ಆಪ್ಲ್ಯಾ ಉಲೊವ್ಪಾಂತ್ ಕೊಂಕಣಿ ಏಕ್ ಗೋಡ್ ಭಾಸ್ ಮ್ಹಣ್ ಸಾಂಗಲ್ಲ್ಯಾ ಪುಂಡಲಿಕಾನ್ ಕಾವ್ಯಾಂತ್ ಸದಾಂಚ್ಯಾ ಜಿವಿತಾಚೊ ಆಸ್ಪಾವ್ ಆಸಜಾಯ್, ಸಾಂಗಾತಾ ವಾಚ್ಪ್ಯಾಕ್ ಗಿನ್ಯಾನ್ ವಾಂಟಿಜಾಯ್ ಮ್ಹಣ್ ಸಾಂಗ್ಲೆಂ.  ಕಾಳಿದಾಸಾಚ್ಯಾ ಮೇಘದೂತ ಕಾವ್ಯಾಂತ್ ಸಾಮಾಜಿಕ್ ಸ್ಪಂದನಾ ಸವೆಂ ತವಳ್ಚೆಂ ವಿಜ್ಞಾನ್ ಸಯ್ತ್ ಆಸಲ್ಲೆಂ. ತ್ಯಾಚ್‍ಪರಿಂ ಕೊಂಕ್ಣಿ ಕಾವ್ಯಾನ್ ‘ವೆಳಾಕ್ ಮಿಕ್ವೊಂಚೆಂ ಬಳ್’ ಆಪ್ಣಾಯ್ಜೆ ಮ್ಹಣೊನ್ ಸಾಂಗ್ಲೆಂ.

‘ಕವಿತಾ’ಚೊ ಅಧ್ಯಕ್ಶ್ ಮೆಲ್ವಿನ್ ರೊಡ್ರಿಗಸಾನ್ ಪ್ರಾಸ್ತಾವಿಕ್ ಭಾಷಣ್ ದೀವ್ನ್ ಕವಿತಾ ಟ್ರಸ್ಟಾಚ್ಯಾ ವಾವ್ರಾಚಿ ವೊಳಕ್ ದಿಲಿ. ನಾಗೇಶ್ ಕರ್ಮಲಿನ್ ದಿಕ್ಸೂಚಿ ಭಾಷಣ್ ಕೆಲೆಂ. ಕೊಂಕಣಿ ಏಕ್ ಜಾತ್ಯಾತೀತ್ ಭಾಸ್ ಮ್ಹಣ್ ಸಾಂಗೊನ್  ಸಾಮಾಜಿಕ್ ಸಮಸ್ಯಾಂಕ್ ಸ್ಪಂದನ್ ಕೆಲ್ಲ್ಯಾ ಕೊಂಕಣಿ ಕಾವ್ಯಾಚಿ ಚರಿತ್ರಾ ಕರ್ಮಲಿನ್ ಸಭಿಕಾಂ ಮುಕಾರ್ ದವರ್‍ಲಿ.  ಗೊಂಯ್ ಥಾವ್ನ್ ಕೇರಳ ಪರ್ಯಾಂತ್ ಲಿಪಿ, ಬೋಲಿ ಆನಿ ಪ್ರಾದೇಶಿಕತೆಚ್ಯೊ ಮೆರೊ ಉತ್ರೊನ್ ಜಿ ಪರಂಪರಾ ಕೊಂಕಣಿ ಕಾವ್ಯಾಂತ್ ರುತಾ ಜಾಲ್ಯಾ ತಿ ಆತಾಂಚ್ಯಾ ಕವಿಂನಿ ಉರಯ್ಜಾಯ್ ಆನಿ ವಾಡಯ್ಜಾಯ್ ಮ್ಹಣ್ ತಾಣೆ ಉಲೊ ದಿಲೊ.

ಹ್ಯಾ ವೆಳಿಂ ಕವಿತಾ ಪಬ್ಲಿಕೇಷನ್ಸಾನ್ ಪರ್ಗಟಲ್ಲೊ ಎಮ್. ಪಿ. ರೊಡ್ರಿಗಸಾಚೊ ‘ರುಮ್ಡಿ ಫುಲಾಂ’ ಕವಿತಾ ಪುಂಜೊ ಪುಂಡಲೀಕ್ ನಾಯ್ಕಾನ್ ಮೊಕ್ಳೀಕ್ ಕೆಲೊ. ಅಕಾಡೆಮಿ ಕಾರ್ಯನಿರ್‍ವಾಹಕ್ ಕೃಷ್ಣ ಕಿಂಬಹೂನೆ ಹಾಣೆ ಯೆವ್ಕಾರ್ ಮಾಗೊನ್ ಫ್ಲೋರಿನ್ ರೊಚಾನ್ ಕಾರ್ಯೆಂ ಚಲಯ್ಲೆಂ.

ದೊನ್ಪಾರಾಂ ಉಪ್ರಾಂತ್ ಚಲಲ್ಲ್ಯ ಪರಿಸಂವಾದಾಂತ್ ಎಚ್ಚೆಮ್ ಪೆರ್ನಾಲ್ ಆನಿ ರಾಜಯ್ ಪವಾರಾನ್ ಪ್ರಬಂಧ್ ಮಾಂಡ್ಲೆ.  ಪರಿಸಂವಾದಾಚೆಂ ಅಧ್ಯಕ್ಷಪಣ್ ‘ರಾಕ್ಣೊ’ ಸಾತೊಳ್ಯಾಚೊ ಸಂಪಾದಕ್ ಫಾ. ಫ್ರಾನ್ಸಿಸ್ ರೊಡ್ರಿಗಸಾನ್ ಘೆತಲ್ಲೆಂ.  ಆಪ್ಲ್ಯಾ ಪ್ರಬಂಧಾಂತ್ ಹೆನ್ರಿನ್ ಕಾವ್ಯಾಂತ್ ‘ಕಾಳ್’ ಆನಿ ಸಮಾಜಾಚೆ ಜೊಕ್ತ್ಯಾನ್ ವಾಂಟೆ ಕರಿನಾ ತರ್, ಖಂಯ್ಚ್ಯಾ ಕಾಳಾಚ್ಯಾ ಕಾವ್ಯಾಂತ್ ಖಂಯ್ಚೆ ಸಾಮಾಜಿಕ್ ಸಮಸ್ಯಾಕ್ ಸ್ಪಂದನ್ ಜಾಲಾಂ ತೆಂ ಕಳ್ನಾ ಮ್ಹಣ್ ಸಾಂಗ್ಲೆಂ.  ಚಡಾವತ್ ಕಾವ್ಯೆಂ ಸಮಸ್ಯಾಕ್ ಫಕತ್ ಭಾಯ್ಲ್ಯಾನ್ ಮಾತ್ರ್ ಆಪುಡ್ನ್ ವೆತಾ ತರೀ, ಮೆಲ್ವಿನ್ ರೊಡ್ರಿಗಸ್, ಆಂದ್ರೂ ಡಿ’ಕುನ್ಹಾ, ಕಿಶೂ ಬಾರ್ಕೂರ್, ಜೆಬಿ ಮೊರಾಯಸ್, ಸ್ಟೀವನ್ ಕ್ವಾಡ್ರಸ್, ವಿಲ್ಸನ್ ಕಟೀಲ್ ಆನಿ ಫಾ ವಿಲ್ಲಿ ದಸಿಲ್ವ್ ತಸಲೆ ಕವಿ ಮಾತ್ರ್ ಸಾಮಾಜಿಕ್ ಸ್ಪಂದನಾವಿಶಿಂ ಗುಂಡಾಯೆನ್ ಚಿಂತುಂಕ್ ಲಾಂವ್ಚ್ಯೊ ಕವಿತಾ ರಚ್ತಾತ್ ಮ್ಹಣ್ ಸಾಂಗೊನ್ ತಾಂಚ್ಯಾ ಕವಿತಾಂಚೊ ಉಲ್ಲೇಕ್ ಕೆಲೊ.

ಉಪ್ರಾಂತ್ ಆಂದ್ರು ಡಿ’ಕುನ್ಹಾಚ್ಯಾ ಅಧ್ಯಕ್ಷಪಣಾಖಾಲ್ ಕವಿಗೋಷ್ಠಿ ಚಲ್ಲಿ.  ಎರಿಕ್ ಸೋನ್ಸ್, ವಿಲ್ಸನ್ ಕಟೀಲ್, ಡಿಂಪಲ್ ಫೆರ್ನಾಂಡಿಸ್, ಮಹೇಶ್ ನಾಯಕ್, ಎಮ್. ಪಿ. ರೊಡ್ರಿಗಸ್, ಶಕುಂತಲಾ ಕಿಣಿ ಆನಿ ರೊಬರ್ಟ್ ಫೆರ್ನಾಂಡಿಸ್ ಹಾಂಣಿ ಭಾಗ್ ಘೆತ್ಲೊ. 

‘ಕವಿತಾ’ಚೊ ಟ್ರಸ್ಟಿ ವಿಲಿಯಮ್ ಪಾಯ್ಸ್ ಹಾಣೆ ಧನ್ಯವಾದ್ ದಿಲೆ.

ಭಾತ್ಮಿ: ವಿತೊರಿ ಕಾರ್ಕೊಳ್