ಕವಿತಾ:

ಜನೆಲ್

ಘರ್‍ಚೆಂ ಜನೆಲ್ ದಾರಾ ತೆದೆಂ
ವ್ಹಡ್ ಕಾಂಯ್ ನಯ್ , ಪೂಣ್ . . .

ದಾರಾಂತ್ಲ್ಯಾನ್ ಪಳೆಂವ್ಕ್ ಜಾಯ್ನಾತ್ಲೆಂ
ಜನೆಲಾಂತ್ಲ್ಯಾನ್ ಮಾತ್ ಪಳೆವ್ಯೆತ್
ದಾರಾಂತ್ಲ್ಯಾನ್ ಯೇಂವ್ಕ್ ಜಾಯ್ನಾತ್ಲ್ಯಾನ್
ಜನೆಲಾಂತ್ಲ್ಯಾನ್ ಭಿತರ್ ರಿಗ್‌ಯೆತ್

ದಾರ್ ಸಯ್ರ್ಯಾಂಚೆಂ , ಜನೆಲ್ ಚೊರಾಂಚೆಂ
ತರ್‌ಇ ದಾರಾರ್ ಚಾಬ್ಕೊರ್ ಸುಣೆಂ
ಜನೆಲಾರ್ ಸೊಭಿತ್ ಮಾಜಾರ್

ದಾರ್ ಘೊವಾಚೆಂ
ಜನೆಲ್ ಪ್ರೇಮಿಚೆಂ

ದೆಕುನ್ ಮಿಸ್ತಾ -

ಎಕಾ ಘರಾಕ್ ದಾರ್ ಏಕ್
ಜನೆಲಾಂ ಮಾತ್ ಸಬಾರ್.

-ಎಚ್ಚೆಮ್ ಪೆರ್ನಾಲ್