ದಾಧೊಸ್ಕಾಯೆಚೆಂ ಗೊಡ್ಶೆಂ ಖಾವಯಿಲ್ಲೆಂ ಕವಿತಾ ಫೆಸ್ತ್û
ಹ್ಯಾಚ್ ಜನೆರ್ ಧಾ ತಾರಿಕೆರ್ ಸನ್ವಾರಾ ಮಂಗ್ಳುರ್ ಬಜ್ಜೋಡಿ ಶಾಂತಿ ಕಿರಣ್ ಆಂಗ್ಣಾಂತ್ ಚಲಲ್ಲೆಂ ಕವಿತಾ ಫೆಸ್ತ್ - 2009, ಹಾಜರ್ ಆಸಲ್ಲ್ಯಾ ಕಾವ್ಯ ರಸಿಕಾಂಕ್ ಗೊಡ್ಶೆಂ ಖಾವಂವ್ಚ್ಯಾಂತ್ ಯಶಸ್ವಿ ಜಾಲೆಂ. ನಾಂವ್ ವಸ್ತೊ ಕವಿ ಪೂರ್ಣನಂದಾಚಾರಿನ್ ಚಲೊವ್ನ್ ವೆಲ್ಲೆ ಪಂಚಭಾಷಾ ಕವಿಗೋಷ್ಟಿಂತ್ ಕರ್ನಾಟಕ, ಮುಂಬಯ್ ತಶೆಂ ಗೊಂಯಾಂ ಥಾವ್ನ್ ಆಯಿಲ್ಲ್ಯಾ ಕೊಂಕಣಿ, ತುಳು, ಬ್ಯಾರಿ, ಕೊಡವ ಆನಿ ಕನ್ನಡ ಭಾಷೆಂಚ್ಯಾ ಇಕ್ರಾ ಕವಿಂನಿ ಭಾಗ್ ಘೆವ್ನ್ ಕವಿತೆಚ್ಯಾ ಅಪ್ರೂಪ್ ನಂದನಾವನಾಕ್ ಹಾಜರ್ ಆಸಲ್ಲ್ಯಾಂಕ್ ಆಪೊವ್ನ್ ವೆಲೆಂ.
‘ಕವಿತಾ ಏಕ್ ಸೃಜನಾತ್ಮಕ್ ಸಕತ್. ಕಾನಾಂಲಾಗಿಂ ತಿ ಖೆಳೊಂಕ್ ಆಯ್ಲಿ ತರ್ ಆಯ್ಕತೆಲ್ಯಾಂಕ್ ಸಂಕಷ್ಟ್ ಫುಡ್ ಕರುಂಕ್ ಮೆಳೊಂಕ್ ನಜೊ. ತಿ ಸದಾಂಚ್ ಪೊಟ್ಲುನ್ ಧರ್ಚೆ ತಸಲೆ ಕಾವ್ಯರಸಿಕ್ ಜಾಯ್. ಅನುವಾದಿತ್ ಕಾವ್ಯಾಚ್ಯಾಕಯ್ ಮಾಯ್ ಭಾಶೆಂತ್ ಬರಯಿಲ್ಲೆ ಕವಿತೆನ್ ದಿಂವ್ಚೊ ಆನಂದ್ ಅಪಾರ್' ಅಶೆಂ ಮ್ಹಣಾಲೊ ದೇಶ-ಕಾಲ ತ್ರೈಮಾಸಿಕಾಚೆ ಸಂಪಾದಕ್ ವಿವೇಕ ಶಾನಭಾಗ್. ತೆ ಫೆಸ್ತಾಚೆ ಮುಕೆಲ್ ಸೈರೆ ಜಾವ್ನ್ ಉಲಯ್ತಾಲೆ.
ಆಪುಣ್ ಕನ್ನಡ ಭಾಶೆಂತ್ ಬರಯ್ತಾಂ ಜಾಲ್ಯಾರಿ ಆಪುಣ್ ಕೊಂಕಣಿಂತ್ ಚಿಂತಾಂ ಜಾಲ್ಲ್ಯಾನ್, ಕನ್ನಡ ಭಾಶೆಚ್ಯಾ ಸಾಹಿತ್ಯಾಕ್ ಏಕ್ ಅತ್ವಿಚ್ ದಿಶಾ ದೀಂವ್ಕ್ ಆಪುಣ್ ಸಕ್ಲಾಂ ಮ್ಹಣೊನ್ ತಾಣೆಂ ಸಾಂಗ್ಲೆಂ. ‘ಆಧುನಿಕ್ ಕಾಳ್ ಕಾವ್ಯ ರಚ್ಚ್ಯಾಕ್ ಸಾಂಗಲ್ಲೊ ಕಾಳ್ ನ್ಹಯ್. ಮನೀಸ್ ಸಮಸ್ಯಾಂಚ್ಯಾ ಸುಳಿಗೊಂದೊಳಾಂತ್ ಇತ್ಲೊ ಶಿರ್ಕಲಾ, ತಾಕಾ ಕವಿತಾ ತಸಲಯ ಸೃಜನಾತ್ಮಕ್ ಸಕ್ತೆ ಥಂಯ್ ಕುಸ್ಕುಟಾಚೊ ವೇಳ್ ನಾ ಜಾಲಾ. ಪುಣ್ ಆಮಿ ಕಾವ್ಯೆಂ ಸಾಂಡುಂಕ್ ನಜೊ’ ಅಶೆಂ ತಾಣೆಂ ವಿನತಿ ಕೆಲಿ.
ಕೇಂದ್ರ ಸಾಹಿತ್ಯ್ ಅಕಾಡೆಮಿ ಥಾವ್ನ್ ಪುರಸ್ಕಾರ್ ಜೊಡ್ಪಿ ನವಲ್ಕಾರ್ನ್ ಹೇಮಾ ನಾಯ್ಕ್ ಹ್ಯಾ ಕಾರ್ಯಾಚಿ ಮುಕೆಲ್ ಸೈರಿಣ್ ಜಾವ್ನಾಸಲ್ಲಿ. ‘ಅಶಿಕ್ಪಿ ಸ್ತ್ರೀ ನೀಜ್ ಜಾವ್ನ್ ಕವಯಿತ್ರಿ ಆನಿ ಬರೊವ್ಪಿ ಮ್ಹಣ್ತಾತ್. ಜಿವಿತಾಂತ್ಲ್ಯಾ ತಿಚೊ ಅನ್ಭೋಗಚ್ ಜಾಯ್ತ್ಯಾ ಸಂದರ್ಭಾಂನಿ ಕವಿತಾ ಜಾವ್ನ್ ವ್ಹಾಳ್ತಾ. ಪುಣ್ ದಾದ್ಲ್ಯಾಂನಿ ತಿಕಾ ಪಿಂತ್ರಾಯ್ತಾನಾ, ನಿಜಾಯೆ ಥಾವ್ನ್ ಬೋವ್ ಪಯ್ಸ್, ವೆಗ್ಳೆಚ್ ರಿತಿನ್ ಪಿಂತ್ರಾಯ್ಲಾಂ. ಎಕೆ ಬಾಯ್ಲೆಕ್ ಕವಿತಾ ಮ್ಹಳ್ಯಾರ್ ತಿಚಿಚ್ ಆತ್ಮಕಥಾ’ ಅಶೆಂ ತಿಣೆಂ ಸಾಂಗ್ಲೆಂ.
ಸುರ್ವೆರ್ ವೇದಿರ್ ಆಸಲ್ಲ್ಯಾ ಸರ್ವಾಂನಿ ಕವಿತಾ ಟ್ರಸ್ಟ್ ಕಾರ್ಭಾರ್ಯಾಂ ಸಾಂಗಾತಾ ಗುಲೊಬಾಂಚ್ಯೊ ಪಾಕ್ಳ್ಯೊ ವಾರ್ಯಾರ್ ಪಸ್ರಾವ್ನ್ ಕವಿತಾ ಫೆಸ್ತ್ ಉಗ್ತಾಯ್ಲೆಂ. ಹ್ಯಾಚ್ ಸಂದರ್ಭಾರ್ ಮೆಲ್ವಿನ್ ರೊಡ್ರಿಗಸಾಚೊ ಚವ್ತೊ ಕವಿತಾ ಪುಂಜೊ ‘ಪ್ರಕೃತಿಚೊ ಪಾಸ್’ ತಶೆಂ ಜೆ ಬಿ ಮೊರಾಯಸ್ ಹಾಚಿ ನೀಳ್ಗವಿತಾ ‘ದಿವ್ಯಾಮೃತ್’ ವಿವೇಕ್ ಶಾನ್ಭೋಗಾನ್ ಮೊಕ್ಳೀಕ್ ಕೆಲಿ.
ಸುರ್ವೆರ್ ಕವಿತಾ ಟ್ರಸ್ಟಾಅಚೊ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸಾನ್ ಯೆವ್ಕಾರ್ ಮಾಗೊನ್ ’ಕವಿತಾ ಏಕ್ ಸೃಜನಾತ್ಮಕ್ ಸಕತ್. ಆಮಿ ಆಮ್ಚೆಂ ಜಿವಿತಾ ಭಾಂಗರ್ ಕರುಂಕ್ ವಚುನ್ ಲೊಂಕಾಡ್ ಜಾಯಿತ್ ಯೆತಾಂವ್. ಅಸಲ್ಯಾಂಕ್ ಕವಿತಾ ಕಿತ್ಲಿ ರುಚ್ತಾ ಸಾಂಗೊಂಕ್ ಜಾಯ್ನಾ. ಎಕೆ ವ್ಯಕ್ತಿನ್ ಕವಿತಾ ಪೊಟ್ಲುನ್ ಧರಿಜಾಯ್ ಜಾಲ್ಯಾರ್, ತಾಣೆ ಸಂವೇದನ್ಶೀಳ್ ಆಸಜಾಯ್ ಪಡ್ತಾ. ಕವಿತಾ ಆಮ್ಚಿಂ ಕಾಳ್ಜಾಂ ಆನಿ ಮನಾಂ ನಿತಳ್ ಕರುಂಕ್ ಸಕ್ತಾ’ ಅಶೆಂ ಮ್ಹಳೆಂ.
ಹ್ಯಾಚ್ ಸಂದರ್ಭಾರ್ ಕೊಂಕಣಿ ಕಾವ್ಯಶೆತಾಕ್ ಮಹತ್ವಾಚಿ ದೇಣ್ಗಿ ದಿಲ್ಲ್ಯಾ ಕವಯಿತ್ರಿ ಅರುಣಾ ರಾವ್ ಕುಂದಾಜೆ ಹಿಕಾ ‘ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್’ ದಿಲೊ. ಆಪ್ಲ್ಯಾ ಉತರ್ ಪ್ರಾಯೆಕ್ ಲಾಗೊನ್ ತಿ ಯೇಂವ್ಕ್ ನಾತಲ್ಲಿ ಜಾಲ್ಲ್ಯಾನ್ ತಿಚೆ ತರ್ಫೆನ್ ದೀಪಾಲಿ ಕಂಭದಕೋಣೆನ್ ಹೊ ಮಾನ್ ಸ್ವೀಕಾರ್ ಕೆಲೊ. ಹೊ ಪುರಸ್ಕಾರ್ ರುಪಯ್ ಧಾ ಹಜಾರ್, ಯಾದಸ್ತಿಕಾ ಆನಿ ಮಾನ್-ಪತ್ರ್ ಆಟಾಪ್ತಾ.
ಕವಿತಾ ಟ್ರಸ್ಟಾನ್ ಮಾಂಡುನ್ ಹಾಡಲ್ಲ್ಯಾ ದೆವಾಧಿನ್ ಚಾರ್ಲ್ಸ್ ಆನಿ ತೆರೆಜಾ ರೊಡ್ರಿಗಸ್ ಸ್ಮಾರಕ್ ಅಖಿಲ್ ಭಾರತ್ ಭುರ್ಗ್ಯಾಂಚ್ಯಾ ಕವಿತಾ ಸ್ಪರ್ಧ್ಯಾಂತ್ ಜಿಕ್ಲಲ್ಯಾಂಕ್ ಹ್ಯಾಚ್ ಸಂದರ್ಭಾರ್ ಇನಾಮಾಂ ವಾಂಟ್ಲಿಂ. ಪಯ್ಲೆಂ ಇನಾಮ್ ಜಾವ್ನ್ ರುಪಯ್ ದೋನ್ ಹಜಾರ್ ಯುಗಾ ಆಡಾರ್ಕಾರಾನ್ ಸ್ವೀಕಾರ್ ಕೆಲೆ. ದುಸ್ರೆಂ ಇನಾಮ್ ಜಾವ್ನ್ ಎಫೆಂಝಿ ಫೆರ್ನಾಂಡಿಸಾನ್ ರುಪಯ್ ಏಕ್ ಹಜಾರ್ ಆನಿ ತಿಸ್ರೆಂ ಇನಾಮ್ ಜಿಕ್ಲಲ್ಯಾ ಗಾಯತ್ರಿ ನಾಯ್ಕ್ ಹಿಚೆ ತರ್ಪೆನ್ ನೂತನ್ ಸಾಖರ್ಧಾಂಡೆನ್ ರು. 750 ಸ್ವೀಕಾರ್ ಕೆಲ್.. ಹ್ಯಾ ವರ್ಸಾ ಹ್ಯಾ ಸ್ಪರ್ಧ್ಯಾಂತ್ ಅಡೆಶ್ಯಾಂ ವಯ್ರ್ ಭುರ್ಗ್ಯಾಂನಿ ಭಾಗ್ ಘೆತಲ್ಲೊ.
ಪಂಚಭಾಷಾ ಕವಿಗೋಷ್ಟಿಂತ್ ಕೊಂಕಣಿ ತರ್ಫೆನ್ ಆನ್ಸಿ ಪಾಲಡ್ಕಾ, ಮುಂಬಯ್; ಗ್ವಾದಲೂಪ್ ಡಾಯಸ್, ಗೊಂಯ್, ನಯನಾ ಆಡಾರ್ಕಾರ್, ಗೊಂಯ್, ಎಚ್ಚೆಮ್ ಪೆರ್ನಾಲ್, ಮಂಗ್ಳುರ್; ವಲ್ಲಿ ವಗ್ಗ, ಮೈಸೂರ್; ವಿನೀತಾ ನಾಯ್ಕ್, ಗೊಂಯ್ ಆನಿ ಪೂರ್ಣನಂದಾಚಾರಿ ಗೊಂಯ್ ಹಾಂಣಿ ಕವಿತಾ ವಾಚನ್ ಕೆಲೆಂ ಜಾಲ್ಯಾರ್ ಎಮ್. ಜಾನಕಿ ಬ್ರಹ್ಮಾವರ್, ಸಂಧ್ಯಾದೇವಿ ಪುತ್ತೂರ್, ಆಬೂಬಕ್ಕರ್ ಬಂಟ್ವೊಲ್ ಆನಿ ಬಿ ಪಿ ಅಪ್ಪಣ್ಣ ಮಡಿಕೇರಿ - ಹಾಂಣೀ ತುಳು, ಕನ್ನಡ, ಬ್ಯಾರಿ ಆನಿ ಕೊಡವ ಭಾಶೆಂನಿ ಆಪಾಪ್ಲ್ಯೊ ಕವಿತಾ ವಾಚ್ಲ್ಯೊ.
ಎಡಪದವು ಕುಡ್ಮಿ ಪಂಗ್ಡಾಥಾವ್ನ್ ಗೋಪಾಲ ಗೌಡಾ ಹಾಚ್ಯಾ ಮುಕೆಲ್ಪಣಾಖಾಲ್ ಸಾದರ್ ಜಾಲ್ಲ್ಯಾ ಗುಮಟ್, ತೊಣಿಯೊ ಆನಿ ದೊರಿಯೊ ಖೆಳಾನ್ ಸರ್ವಾಂಕ್ ಮಂತ್ರ್ ಮುಗ್ದ್ ಕರುನ್ ಸೊಡ್ಲೆಂ.
ಸುರ್ವೆರ್ ಆನಿತಾ ಸ್ಯಾಮ್ಸನಾನ್ ಮಾಗ್ಣ್ಯಾಗೀತ್ ಗಾಯ್ಲೆಂ ಜಾಲ್ಯಾರ್ ಕಿಶೂ ಬಾರ್ಕೂರಾನ್ ಉಪ್ಕಾರ್ ಆಟಯ್ಲೆ.
-ಕವಿತಾ ಭಾತ್ಮಿ