ನವೆಂಬರ್ ಬಾರಾ ತಾರಿಕೆರ್ ವಿಲ್ಸನ್ ಕಟೀಲಾಚೆಂ `ಪಾವ್ಳೆ' ಪುಸ್ತಕ್ ಮೊಕ್ಳೀಕ್
ಕೊಂಕಣಿ ಕಾವ್ಯಾಂತ್ ನವ್ಯಾ ಚಿಂತ್ಪಾಚೆಂ ವಾರೆಂ ವ್ಹಾಳಂವ್ಚೊ ಕವಿ ವಿಲ್ಸನ್ ಕಟೀಲಾಚ್ಯಾ ಕವಿತಾಂಚೆಂ ಫುಡ್ಲದ್ ಪುಸ್ತಕ್ `ಪಾವ್ಳೆ' ಹ್ಯಾಚ್ ನವೆಂಬರ್ 12 ತಾರಿಕೆರ್ ಸಾಂಜೆಚ್ಯಾ 4:30 ವೊರಾಂಚೆರ್ ಮೊಕ್ಳೀಕ್ ಜಾತಲೆಂ. `ಕವಿತಾ ಟ್ರಸ್ಟ್' ಹಾಂಚೆಂ ಪ್ರಕಾಶನ್ `ಕವಿತಾ ಪಬ್ಲಿಕೇಶನ್ಸ್' ಹಾಂಣಿ ಪರ್ಗಟ್ ಕರ್ಚೆಂ ಹೆಂ ಪುಸ್ತಕ್ ನಾಮ್ಣೆಚೊ ಕೊಂಕಣಿ ನಾಟಕ್ಕಾರ್, ಕವಿ ತಶೆಂ ಲೇಖಕ್, ಸಾಹಿತ್ಯ್ ಅಕಾಡೆಮಿ, ನವಿ ಡೆಲ್ಲಿ, ಹಾಂಚ್ಯಾ ಕೊಂಕಣಿ ಸಲ್ಹಾಗಾರ್ ಸಮಿತಿಚೊ ನಿಮಂತ್ರಕ್ ಪುಂಡಲೀಕ್ ನಾರಾಯಣ್ ನಾಯ್ಕ್ ಹಾಂಚ್ಯಾ ಹಾತಾಂನಿ ಹೆಂ ಪುಸ್ತಕ್ ಮೊಕ್ಳೀಕ್ ಜಾತಲೆಂ. 
ಪುಸ್ತಕ್ ವಿಮೋಚನಾಚೆಂ ಹೆಂ ಕಾರ್ಯೆಂ ಮಂಗ್ಳುರ್, ಬಲ್ಮಠ ಹಾಂಗಾಸರ್ ಆಸ್ಚ್ಯಾ ಕವಿತಾ ಟ್ರಸ್ಟಿ ವಿಲಿಯಮ್ ಪಾಯ್ಸ್ ಹಾಂಚ್ಯಾ ಓರ್ಕಿಡ್ ಆರ್ಟ್ ಗ್ಯಾಲರಿಂತ್ ಚಲ್ತಲೆಂ. ಓರ್ಕಿಡ್ ಆರ್ಟ್ ಗ್ಯಾಲರಿ ಬಲ್ಮಠ ಹೇಮಾವತಿ ಬಿಲ್ಡಿಂಗಾಂತ್, ಕರ್ನಾಟಕ ಬ್ಯಾಂಕ್ಯಾಚ್ಯಾ ವಯ್ಲೆ ಮಾಳಿಯೆರ್ ಆಸಾ.
`ಪಾವ್ಳೆ' ಪಾವ್ಸ್ ವಿಷಯಾಚೆರ್ ಬರಯಿಲ್ಲೆಂ ಚುಟ್ಕುಲಾಂಚೆಂ ಪುಸ್ತಕ್. ಹಾಂಗಾಸರ್ ಪಾವ್ಸ್ ಏಕ್ ನೀಬ್ ಮಾತ್ರ್. ಪುಣ್ ಪಾವ್ಸಾನ್ ಭಿಜೊಂವ್ಚೆ ಹರ್ಯೆಕ್ ವಿಷಯ್, ಜಾಂವ್ಕ್ ಪುರೊ ಮನ್ಶಾಚೆಂ ಕಾಳೀಜ್ - ಹ್ಯಾ ಪುಸ್ತಕಾಂತ್ ವೆವೆಗ್ಳಿಂ ವಸ್ತುರಾಂ ಶಿರ್ಕಾವ್ನ್ ವಯ್ರ್ ಯೆತಾತ್ ಆನಿ ವಾಚ್ತಲ್ಯಾಕ್ ವೆಗ್ಳ್ಯಾಚ್ ಸಂಸಾರಾಕ್ ಆಪೊವ್ನ್ ವ್ಹರ್ತಾತ್ - ಅಶೆಂ ಪ್ರಕಾಶಕ್ ಮ್ಹಣ್ತಾತ್. ಕವಿತಾ ಪಬ್ಲಿಕೇಶನ್ಸ್ ಹಾಂಚೆಂ ಹೆಂ ಸೊಳಾವೆಂ ನಿರ್ಮಾಣ್
ವಿಲ್ಸನ್ ಕಟೀಲ್ ವಿಶೇಸ್ ತಾಕ್ತೆಚೊ ಕವಿ. ಸಭಾರ್ ತೆಂಪಾ ಆದಿಂ ಪರ್ಗಟ್ ಜಾಯ್ಜಾಯ್ ಆಸಲ್ಲೆಂ ತಾಚೆಂ `ಪೀಕ್ ಆನಿ ದೀಕ್' ಕವಿತಾ ಪುಸ್ತಕ್, ಕಾಂಯ್ `ಪಾವ್ಳೆ' ಪುಸ್ತಕಾಚ್ಯಾ ಪಾಟಾಪಾಟ್ ಉಜ್ವಾಡಾಕ್ ಯೆಂವ್ಚ್ಯಾಕಯ್ ಪುರೊ.
ನವೆಂಬರ್ 12 ತಾರಿಕೆಚ್ಯಾ ಕಾರ್ಯಾಕ್ ಸಮೇಸ್ತ್ ಕೊಂಕಣಿ ಮೋಗಿಂಕ್, ಕವಿತಾ ಟ್ರಸ್ಟ್ ತಶೆಂ ವಿಲ್ಸನ್ ಕಟೀಲಾಚ್ಯಾ ಹಿತೈಷಿಂಕ್ ಆಪೊವ್ಣೆಂ ಆಸಾ.
ಕೊಂಕ್ಣಿ ಸಾಹಿತ್ ಸಂಸಾರಾಂತ್ , ವಿಲ್ಸನ್ ಕಟೀಲ್ ಹ್ಯಾಚ್ ನಾಂವಾನ್ ಫಾಮಾದ್, ವಿಲ್ಸನ್ ರೋಶನ್ ಸಿಕ್ವೇರಾ, ಗಾಂವಾನ್ ಕಟೀಲ್ಚೊ. 1980 ಇಸ್ವೆಚ್ಯಾ ಅಗೋಸ್ತ್ 31 ತಾರಿಕೆರ್ ಜಲ್ಮಲ್ಲ್ಯಾ ತಾಣೆ ಆಪ್ಲೆಂ ಮುಳಾವೆಂ ಶಿಕಪ್ ಕಟೀಲಾಂತ್ ಸಂಪಯ್ಲೆಂ. ಉಪ್ರಾಂತ್ ಶಿಕ್ಪಾಬಾಬ್ತಿನ್ ದಾವಣಗೆರೆ, ಬೆಂಗ್ಳೂರ್ ಗಾಂವಾನಿ ವಸ್ತಿ ಕರುನ್ ಆತಾಂ ಮಂಗ್ಳುರ್ ಥಾವ್ನ್ ಫಾಯ್ಸ್ ಜಾಂವ್ಚ್ಯಾ ’ದಿರ್ವೆಂ’ ಪತ್ರಾಚೊ ಸಹ-ಸಂಪಾದಕ್ ಜಾವ್ನ್ ತೊ ವಾವುರ್ನ್ ಆಸಾ.
ಪಿ ಯು ಸಿ ಉಪ್ರಾಂತ್, ಶಿಕ್ಪಾಮದ್ಲ್ಯಾ ವಿಶೆವಾಚ್ಯಾ ವರ್ಸಾಂನಿ ಆಪ್ಣಾಕ್ ಸಾಹಿತ್ಯಾಚಿ ವೋಡ್ ಆಯ್ಲಿ ಮ್ಹಣ್ತಾ ತೊ. ತಮಿಳ್ ಕವಿ ವೈರಮುತ್ತು, ಕೊಂಕ್ಣಿ ಕೊಗುಳ್ ವಿಲ್ಫಿ ರೆಬಿಂಬಸಾಚ್ಯಾ ಪದಾಂನಿ ಮುಳಾವೆಂ ಪ್ರೇರಣ್ ಜೊಡುನ್ ಉಪ್ರಾಂತ್ ವಾಚ್ಪಾಚಿ ವ್ಯಾಪ್ತ್ ವಿಸ್ತಾರಾವ್ನ್ ಸಾಹಿತಾಚಿ ಗುಂಡಾಯ್ ಆನಿ ಉಂಚಾಯ್ ಸಮ್ಜಂವ್ಚೆಂ ಪ್ರೇತನ್ ಕರೀತ್ ಆಸಾಂ ಮ್ಹಣ್ತಾ ತೊ.
ಕವಿತಾಂ ಮಾರಿಫಾತ್ ಸಾಹಿತ್ ಶೆತಾಕ್ ಪ್ರವೇಸ್ ಜಾಲ್ಲೊ ವಿಲ್ಸನ್ ಆಜ್ ಮಟ್ವ್ಯೊ ಕಾಣಿಯೊ, ಲೇಖನಾಂ, ವಿಮರ್ಸೊ- ಹ್ಯಾ ಗಜಾಲಿಂನಿಯಿ ಬರಂವ್ಚೆಂ ದಿಸ್ತಾ. ತಾಚ್ಯೊ ಕವಿತಾ ‘ರಾಕ್ಣೊ’, ‘ಮಿತ್ರ್’, ‘ಕಾಣಿಕ್’, ‘ಆಮ್ಚೊ ಯುವಕ್’, ‘ದಿರ್ವೆಂ’, ‘ಸೆವಕ್’, ‘ನಮಾನ್ ಬಾಳೊಕ್ ಜೆಜು’, ‘ರುತು’ ಪತ್ರಾಂನಿ ಆನಿ ಕೊಂಕಣೀ ಪೊಯೆಟ್ರಿ, ಕಿಟಾಳ್, ಕೊಂಕಣಿ ಫ್ರೆಂಡ್ಸ್, ದಾಯ್ಜ್ ಅಂತರ್ಜಾಳಿಂನಿ ಫಾಯ್ಸ್ ಜಾಲ್ಯಾತ್. ಕನ್ನಡಾಂತ್ ‘ಗೌರಿ ಲಂಕೇಶ್’, ‘ಸುಧಾ’ ಪತ್ರಾಂನಿ ತಾಚ್ಯಾ ಕವಿತಾಂಚೊ ಆಸ್ಪಾವ್ ಆಸಾ ಮಾತ್ ನ್ಹಯ್ ಆಕಾಶವಾಣಿ, ದೂರದರ್ಶನಾಂತಯ್ ತಾಣೆ ಕವಿತಾ ವಾಚನ್ ಕೆಲಾಂ ಆನಿ ದಸರಾ ಕವಿಗೋಶ್ಟಿಂತ್ ವಾಂಟೊ ಘೆತ್ಲಾ.
ಕೆವಿನ್ ಮಿಸ್ಕಿತ್ ಹಾಣೆ ತಾಳೊ ಬಸಯಿಲ್ಲ್ಯಾ ತಾಚ್ಯಾ ’ಕೆನ್ನಾ ಕೆನ್ನಾ’ ಪದಾಂಚ್ಯಾ ಉತ್ರಾಂ ಖಾತೀರ್ ಮಾಂಡ್ಸೊಭಾಣಾಚೊ ಪಯ್ಲೊ ವಿಶ್ವ ಕೊಂಕಣಿ ಸಂಗೀತ್ ಪುರಸ್ಕಾರ್ ಲಾಬ್ಲಾ. ರಾಕ್ಣೊ ಪತ್ರಾರ್ ಪೋಸ್ಟ್ ಮೊರ್ಟಮ್ ಆನಿ ದಿರ್ವೆಂ ಪತ್ರಾರ್ ಡಾಯ್ರಿ ತಾಚಿಂ ಲೊಕಾಮೊಗಾಳ್ ಅಂಕಣಾಂ. ವೆಗಿಂಚ್ ಕಿಟಾಳಾರ್ ತಾಚಿ ಸಾಹಿತೀಕ್ ವೋಳ್ ಸುರು ಜಾಂವ್ಚ್ಯಾರ್ ಆಸಾ.