ಸಂಪಾದಕೀಯ್:
ಧನಾಚೆ ಆಶೆಕ್ ಮಾನಾಚಿಂ ಲಿಲಾಂವಾಂ
ಆಪ್ಲ್ಯಾ ಗಾಂವ್ಚಿ ಕಾಣಿ ಸಾಂಗ್ತಾಂ ಸಾಂಗ್ತಾಂ ಜಾಯ್ತ್ಯೊ ಗಜಾಲಿ ಹಾಂಗಾಚೊ ಮನೀಸ್ ಸಾಂಗುನ್ ವೆತಾ. ಝಗ್ಡ್ಯಾಕ್ ಜಾಂವ್ಚಿಂ ಕಾರಣಾಂ, ಭುರ್ಗ್ಯಾಂನಿ ಘಾಲ್ಚಿಂ ಮೊಡಸ್ತಾನಾಂ, ಫುಡಾರಾಕ್ ಪಾಂವ್ಚ್ಯಾ ಭುರ್ಗ್ಯಾಂನಿ ಆಪ್ಲಯ ಜಲ್ಮ್ ದಾತಾರಾಂಕ್ ದಾಕೊಂವ್ಚಿಂ ಅತರ್ವಣಾಂ, ಮಾಗೀರ್ ನಿಮಾಣೆಂ ಆಮ್ಚ್ಯಾ ಲೊಕಾನ್ ಧನಾಚೆ ಆಶೆಕ್ ಆಮ್ಚ್ಯಾ ಗಾಂವ್ಚಿಂ ಘಾಲ್ಚಿಂ ಲಿಲಾಂವಾಂ ಸಗ್ಳಿಂ ಸೊಭಿತ್ ರಿತಿನ್ ಹಾಂಗಾಸರ್ ಭಾಯ್ರ್ ಪಡ್ಲ್ಯಾಂತ್.
ವಿನ್ಸಿ ಆಂಜೆಲೊರಾಚಿ ಹಿ ಕಾಂಯ್ ಪರ್ನಿ ಕವಿತಾ ಕೊಣ್ಣಾ. ಆಯ್ಚ್ಯಾ ಕಾಳಾರ್ ತಾಚ್ಯೊ ಕವಿತಾ ಧರ್ತೆಚೆ ಮಾತಿಯೆಚೊ ಗೂಣ್ ಪಾರ್ಕುಂಕ್ ಸಕ್ಲ್ಯಾತ್ ಮ್ಹಳ್ಳೆಂ ಕಳ್ತಾ ತರೀ ಹೆ ಕವಿತೆಂತ್ ತಸಲಿಂ ಆಜ್ಯಾಪಾಂ ಝಳ್ಕನಾಂತ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮ್ಹಜ್ಯಾ ಗಾಂವಾಂತ್
ಲಾಂಬ್ ಗಲ್ಲಿ, ಹಾಂತ್ಲಿಂ ಮನ್ಶಾಂ ಜೀವ್ ಆಸುನ್ ಮೆಲ್ಲಿಂ
ಹಾಂತ್ಲಿ ಗಜಾಲ್, ಮಿಸ್ತೆರಾಭರಿತ್ ಸವಾಲ್
ಜಿಣೆಂ ದಿಲ್ಲೆ ಗಲ್ಲೆಂತ್, ಲಿಸಾಂವಾಂ ಜಾಯ್ತಿಂ.
ಬೊಸ್ತುಚೊ ಶೆರ್ಮಾಂವ್, ಇನಾಸಾಚೆಂ ತೆಂತೆಸಾಂವ್,
ಜಿಲ್ಲಿಚಿ ಜೀವ್, ಮಾಗ್ಗಿಚಿ ಊಬ್,
ಇಂತ್ರುಚೊ ಸೊರೊ, ದೊಚ್ಚುಚೊ ದೊರೊ
ಸರ್ವ್ ಕಾರಣ್, ಪಾಜುಂಕ್ ಕೊಯ್ತಿ.
ಮುನ್ನಾಚಿ ಗಾಡಿ, ಮಿಲ್ಲಿಚಿ ಪಾಡಿ
ಧಲೊಂಕ್ ಹಿಂದ್ಳೊ, ಬರೊಂವ್ಕ್ ಇಂಗ್ಳೊ
ವಿವಿಧ್ ಖೆಳ್, ಘಾಲುಂಕ್ ಮೇಳ್,
ವಾಡ್ಯಾಚಿಂ ಭುರ್ಗಿಂ, ಖೆಳೊಂಕ್ ಸದಾಂ ಆಯ್ತಿಂ.
ಭುರ್ಗಿಂ ವಾಡ್ಲಿಂ, ಸಾಂಗಾತಾ ಲಜ್ ಚಡ್ಲಿ
ಸಂಸಾರ್ ಸೊಧುನ್ ಉಬೊಂಕ್ ಲಾಗ್ಲಿಂ
ತರ್ನೆ ಮನಿಸ್, ಜಾಲೆ ಪರ್ನೆ
ಎಕ್ಸುರ್ಯಾ ಘರಾಂತ್, ಉರ್ಲಿ ಆವಯ್ ತಿ.
ಮೊಡುನ್ ಘರಾಂ ಸಾದಿಂ, ಬಾಂದ್ಪಾಂ ಉಬಿಂ
ನವ್ಯಾ ಗುಡಾಂತ್ ಪರ್ಕಿ ತೊಂಡಾಂ
ಉಲೊಂವ್ಕ್ ಕಳನಾ, ಶೆಜಾರಿ ವಳ್ಖನಾ
ಪೊರ್ಬು ಜಾಗ್ಯಾರ್, ಬಾಂಗ್ ದಿತಾತ್ ನಾಯ್ತಿ.
-ವಿನ್ಸಿ ಪಿಂಟೊ, ಆಂಜೆಲೊರ್