ಸಾಮಾಜಿಕ್ ಜಾಗೆಚ್ಯಾ ಅಂತರ್ಮಳಾಂಚ್ಯೊ ಆಶಾ ಸಾಹಿತಿಂನಿ ಭರ್ತಿ ಕರಿಜಾಯ್ - ಡೊ ಕಣವಿ
`ಹ್ಯಾ ದೇಶಾಚಿ ಸಾಮಾಜಿಕ್ ಜಾಗ್ ಜಿ ಆಸಾ, ತಿಚ್ಯಾ ಅಂತರ್ಮಳಾಂಚ್ಯೊ ಆಶಾ ಆಮ್ಚ್ಯಾ ಸಾಹಿತಿಂನಿ ಭರ್ತಿ ಕರ್ಚ್ಯಾಂತ್ ಯೋಗದಾನ್ ದೀಜಾಯ್' - ಅಶೆಂ ಮ್ಹಣಾಲೊ ಕವಿ ಡೊ. ಚನ್ನವೀರ ಕಣವಿ. ತೊ ಆಗೊಸ್ತಾಚೆ ತೆರಾ ತಾರಿಕೆರ್ ಸುಕ್ರಾರಾ ಕರ್ನಾಟಕ ರಾಜ್ಯಾಚೊ ಕನ್ನಡ ಆನಿ ಸಂಸ್ಕೃತಿ ಖಾತೊ, ಹಾಂಣಿ ಬೆಂಗ್ಳುರ್ಚ್ಯಾ ರವೀಂದ್ರ ಕಲಾಕ್ಷೇತ್ರಾಂತ್ ಮಾಂಡುನ್ ಹಾಡಲ್ಲ್ಯಾ ಅಖಿಲ್ ಭಾರತ್ ಭಾಷಾ ಸೌಹಾರ್ದ್ ದಿಸಾಚೆಂ ಉಗ್ತಾವಣ್ ಸಂಭ್ರಮಾಂತ್ ಉಲಯ್ತಾಲೊ.
ತಮೂಳ್ ತಿರುವಳ್ಳುವರ್ ಆನಿ ಕನ್ನಡಾಚೊ ಸರ್ವಜ್ಞ - ಮ್ಹಾಕವಿಂಚ್ಯೊ ಪ್ರತಿಮಾ ಚೆನ್ನೈ ಆನಿ ಬೆಂಗ್ಳುರಾಂತ್ ಲೊಕಾಕ್ ಭೆಟೊವ್ನ್, ಭಾಷೆ ಎಕ್ವಟಾಕ್ ಮೆಟಾಂ ಕಾಡುನ್ ಏಕ್ ವರಸ್ ಸಂಪಲ್ಲ್ಯಾ ವಗ್ತಾಚೊ ವರ್ಸಾನ್ ವರಸ್ ಉಡಾಸ್ ಕಾಡುಂಕ್ ಅಸಲೊ ಏಕ್ ದೀಸ್ ಹರ್ಯೆಕಾ ವರ್ಸಾ ಘಡೊವ್ನ್ ಹಾಡ್ಚೆಂ ಯೆವ್ಜಣ್ ಹಾತಿಂ ಘೆತ್ಲಾಂ.
`ಸಂಸಾರಾಚ್ಯಾ ಸರ್ವಯ್ ಧರ್ಮಾಂಕ್ ಆನಿ ತಾಂಚೆ ವಾಡಾವಳಿಕ್ ಆವ್ಕಾಸ್ ಕರ್ನ್ ದಿಲ್ಲೊ ದೇಶ್ ಆಜ್ ಕೊಮುವಾದಾಚ್ಯಾ ಜಾಳಾಂತ್ ಸಾಂಪಡ್ಲಾ. ಅಸಲ್ಯಾ ವಗ್ತಾ ಮಾಯಾಮೋಗ್ ಆನಿ ಸೊಸ್ಣಿಕಾಯ್ ದಾಕೊವ್ನ್, ಸಾಹಿತ್ಯ್ ಶೆತಾಥಾವ್ನ್ ವಿಶೇಸ್ ವಾವ್ರ್ ಜಾಯ್ಜೆ ಜಾಲಾ' ಮ್ಹಣ್ ತೆ ಮ್ಹಣಾಲೆ.
`ರಾಜಕೀಯ್ ಥೊಡೆಪಾವ್ಟಿಂ ಮನ್ಶಾಂ ಮಧೆಂ ಆಡ್ ಪಾಗೊರ್ ಉಬಾರ್ತಾ. ಪುಣ್ ಆದ್ಲ್ಯಾ ವರ್ಸಾ ಬೆಂಗ್ಳುರಾಂತ್ ಆನಿ ಚೆನ್ನೈಂತ್ - ತಿರುವಳ್ಳುವರ್ ಆನಿ ಸರ್ವಜ್ಞಾಂಚ್ಯೊ ಪ್ರತಿಮಾ ಲೊಕಾಕ್ ಬೆಟಯಿಲ್ಲೆಂ ಸಾಂಗಾತಿ ಮನೋಭಾವಾಕ್ ವ್ಹಡ್ ಏಕ್ ಗೊವಾಯ್. ಮ್ಹಾಕವಿ ಸರ್ವಜ್ಞ ಆನಿ ತಿರುವಳ್ಳುವರ್ -ನಿತಳ್ ನಿರ್ಮಳ್ ವ್ಯಕ್ತಿ ಜಿವಿತಾ ಥಂಯ್ ಜಾನಪದ್ ಸಾಹಿತ್ಯ ಮಾರಿಫಾತ್ ಆಸಕ್ತ್ ವಾಡಯಿಲ್ಲೆ ಮ್ಹಾನ್ ಮನೀಸ್' ಮ್ಹಣ್ ಕಣವಿನ್ ಸಾಂಗ್ಲೆಂ.
`ಚಡ್ ಊಂಚ್, ರಾಷ್ಟ್ರ್ ಭಾಸ್ ಮ್ಹಳ್ಳಿಂ ನಿಬಾಂ ದೀವ್ನ್ ಹಿಂದಿ ಆನಿ ಇಂಗ್ಲಿಷ್ ಭಾಸಾಂಚೆಂ ವೊಜೆಂ ಹೆರ್ ಭಾಷೆಂಚೆರ್ ಘಾಲ್ಚೆಂ ಸಾರ್ಕೆಂ ನ್ಹಯ್. ಹ್ಯಾವರ್ವಿಂ ಹೆರ್ ಭಾಶೆಚ್ಯಾ ಮನ್ಶಾಂಕ್ ಆಮಿ ದುಖಯ್ತಾಂವ್. ತ್ಯಾತ್ಯಾ ಗಾಂವಾಂನಿ ತ್ಯಾ ತ್ಯಾ ಗಾಂವ್ಚಿ ಭಾಸ್ ಪಯ್ಲಿ ಆನಿ ಪ್ರಮುಖ್ ಜಾಂವ್ಕ್ ಜಾಯ್. ಇಂಗ್ಲಿಷ್ ಸಂಪರ್ಕ್ ಭಾಸ್ ಜಾಲ್ಯಾರ್ ಪಾವ್ತಾ. ತಶೆಂಚ್ ಹಿಂದಿ ಭಾಸ್ ಕೊಣಾಯ್ಚೆರ್ ಥಾಪ್ಚಿ ನ್ಹಯ್. ಹೆ ಪಾಟ್ಭುಂಯ್ಚೆರ್ ಭಾಸೊ ಲೊಕಾಕ್ ದೆಣಿಂ ಜಾಯ್ಜಾಯ್ ಸೊಡ್ಲ್ಯಾರ್ ಶಿರಾಪ್ ನ್ಹಯ್. ರಾಜ್ಯಾಂನಿ ಎಕಾಮೆಕಾಚೆಂ ಭೆಷ್ಟೆಂ ಸುಕೆಂ ಗರ್ವ್ ಸಾಂಡುನ್ ಮಾಯಾಮೋಗ್ ಮಯ್ಪಾಸಾಕ್ ಚಡಿತ್ ಭಾರ್ ಘಾಲಿಜಾಯ್. ಅನುವಾದಾಚೆಂ ಕಾಮ್ ಭರಾನ್ ಚಲಜಾಯ್' ಅಶೇಂಯ್ ತಾಂಣಿ ಸಾಂಗ್ಲೆಂ.
ಹ್ಯಾ ವೆಳಾರ್ ಕೊಂಕಣಿ ಭಾಸ್ ಸಾಹಿತ್ಯ ಅಕಾಡೆಮಿನ್ ಸ್ವತಂತ್ರ್ ಭಾಸ್ ಮ್ಹಣೊನ್ ಮಾಂದುನ್ ಘೆಂವ್ಚ್ಯಾಂತ್ ಭಾಷಾ ತಜ್ಞ್ ಸುನೀತಿ ಕುಮಾರ್ ಚಟರ್ಜಿಚೆಂ ಯೋಗದಾನ್ ತಾಣೆಂ ಉಡಾಸಾಂತ್ ಹಾಡ್ಲೆಂ. ಕಶೆಂ ಮರಾಠಿವಾದಿಂನಿ ಕೊಂಕಣಿಚೆರ್ ಆಡ್ಕಳ್ಯೊ ಹಾಡ್ಲ್ಯೊ ಆನಿ ಹಾಕಾ ವಿರೋಧ್ ಕೆಲೊ ಮ್ಹಣೊನ್ ವಿವರಾಯಿಲ್ಲ್ಯಾ ತಾಣೆಂ ಕನ್ನಡಾಚೊ ಲೋಕ್ ಕೊಂಕಣಿ ಸಾಂಗಾತಾ ರಾವ್ಲೊ ಆನಿ ತಶೆಂ ಕೆಲ್ಲ್ಯಾನ್ ಆಜ್ ಕೊಂಕಣಿ ಸಾಹಿತಿ ರವೀಂದ್ರ ಕೇಳೆಕಾರಾಕ್ ಜ್ಞಾನ್ ಪೀಠ್ ಪ್ರಶಸ್ತಿ ಮೆಳೊಂಕ್ ಸಾಧ್ಯ್ ಜಾಲೆಂ ಮ್ಹಣೊನ್ ಸಾಂಗ್ಲೆಂ.
ವಿಮರ್ಶಕ್ ಪ್ರೊ. ಎಲ್.ಎಸ್. ಶೇಷಗಿರಿರಾವ್ ಉಲೊವ್ನ್ `ಮಾಯಾಮೋಗ್ ಕುಸ್ಕಾಲ್ಲಿಂ ಮನಾಂ ಸಾರ್ಕಿಂ ಕರ್ತಾ. ಮನ್ ನಿತಳ್ ಆಸ್ಲ್ಯಾರ್ ಕಸ್ಲೀಯ್ ಸಮಸ್ಯಾ ನಿವ್ರಾಂವ್ಕ್ ಸಾಧ್ಯ್ ಆಸಾ. ಭಾಷಾ ಸೌಹಾರ್ದತಾ ಆಜ್ ಸಂಕೀರ್ಣ್ ಗತಿಕ್ ಪಾವ್ಲ್ಯಾ. ಹ್ಯಾ ದೆಕುನ್ ಸಾಹಿತ್ಯಾಂತ್ ಅನುವಾದಾಚೆಂ ಕಾಮ್ ಚಡಿತ್ ಮಾಪಾನ್ ಜಾಯ್ಜಾಯ್' ಮ್ಹಣೊನ್ ತಾಂಣಿ ಸಾಂಗ್ಲೆಂ.
ಖಾತ್ಯಾಚೊ ಕಾರ್ಯದರ್ಶಿ ಬಿ ಆರ್ ಜಯರಾಮರಾಜೇ ಅರಸ್ ಉಲೊವ್ನ್ `ಅಂತರರಾಜ್ಯಾಂಚ್ಯಾ ವಿವಾದಾಂ ಮಧೆಂ ಭಾಶೆಚಿ ಗಿರೇಸ್ತಕಾಯ್ ಕೊಣಾಯ್ಚ್ಯಾ ದೊಳ್ಯಾಂಕ್ ಝಳ್ಕನಾ ಜಾಲ್ಯಾ' ಮ್ಹಣಾಲೊ. ಖಾತ್ಯಾಚೊ ನಿರ್ದೇಶಕ್ ಮನು ಬಳಿಗಾರ್, ಜೋಡ್ ನಿರ್ದೇಶಕ್ ಕಾ. ತ. ಚಿಕ್ಕಣ್ಣ, ನಿವೃತ್ತ್ ಐಎ ಎಸ್ ಅಧಿಕಾರಿ ಚಿರಂಜೀವಿ ಸಿಂಗ್ ಹ್ಯಾವೆಳಾರ್ ಹಾಜರ್ ಆಸಲ್ಲೆ. ಉಪ್ರಾಂತ್ ಭಾಷಾ ಸೌಹಾರ್ದ್ ಗೋಷ್ಠಿ ಚಲ್ಲಿ. ವೆವೆಗ್ಳ್ಯಾ ಜಿಲ್ಲ್ಯಾಂ ಥಾವ್ನ್ ಆಯಿಲ್ಲ್ಯಾ ಸಾಹಿತಿಂನಿ ಹಾಂತುಂ ವಾಂಟೊ ಘೆತ್ಲೊ. ಡೊ. ಎಮ್. ಚಿದಾನಂದಮೂರ್ತಿ ಪ್ರಮುಕ್ ಭಾಷಣಕಾರ್ ಜಾವ್ನ್ ಆಯಿಲ್ಲೊ ತರ್, ಡೊ ಸಿ ಎನ್ ರಾಮಚಂದ್ರನ್ ಅಧ್ಯಕ್ಷ್ ಆಸಲ್ಲೊ.
ದೊನ್ಪಾರಾಂ ಉಪ್ರಾಂತ್ ಕರ್ನಾಟಕ ತಶೆಂ ಹೆರ್ ರಾಜ್ಯಾಂ ಥಾವ್ನ್ ಆಯಿಲ್ಲ್ಯಾ ಕವಿಂಚಿ ಬಹುಭಾಷಾ ಕವಿಗೋಷ್ಠಿ ಚಲ್ಲಿ. ಅಧ್ಯಕ್ಷ್ ಜಾವ್ನ್ ಡೊ. ಅಜಯ್ ಕುಮಾರ್ ಸಿಂಹ್ ಥೊಡ್ಯಾ ವೆಳಾಕ್ ಆಸೊನ್ ಉಪ್ರಾಂತ್ ತೊ ಜಾಗೊ ಡೊ. ಚೆನ್ನವೀರ ಕಣವಿನ್ ಭರ್ತಿ ಕೆಲೊ. ಡೊ. ಅಗ್ರಹಾರ್ ಕೃಷ್ಣಮೂರ್ತಿನ್ ಆಶಯ್ ಭಾಷಣ್ ಕೆಲೆಂ. ಮಂಗ್ಳುರ್ ಥಾವ್ನ್ ಮೆಲ್ವಿನ್ ರೊಡ್ರಿಗಸ್ (ಕೊಂಕಣಿ), ಡೊ ಕವಿತಾ ರೈ (ಕನ್ನಡ), ವಸಂತ ಕುಮಾರ್ ಪೆರ್ಲ (ತುಳು) ಹಾಂಣಿ ತಾಂಚ್ಯೊ ಕವಿತಾ ಪೇಶ್ ಕೆಲ್ಯೊ. ಡೊ. ದೊಡ್ಡ ರಂಗೇಗೌಡ, ಬಿ. ಎ. ಸನದಿ, ಪ್ರೊ. ಎಸ್. ಜಿ. ಸಿದ್ಧರಾಮಯ್ಯ, ಲಕ್ಷ್ಮೀಪತಿ ಕೋಲಾರ, ಡೊ ಸುಕನ್ಯಾ ಮಾರುತಿ, ರೂಪಾ ಹಾಸನ, ಜಂಬಣ್ಣ ಅಮರಚಿಂತ, ಸಿದ್ಧರಾಜ್ ಪೂಜಾರಿ - ಹಾಂಣಿ ಕನ್ನಡ ಕವಿತಾ ವಾಚ್ಲ್ಯೊ ತರ್, ಶಾಯಿಸ್ತ ಯೂಸಫ್ (ಉರ್ದು), ಮಂಡೀರ ಜಯಾ ಅಪ್ಪಣ್ಣ (ಕೊಡವ), ಎಸ್. ಜೋಸೆಫ್ (ಮಲಯಾಳಮ್), ಗೋರಟಿ ವೆಂಕನ್ನ (ತೆಲುಗು), ಸುಕುಮಾರನ್ (ತಮಿಳು), ಅನುಪಮ ಉಜದರೆ (ಮರಾಠಿ), ಷಫಿಶೌಕ್ (ಕಾಶ್ಮೀರಿ), ಮಿಥುಲ್ ದತ್ತ (ಬೆಂಗಾಲಿ), ಜ್ಯೋತಿರೇಖಾ (ಅಸ್ಸಾಮಿ) ಆನಿ ಸುಜಾತ ಚೌಧರಿ (ಒರಿಯಾ) - ಹಾಂಣಿ ತಾಂಚ್ಯೊ ಭಾಸಾಂಚ್ಯೊ ಕವಿತಾ ಅನುವಾದಾ ಸವೆಂ ವಾಚ್ಲ್ಯೊ.