಭಾಸಾಲಾಂತ್ ಲೋಕಾರ್ಪಣ್ ಜಾಲೆಂ. ಎವ್ರೆಲ್ ರೊಡ್ರಿಗಸ್ ಆನಿ ಮೆಲ್ವಿನ್ ರೊಡ್ರಿಗಸ್ ಹಾಂಣಿ ಸಾಂಗಾತಾ ಮೆಳುನ್ ತರ್ಜಣ್ ಕೆಲ್ಲೆಂ ಹೆಂ ಪುಸ್ತಕ್ ದಾಯ್ಜಿ ದುಬಾಯ್ ಸಂಘಟನಾನ್ ಮಾಂಡುನ್ ಹಾಡಲ್ಲ್ಯಾ ಫ್ರಾನ್ಸಿಸ್ ಫೆರ್ನಾಂಡಿಸ್ ಕಾಸ್ಸಿಯಾ ಅಭಿನಂದನ್ ಕಾರ್ಯಾವಳಿ ವೆಳಾರ್ ಸ್ವತಾ ಫ್ರಾನ್ಸಿಸ್ ಫೆರ್ನಾಂಡಿಸಾಚೆ ಹಸ್ತುಕಿಂ ಮೊಕ್ಳೀಕ್ ಜಾಲೆಂ.
ಹ್ಯಾ ಸಂದರ್ಭಾರ್ ದಾಯ್ಜಿ ದುಬಾಯ್ ಸ್ಥಾಪಕ್ ಸಾಂದೆ ಹೇಮಾಚಾರ್ಯ, ವೊಲ್ಟರ್ ನಂದಳಿಕೆ, ದಾಯ್ಜಿ ಮಂಗ್ಳುರ್ ಘಟಕಾಚೊ ಅಧ್ಯಕ್ಷ್ ಪ್ರವೀಣ್ ತಾವ್ರೊ, ಮುಕೆಲ್ ಸೈರೊ ವಿನ್ಸೆಂಟ್ ಮೆಂಡೊನ್ಸಾ ಕಾಸ್ಸಿಯಾ, ತರ್ಜಣ್ದಾರ್ ಎವ್ರೆಲ್ ರೊಡ್ರಿಗಸ್ ಆನಿ ಮೆಲ್ವಿನ್ ರೊಡ್ರಿಗಸ್, ಫ್ರಾನ್ಸಿಸ್ ಫೆರ್ನಾಂಡಿಸ್ ಕಾಸ್ಸಿಯಾ ಬರಾಬರ್ ವೇದಿರ್ ಹಾಜರ್ ಆಸಲ್ಲೆ.
ಹ್ಯಾ ಸಂದರ್ಭಾರ್ ಆಪ್ಲ್ಯಾ 'ಮ್ಹಾತಾರೊ ಚರ್ಬೆಲಾ’ ನಾಟಕಾಚಿಂ ಶೆಂಭರ್ ಪ್ರದರ್ಶನಾಂ ದಾಕೊವ್ನ್ ದಾಕ್ಲೊ ರಚಲ್ಲ್ಯಾ ಕೊಮೆಡಿ ಕಿಂಗ್ ಫ್ರಾನ್ಸಿಸ್ ಫೆರ್ನಾಂಡಿಸ್ ಕಾಸ್ಸಿಯಾಕ್ ದಾಯ್ಜಿ ದುಬಾಯ್ ಸಂಘಟನಾನ್ ಸನ್ಮಾನ್ ಕೆಲೊ.
’ಸಾಹಸಿ ಆನಿ ದಯಾಳಿ ಜಿವಿತಾಂ’ ಪುಸ್ತಕಾಂತ್ ತೇನ್ಝಿಂಗ್ ನೋರ್ಗೆ ಆನಿ ಫ್ಲೋರೆನ್ಸ್ ನೈಟಿಂಗೇಲಾಚ್ಯೊ ಆತ್ಮಕಥಾ ಇಂಗ್ಲಿಶಾಂತ್ ಆಸಲ್ಲ್ಯೊ ತ್ಯೊ ಕೊಂಕಣಿಂತ್ ವಾಚುಂಕ್ ಮೆಳ್ತಾತ್. ಹ್ಯೊ ದೋನ್ ಆತ್ಮಕಥಾ ರೊಡ್ರಿಗಸ್ ಜೊಡ್ಯಾನ್ ಸುಮಾರ್ ವೀಸ್-ಬಾವೀಸ್ ವರ್ಸಾಂ ಆದಿಂ ತರ್ಜಣ್ ಕೆಲ್ಲ್ಯೊ ಆಸುನ್ ತ್ಯಾ ಸಂದರ್ಭಾರ್ ’ರಾಕ್ಣೊ’ ತಶೆಂ ’ದಿವೊ' ನೆಮಾಳ್ಯಾಂನಿ ಕಿಸ್ತಾಂನಿ ತ್ಯೊ ಪರ್ಗಟ್ ಜಾಲ್ಲ್ಯೊ.
ಕನ್ನಡ ಲಿಪಿಂತ್ ಆಸ್ಚ್ಯಾ ಹ್ಯಾ ಕೊಂಕಣಿ ಪುಸ್ತಕಾಚೆಂ ಮೊಲ್ ರು. 100 ಆಸುನ್, 88 ಪಾನಾಂಚ್ಯಾ ಹ್ಯಾ ಪುಸ್ತಕಾಕ್ ಬೆಂಗ್ಳುರ್ಚ್ಯಾ ಸೌಮ್ಯ ಕಲ್ಯಾಣ್ಕಾರಾನ್ ಮುಕ್ಲ್ಯಾ ಫೊರಾಚೆಂ ಚಿತ್ರ್ ಪಿಂತ್ರಾಯ್ಲಾಂ. ಪುಸ್ತಕ್ ಮಣಿಪಾಲ್ ಪ್ರಿಂಟಿಂಗ್ ಪ್ರೆಸ್ಸಾಂತ್ ಛಾಪ್ಲಾಂ. ಪಾಟ್ಲ್ಯಾ ಫೊರಾಚೆರ್ ಆಂಡ್ರ್ಯೂ ಡಿಕುನ್ಹಾ, ಎಚ್ಚೆಮ್ ಪೆರ್ನಾಳ್, ಕಿಶೂ ಬಾರ್ಕೂರ್, ಶಕುಂತಳಾ ಆರ್ ಕಿಣಿ ಆನಿ ವಿಲಿಯಮ್ ಪಾಯ್ಸ್ ಹಾಂಣಿ ಬರಯಿಲ್ಲೆಂ ಬ್ಲರ್ಬ್ ಆಸಾ.
ಇಂಡಿಯಾ ಭಿತರ್ ಕೊಣಾಕ್ ಹೆಂ ಪುಸ್ತಕ್ ಘೆಂವ್ಕ್ ಮನ್ ಆಸಾ, ತಾಂಣಿ ಹಾಂಗಾ ಸಕಯ್ಲ್ ದಿಲ್ಲ್ಯಾ ಕ್ಯೂಆರ್ ಕೋಡಾಕ್ ರು. 100 ಧಾಡುನ್ 9980136297 ವೊಟ್ಸಪ್ ನಂಬ್ರಾಚೆರ್ ತುಮ್ಚೊ ವಿಳಾಸ್ ಆನಿ ದುಡು ಫಾರೀಕ್ ಕೆಲ್ಲೆವಿಶಿಂ ಸ್ಕ್ರೀನ್-ಶೊಟ್ ಧಾಡ್ಲೊ ಜಾಲ್ಯಾರ್, ಪುಸ್ತಕ್ ತುಮ್ಕಾಂ ಪಾವೀತ್ ಜಾತಲೆಂ.
कविता ट्रस्टाचें ’साहसी आनी दयाळी जिवितां' पुस्तक लोकार्पण
कविता ट्रस्टान आपल्या कविता पब्लीकेशन्स द्वारीं पर्गट केल्लें चाळीसावें पुस्तक ’साहसी आनी दयाळी जिवितां' ह्याच जुलाय 16, 2026 तारकेर मंगळूरच्या एम.सी.सी. बँकाच्या सभासालांत लोकार्पण जालें. एवरेल रोड्रीगस आनी मेल्विन रोड्रीगस हांणी सांगाता मेळून तर्जण केल्लें हें पुस्तक दायजी दुबाय संघटनान मांडून हाडल्ल्या फ्रान्सीस फेर्नांडीस कास्सीया अभिनंदन कार्यावळी वेळार स्वता फ्रान्सीस फेर्नांडिसाचे हस्तुकीं मोकळीक जालें.
ह्या संदर्भार दायजी दुबाय स्थापक सांदे हेमाचार्या, वॉल्टर नंदळिके, दायजी मंगळूर घटकाचो अध्यक्ष प्रवीण तावरो, मुकेल सोयरो विन्सेंट मेंडोन्सा कास्सिया, तर्जणदार एवरेल रोड्रीगस आनी मेल्विन रोड्रीगस, फ्रान्सीस फेर्नांडीस कास्सीया बराबर वेदीर हाजर आसल्ले.
ह्या संदर्भार आपल्या 'म्हातारो चरबेला’ नाटकाचीं शेंभर प्रदर्शनां दाकोवन दाकलो रचल्ल्या कोमेडी किंग फ्रान्सीस फेर्नांडीस कास्सीयाक दायजी दुबाय संघटनान सन्मान केलो.
’साहसी आनी दयाळी जिवितां’ पुस्तकांत तेनझींग नोर्गे आनी फ्लॉरेन्स नैटींगेलाच्यो आत्मकथा इंगलीशींत आसल्ल्यो त्यो कोंकणींत वाचूंक मेळतात. ह्यो दोन आत्मकथा रोड्रीगस जोड्यान सुमार वीस-बावीस वर्सां आदीं तर्जण केल्ल्यो आसून त्या संदर्भार ’राकणो’ तशें ’दिवो' नेमाळ्यांनी किस्तांनी त्यो पर्गट जाल्ल्यो.
कन्नड लिपींत आसच्या ह्या कोंकणी पुस्तकाचें मोल रू. 100 आसून, 88 पानांच्या ह्या पुस्तकाक बेंगळूरच्या सौम्या कल्याणकारान मुकल्या फोराचें चित्र पिंत्रायलां. पुस्तक मणीपाल प्रिंटिंग प्रेस्सांत छापलां. फाटल्या फोराचेर आंड्र्य़ू डिकुन्हा, एच्चेम पेर्नाळ, किशू बार्कूर, शकुंतळा आर किणी आनी विलियम पायस हांणी बरयिल्लें ब्लर्ब आसा.
इंडिया भितर कोणाक हें पुसतक घेवंक मन आसा, तांणी हांगा सकयल दिल्ल्या क्यूआर कोडाक रू. 100 धाडून 9980136297 वॉट्सप नंबराचेर तुमचो विळास आनी दुडू फारीक केल्लेविशीं स्क्रीन-शॉट धाडलो जाल्यार, पुस्तक तुमकां पावीत जातलें.