ಕವಿತಾ:

ಬ್ರೇಕಿಂಗ್ ನ್ಯೂಸ್

ನಿರಂತರ ಬದಲ್ತ, ರಾಬ್ತಾಚಿ ಚ್ಯಾನೆಲ್
ಬ್ರೇಕಿಂಗ್ ನ್ಯೂಸಾ ಖಾತೀರ್

ಭಗ್ನ ಪ್ರೇಮಿನ್ ಮಾರ್ಗಾ ಮಧ್ಯೆ ಆಡ್ ರಾಬ್ಬುನು
ಏಸಿಡ್ ರಕಯಿಲೆ ಚೆಲ್ಲಿಯೆಲೆ ಭೀಭತ್ಸ ತೋಂಡ್,
ಧೂವ್ರೊ ವೊಂಕ್ಚೆ ಒಬೆರೊಯ್, ತಾಜ್ ಥಾವ್ನು
ಚುಕ್ಕೋವ್ನು ವಾಂಚುನು ವರ್ಲೆಲ್ಯಾಲೆ
ಭಾಜ್ಜುನು, ಕರ್ಪುನು ಗೆಲ್ಲೆಲೆ ಹಾತ್ ಪಾಯ,
ಉಕ್ತೆ ಬೋರ್ ವೆಲ್ಲಾ ಭಿತ್ತರಿ ಪಳ್ಳಲೆ ಚೆರ್ಡಾ ಖಾತೀರ್
ಆಕಾಶ್ ಪಾತಾಳ್ ಏಕ್ ಕೋರ್ನು ರೊಡ್ಚೆ ಆವ್ಸು
ರಿಯಾಲಿಟಿ ಶೋ ಥಾವ್ನು ಭಾಯ್ರಿ ಪಳ್ಳೆಲೆ
ಚೆರ್ಡಾಲೆ ದೊಳ್ಯಾಥಾವ್ನು ದೆಂವ್ಚೆ ದುಕಾ ಥೆಂಬೆ!
ಖಂಚೆಯೀ ದೀವ್ಚಾ ಸಕನಾ ಲೆಕ್ಕಿಲಿತ್ಲೆ ಥ್ರಿಲ್!
ಪರತ್ ಪರತ್ ಬದಲ್ತ ರಾಬ್ತಾಚಿ ಚ್ಯಾನೆಲ್
ಆನಿ ನವೇ ಏಕ್ ಬ್ರೇಕಿಂಗ್ ನ್ಯೂಸಾ ಖಾತೀರ್.
ಅರೇ, ಪಳೆ ಥಂಯ್, ಆತಂಕವಾದೀಲೆ ಬೋಂಬಾನ್
ಸ್ಫೋಟ ಜಾಲ್ಲಾ ರೈಲ್,
ಹೊಳ್ತಾ, ಆಸ್ಸ ರಕ್ತಾಚೆ ವ್ಹಾಳೊ
ವ್ಹಾವ್ನ್ ಹಾಡ್ತಾ ಆಸ್ಸಚಿ ಘಾಯೆಲ್ಲ್ಯಾಂಕ್
ತೋಂಡ್ ಧಾಂಪುನು ನಿದಯಿಲ್ಲ್ಯಾ ಮೊಡ್ಯೇಂಚಿ ಸಾಲ್
ಛೇ, ತಿತ್ಲೆ ಭಿತ್ತರಿ ಯೆವ್ಕಾವೇ, ಪಾಡ್ ಪಳ್ಳೆಲೆ ಏಕ್ ಕಮರ್ಶಿಯಲ್ ಬ್ರೇಕ್!

ಅರೇ, ಅರೇ, ಕಿಡ್ನ್ಯಾಪ್ ಜಾಲ್ಯಾ ಖಂಯ್
ನಾವಾಡ್ದಿಕ್ ಮನ್ಶಾಚಿ ಲ್ಹಾನ್ ಪ್ರಾಯೇಚಿ ಸೊಬಿತ್ ಸುಂದರ್ ಪತಿಣ್
ಕೋಣೆ ಕರ್ನ್ ಆಸುಂಕ್ ಪೂರೊ ಕಿಡ್ನ್ಯಾಪ್?

ಅಳೆ ಆಯ್ಕಾ, ಬ್ರೇಕಿಂಗ್ ನ್ಯೂಸ್
ಕಿಡ್ನ್ಯಾಪ್ ನೈ ಖಂಯ್, ಪ್ರೇಮ್ ಪಲಾಯನ್ ಖಂಯಿಂ
ತಿಜೇ ಪ್ರೇಮಿ ಸಾಂಗಾತಾ ರೆಸಾರ್ಟಾಂತು ಮೆಳ್ಳಿ ಖಂಯಿಂ

ಅರೇ, ಆಯ್ಕಾ ಆನ್ಯೇಕ್ ಬ್ರೇಕಿಂಗ್ ನ್ಯೂಸ್
ತಿಜೇ ಮೊಡೇ ಫ್ಲ್ಯಾಟಾಂತು ಮೆಳ್ಳೆ ಖಂಯಿಂ
ಪಳಯಾ ಟಿ.ವಿ.ರಿ ಆತಾ ತಿಜ್ಜೆ ಮೊರ್ನಾಯಾತ್ರಾ
ದುಕಾ ಗಳೋವ್ನು ರಡ್ತಾ ತಿಜೊ ಪತಿ
ಆಸುಂಕ್ ಪುರೋವೇ ಹಿಂ ಸತಾಚಿಂ ದುಕಾಂ?
ಸಾಳ್ ಧರ್ನ್ ರಡ್ತಾತ್ ನೆಂಟುಲಿ ಭುರ್ಗಿಂ
ಆವಯಿಕ ಪೊಟ್ಲುನು

ಥತ್ತೇರಿ, ತಿತ್ಲೆ ಭಿತರ್ ಯೆವ್ಕಾವೇ ಆನ್ಯೇಕ್ ಕಮರ್ಶಿಯಲ್ ಬ್ರೇಕ್
ದಾಕ್ಕೊವುನಜ್ಜ ಆಶ್ಹಿಲ್ವೇ ತೇ ಮೊರ್ನಾ ಯಾತ್ರಾಚೆ
ಆನಿ ಇತ್ಲೆ ರಂಗಾಳ್ ದೃಶ್?
ನಾಂತರ್ ಯೇಂವ್ಕನಜ್ಜ ಆಶ್ಹಿಲ್ವೇ ಆನಿ ಏಕ್ ಬ್ರೇಕಿಂಗ್ ನ್ಯೂಸ್?
ಸದಾ ರಾಕೊನು ಆಸಾಂವ್ ಬ್ರೇಕಿಂಗ್ ನ್ಯೂಸಾಕ್
ಭುಕ್ಕೆಲೊ ಪೆಟೋ ಮಾಸಾಚೆ ಕುಡ್ಕ್ಯಾಕ್ ಆಶೆಲ್ಲ್ಯಾಬರಿ.

ಓ ಮೊಜೆ ದೇವಾ, ಕೋಣಯಿ ತರಿ ಸಂಶೋಧನ್ ಕರ್‍ಯೆತಗೀ
ಆಪ್ಣಾಚೇಛ್ ಮೊರ್ನಾಯಾತ್ರಾ
ಬ್ರೇಕಿಂಗ್ ನ್ಯೂಸ್ ಜಾವ್ನ್ ಟಿ.ವಿ. ರಿ ಯೆವ್ಚೆಬರಿ
ಆನಿ ಮುಜೆ ಭುರ್ಗಿಂ ಬಾಳಾಂ ತೆಂ ಪಳೋವ್ನು
ದುಕಾಂ ಗಳೊವ್ಚೆಬರಿ
ಆನಿ ಹಾಂವತ್ತ ತೇ ದೃಶ್ಯ್ ಪೊಳೋವ್ಚೆಬರಿ
ಆನಿ ಹಾಂವತ್ತ ತೇ ದೃಶ್ಯ್ ಪೊಳೋವ್ಚೆಬರಿ

-ಶಕುಂತಲಾ ಆರ್. ಕಿಣಿ