ಕವಿತಾ ಟ್ರಸ್ಟಾಚಿ ‘ಏಕ್ ಕಾವ್ಯಾಳ್ ಸಾಂಜ್’ ದಾಧೊಸ್ಕಾಯೆಚಿಂ ಲ್ಹಾರಾಂ ವ್ಹಾಳಯ್ತಾ
ದುಬಾಯ್: ಹ್ಯಾಚ್ ಒಕ್ಟೋಬರ್ 23 ತಾರಿಕೆರ್ ದುಬಾಯ್ ಆಲ್-ಮಾಸ್ ಹೊಟೆಲ್ ಎಪಾರ್ಟ್ಮೆಂಟಾಂತ್, ಕವಿತಾ ಟ್ರಸ್ಟಾನ್, ದಾಯ್ಜಿ ದುಬಾಯ್ ಸಾಂಗಾತಾ ಮಾಂಡುನ್ ಹಾಡಲ್ಲಿ ‘ಏಕ್ ಕಾವ್ಯಾಳ್ ಸಾಂಜ್’ ಹಾಜರ್ ಆಸಲ್ಲ್ಯಾಂ ಮಧೆಂ ದಾಧೊಸ್ಕಾಯೆಚಿಂ ಲ್ಹಾರಾಂ ವ್ಹಾಳವ್ನ್ ಮನಾಂ ಖುಶಿ ಕರ್ಚ್ಯಾಂತ್ ಸುಫಳ್ ಜಾಲಿ. ಪಾಟ್ಲ್ಯಾ ಎಕಾ ವರ್ಸಾಂತ್ ಕವಿತೆಚಿಂ ಪುಸ್ತಕಾಂ ಪರ್ಗಟ್ ಕೆಲ್ಲ್ಯಾ ಕವಿಂನಿ, ಕವಿತೆನ್ ತಾಂಕಾಂ ದಿಲ್ಲೊ ಅನ್ಭೋಗ್ ವಾಂಟುನ್ ಘೆತ್ಲೊ ಜಾಲ್ಯಾರ್ ಹೆರ್ ಕವಿಂನಿ ಕವಿತಾ ವಾಚನ್ ಕೆಲೆಂ.
‘ಖಂಯ್ಚೋಯ್ ಹವ್ಯಾಸ್ ಜಾಂವ್, ವೃತ್ತಿ ಜಾಂವ್ ಎಕ್ಲ್ಯಾಕ್ ತಾಣೆಂ ಕರ್ಚ್ಯಾ ಕಾಮಾಂತ್ ಮೋಗ್ ಆಸಜಾಯ್. ತುಮಿ ಕವಿಂನಿ ಅಸಲಿಚ್ ಆಸಕ್ತ್ ತಶೆಂ ಮೋಗ್ ತುಮ್ಚ್ಯಾ ಕಾಮಾಂತ್ ದಾಕಯ್ಲೊ ಜಾಲ್ಯಾರ್, ತುಮಿ ಕವಿತಾ ರಚ್ಚ್ಯಾ ಕಾಮಾಂತ್ ಚಡಿತ್ ಜಾಣ್ಕಾರಿ ಜಾತಲ್ಯಾತ್ ಆನಿ ಬರ್ಯಾಂತ್ಲ್ಯೊ ಬರ್ಯೊ ಕವಿತಾ ಲೊಕಾಕ್ ದೀಂವ್ಕ್ ಸಕ್ತಲ್ಯಾತ್. ಕವಿಂಕ್, ವಿಶೇಸ್ ಸಕತ್ ಆಸಾ. ತೆ ಜೀವ್ ನಾತಲ್ಲ್ಯಾ ವಸ್ತುಂಕ್ ಸಯ್ತ್ ಜೀವ್ ದೀಂವ್ಕ್ ಸಕ್ತಾತ್. ಅಸಲಿ ಏಕ್ ಸಕತ್ ಸಮಾಜೆಚ್ಯಾ ಬರ್ಯಾಕ್ ಉಪಯೋಗ್ ಜಾಂವ್’ ಅಶೆಂ ಮ್ಹಣಾಲೊ ಮುಕೆಲ್ ಸೈರೊ ಜಾವ್ನ್ ಆಯಿಲ್ಲೊ ಫೊರ್ಚುನಾ ಇಂಜಿನಿಯರಿಂಗ್ ಸಂಸ್ಥ್ಯಾಚೊ ಮ್ಹಾಲಕ್ ಮಾರ್ಕ್ ಡೆನಿಸ್ ಡಿ’ಸೋಜಾ. ತೊ ಕವಿತಾ ಗೋಷ್ಟಿಚೆ ಆಕ್ರೇಕ್ ಆಪ್ಲಿಂ ಭೊಗ್ಣಾಂ ಉಚಾರ್ತಾಲೊ.
‘ಮ್ಹಜಿ ಆವಯ್ ಕಾಜಾರಾ ಸೊಭಾಣಾಂನಿ, ಮಾಟವ್ ವಾಡಂವ್ಚ್ಯಾ ಸಂದರ್ಭಾರ್ ವೊವಿಯೊ ವೇರ್ಸ್ ಗಾಯ್ತಾಲಿ. ಉತ್ರಾಂನಿ ಹೆರಾಂ ಸಾಂಗಾತಾ ಝಗಡ್ತಾಲಿ. ಬಾಪಯ್ ಥಂಡ್ ಸ್ವಭಾವಾಚೊ ತರೀ ರಾತಿಚೆಂ ಇಲ್ಲೆಂ ಶೆಕ್ಲ್ಯಾ ಉಪ್ರಾಂತ್ ಘಾಟಾವಯ್ಲಿಂ ತಾಚಿಂ ಪದಾಂ ಭಾಯ್ರ್ ಪಡ್ತಾಲಿಂ. ಅಸಲೆ ಸಂಗ್ತಿಂನಿ ಆಪುಣ್ ವೊಡುನ್ ವೆತಾಲೊಂ. ಏಕ್ ಪಾವ್ಟಿಂ ಇಗರ್ಜೆಂತ್ ‘ಲಾಜರಸ್ ಆನಿ ವ್ಹಡ್ ಮನಿಸ್’ ನಾಟ್ಕುಳೊ ಹಾಂವೆಂಚ್ ಬರೊವ್ನ್ ಸಾದರ್ ಕೆಲೊ. ತ್ಯಾ ಸಂದರ್ಭಾರ್ ಹಾಂವೆಂ ರಚುನ್ ಗಾಯ್ಲಲೆಂ ಪದ್ ಸಂದರ್ಭಾಕ್ ಯೋಗ್ಯ್ ನಾತಲ್ಲೆಂ. ಮ್ಹಜೆ ಚುಕಿ ಖಾತೀರ್ ವೊರಯ್ಣಾರ್ ಜಾವ್ನ್ ಆಯಿಲ್ಲ್ಯಾ ಕಾಜಿತೊರಾನ್ ಉಪ್ರಾಂತ್ ಮ್ಹಾಕಾ ಲ್ಹಾನ್ ಕೆಲೊ. ಹ್ಯಾ ವರ್ವಿಂ ಜಾಯ್ತಿಂ ವರ್ಸಾಂ ಹಾಂವೆಂ ಬರೊಂವ್ಚೆಂ ಬಂಧ್ ಕೆಲೆಂ’ ಅಶೆಂ ಮ್ಹಣಾಲೊ ‘ನಿಮಾಣಿ ಸೈರಿಕ್’ ಪುಸ್ತಕಾಚೊ ಕವಿ ಪಿಯುಸ್ ಜೇಮ್ಸ್. ಉಪ್ರಾಂತ್ ಘರಾಂತ್ ಬರ್ಯಾಫಾಲ್ಯಾ ಸಂದರ್ಭಾರ್ ಕವಿತಾ ಬರೊವ್ನ್ ಬ್ರಹ್ಮಾವರ್ ಥಾವ್ನ್ ಬಾರ್ಕೂರ್ ಮ್ಹಜ್ಯಾ ಘರಾ ಪೋಸ್ಟ್ ಕರ್ತಾಲೊಂ. ತ್ಯೊ ಹಾಂವ್ ಬರಯ್ತಾಲೊಂ ಮ್ಹಣೊನ್ ಕೊಣಾಕಯ್ ಕಳಿತ್ ನಾತಲ್ಲೆಂ. ದುಬಾಯ್ ಪಾವ್ಲ್ಯಾ ಉಪ್ರಾಂತ್ ಮಾಯ್ ಭಾಸ್ ಜಾಳಿಜಾಗ್ಯಾಚ್ಯಾ ನವೀನ್ ಸಿಕ್ವೇರಾ ವರ್ವಿಂ ದಾಯ್ಜಿ ದುಬಾಯ್ ಆನಿ ಉಪ್ರಾಂತ್ ಮೆಲ್ವಿನ್ ರೊಡ್ರಿಗಸಾಚಿ ವೊಳಕ್ ಜಾಲಿ. ಆತಾಂ ಮ್ಹಜೆಂ ಪುಸ್ತಕ್ ಪರ್ಗಟ್ ಜಾಂವ್ಕ್ ಕವಿತಾ ಟ್ರಸ್ಟ್ ಕಾರಣ್’ - ಅಶೆಂ ತಾಣೆಂ ಸಾಂಗ್ಲೆಂ. ‘ಸುಯಿಸೈಡ್ ಬೊಮಿಂಗ್’ ವಿಶಯಾಚೆರ್ ‘ವಿಕಾಳ್ ಜಿವ್ದಾಳ್’ ಕವಿತಾ, ಆನಿ ಭುರ್ಗ್ಯಾಂಕ್ ಗುಂಡಾ ಮವಾಲಿ ಜಾವ್ನ್ ವಾಗಂವ್ಚೆಂ ನಾಕಾ ಮ್ಹಣ್ ಸಾಂಗ್ಚಿ ‘ಘಾಯೆಲ್ಲೆಂ ಲ್ಹಾನ್ಪಣ್’ ಕವಿತಾ ತಾಣೆ ಪೇಶ್ ಕೆಲ್ಯೊ.
ಮ್ಹಾಲ್ಘಡೊ ಮನೀಸ್ ಆಂತೊನ್ ಮೆಂಡೊನ್ಸಾನ್ ದುಬಾಯ್ಚ್ಯಾ ಜಿವಿತಾಚೆಂ ಚಿತ್ರಣ್ ಕರ್ಚೆಂ ‘ದುಬಾಯ್ ಸರ್ಗ್’ ಕವಿತಾ, ಆನಿ ಧಾರ್ಮಿಕ್ ಭೊಂವಾರಾಂತ್ಲಿಂ ನವಲಾಂ ಆನಿ ಉಬ್ಜೊಂಚಿಂ ಸವಾಲಾಂ ‘ನವಲಾಂ ಆನಿ ಸವಾಲಾಂ’ ಕವಿತಾ ಸಾದರ್ ಕೆಲ್ಯೊ.
ಸನ್ನು ಮೊನಿಸ್ ಬೊಳಿಯೆನ್ ಜೀವ್ ನಾತಲ್ಲ್ಯಾ ವಸ್ತುಕ್ ಮನ್ಶಾರೂಪ್ ದಿಲ್ಲಿ ಆಪುರ್ಬಾಯೆಚಿ ಕವಿತಾ ‘ವಾಟೆ ವಯ್ಲೊ ಫಾತರ್’ ಆನಿ ‘ಯೆತಾಯ್ ಜಾಲ್ಯಾರ್ ಯೇಗೊ ಘರಾ, ಕಾಳೀಜ್ ಆಜೂನ್ ಆಂಕ್ವಾರ್ ಆಸಾ’ ಅಶೆಂ ಸಾಂಗ್ಚಿ ಮೊಗಾಚಿ ಕವಿತಾ ‘ಯೇಗೊ’ ವಾಚ್ಲಿ.
ಅಶೋಕ್ ಡಾಯಸ್ ಬೈಂದೂರ್ ಹಾಣೆಂ, ತಾಂದ್ಳಾಂತ್ ಫಾತರ್, ದುಧಾಕ್ ಉದಕ್ ಜಶೆಂ ಮಿಲಾವಟ್ ಜಾತಾ ತಶೆಂಚ್ ಭಾಸ್ ಕಶಿ ಉತ್ರಾಂನಿ ಬದ್ಲೊನ್ ಯೆತಾ ಮ್ಹಣೊನ್ ಸಾಂಗ್ಚಿ ‘ಚಿಂತುನ್ ಪಳೆ’ ಕವಿತಾ ಆನಿ ಗ್ರೇಸ್ತ್ ಚಲಿಯೆಚ್ಯಾ ಮೊಗಾರ್ ಆಸ್ಚ್ಯಾ ದುಬ್ಳ್ಯಾ ಚಲ್ಯಾಚಿ ಕವಿತಾ ‘ರಾಕೊನ್ ರಾವ್ಲಾಂ’ ವಾಚುನ್ ಸಾಂಗ್ಲ್ಯೊ.
ಹ್ಯಾ ವರ್ಸಾ ‘ಲ್ಹಾರಾಂ ಲಜೆಲಿಂ’ ಪುಸ್ತಕ್ ಪರ್ಗಟ್ ಕೆಲ್ಲೊ ರೊಬರ್ಟ್ ಫೆರ್ನಾಂಡಿಸ್ ಉಲೊವ್ನ್ ‘ಕವಿತಾ ಕುಳಾರ್’ ಅಂಕಣಾಂತ್ ಪಿಂತುರ್ ಪಳೆವ್ನ್ ‘ಎಕ್ಸುರೆ ವಾಟೆಚೆ ವಿಳಾಪ್’ ಕವಿತಾ ಹಾಂವೆಂ ಬರಯಿಲ್ಲಿ. ಥಂಯ್ ಥಾವ್ನ್ ಸುರ್ವಾತ್ ಜಾಲ್ಲ್ಯಾ ಮ್ಹಜ್ಯಾ ಕವಿತಾ ಪಯ್ಣಾರ್ ಮೆಲ್ವಿನ್ ರೊಡ್ರಿಗಸ್ ಆನಿ ಆಂದ್ರು ಡಿ’ಕುನ್ಹಾನ್ ಖೂಬ್ ಸಾಂಗಾತ್ ದಿಲಾ. ಮ್ಹಜ್ಯಾ ಕವಿತಾಂನಿ ಭಾಷೆಚಿ ಗಿರೇಸ್ತಕಾಯ್, ಅಲಂಕಾರ್ ನಾಂತ್, ತ್ಯೊ ಸಾದ್ಯೊ. ತ್ಯೊ ಜಾಯ್ತ್ಯಾಂಕ್ ಮೆಚ್ವಲ್ಯಾತ್. ಹಾಚ್ಯಾಕಿ ವ್ಹರ್ತಿ ದಾಧೊಸ್ಕಾಯ್ ಆಪ್ಣಾಕ್ ನಾ’ ಮ್ಹಣೊನ್ ಸಾಂಗ್ಲೆಂ. ಕೊಂಕಣಿ ಪುಸ್ತಕಾಂ ವಿಕುನ್ ವೆಚೆ ಸಂದರ್ಭ್ ಆಜ್ ಭೋವ್ ಉಣೆಂ. ಚಡಿತ್ ಬೂಕ್ ಕೊಂಪ್ಲಿಮೆಂಟರಿ ಜಾವ್ನ್ ದೀಜೆ ಪಡ್ತಾತ್. ತಶೆಂ ದಿಲ್ಲೇಯ್ ವಾಚ್ತಾತ್ ಮ್ಹಳ್ಳಿ ಗ್ಯಾರಂಟಿ ನಾ. ಆನಿ ಥೊಡೆ ಜಣ್, ಅಶೆಂ ದಿಲ್ಲೆ ಬೂಕ್ ‘ಕಿತೆಂ ಕರ್ಮಾಂ ಹಾಣೆಂ ಬರಯ್ಲ್ಯಾಂತ್, ವಾಚಿಜೆ’ ಮ್ಹಣೊನ್ ವಾಚ್ತಾತ್’ ಅಶೆಂ ಕೊಂಕಣಿಚಿ ಹಕೀಗತ್ ಸಾಂಗ್ಲಿ. ಚುಟುಕಾಂ, ಹೈಕೂ ಸಾದರ್ ಕೆಲ್ಲ್ಯಾ ತಾಣೆಂ ‘ನಾಂವ್ ನಾತಲ್ಲಿ ಕವಿತಾ’ ಪೇಶ್ ಕೆಲಿ.
ಲ್ಯಾನ್ಸಿ ನೊರೊನ್ಹಾ ಹಾಸ್ಯ್ ಚುಟ್ಕುಲಾಂ ಪೇಶ್ ಕೆಲಿಂ ಮಾತ್ರ್ ನ್ಹಯ್ ‘ಮ್ಹಾರ್ಗಾಯ್’ ಆನಿ ‘ಮಂಗ್ಳೂರ್ ಶೆರಾ’ ಕವಿತಾ ಆಪ್ಲ್ಯಾಚ್ ಖಾಸ್ ಶೈಲೆನ್ ಸಾದರ್ ಕೆಲ್ಯೊ. ಜೊಸ್ಸಿ ಬಜ್ಜೋಡಿನ್ ‘ಸಪ್ಣಾಂ’ ಆನಿ ‘ಸೊಧ್ನಾಂ’ ಕವಿತಾ ವಾಚ್ಲ್ಯೊ ಜಾಲ್ಯಾರ್ ದಿನೇಶ್ ಕೊರೆಯಾನ್ ಮೆಲ್ವಿನ್ ರೊಡ್ರಿಗಸಾಚ್ಯಾ ‘ಹಾಂವ್ ವೆತಾಂ’ ಕವಿತೆಚ್ಯಾ ತಾಳ್ಯಾಚೆರ್ ಏಕ್ ‘ಪ್ಯಾರಡಿ’ ಗಾಯಾನ್ ಕೆಲೆಂ. ಮೆಲ್ವಿನಾಚ್ಯಾ ಪದಾಂತ್ ಎಕಾ ಭಗ್ನ್ ಪ್ರೇಮಿಚೆಂ ಚಿತ್ರಣ್ ಆಸಾ ತರ್ ದಿನೇಶಾಚೆ ಪ್ಯಾರಡಿಂತ್ ಆಮಾಲ್ಯಾಚೆಂ ಚಿತ್ರಣ್ ಆಸಲ್ಲೆಂ.
ಆಯ್ಲೆವಾರ್ ಆಪ್ನಾಚೆಂ ‘ರುಮ್ಡಿ ಫುಲಾಂ’ ಪುಸ್ತಕ್ ಪರ್ಗಟ್ ಕೆಲ್ಲೊ ಎಮ್.ಪಿ. ರೊಡ್ರಿಗಸ್ ಉಲೊವ್ನ್ ‘ಹಾಂವೆಂ ಚರಣಾಂ ಮಾತ್ರ್ ಬರಯ್ಲ್ಯಾಂತ್. ವಿದ್ವಾಂಸ್ ಸಿಲ್ವೆಸ್ಟರ್ ಮಿನೇಜಾಕ್ ಕಾಂಯ್ ಪನ್ನಾಸ್ ವರ್ಸಾಂ ಆದಿಂ ಕಂಕ್ನಾಡಿ ವಿಯಾನ್ನಿ ಹೊಮಾಂತ್ ಹಾಂವ್ ಮೆಳಲ್ಲೊಂ. ಮ್ಹಜಿ ವೊಳಕ್ ಕರ್ನ್ ದೀವ್ನ್ ಥೊಡ್ಯೊ ಕವಿತಾ ತಾಕಾ ವಾಚುಂಕ್ ದಿಲ್ಯೊ. ಹ್ಯೊ ಕವಿತಾ ನ್ಹಯ್, ಫಕತ್ ಚರಣಾಂ, ಕ್ರಿಯಾಪದ್ ಕವಿತೆಚ್ಯಾ ವೊಳಿಚ್ಯಾ ನಿಮಾಣೆಂ ಘಾಲ್ನ್ ಕೊಣಯ್ ಕವಿತಾ ಬರೊಂವ್ಕ್ ಸಕ್ತಾ, ಅಶೆಂ ತಾಣೆಂ ಸಾಂಗ್ಲೆಂ. ತಾಣೆಂ ಲುವೀಸ್ ಮಸ್ಕರೆಞಾಚ್ಯೊ ಕವಿತಾ ವಾಚುಂಕ್ ಸಾಂಗ್ಲ್ಯೊ. ಆಯ್ಲೆವಾರ್ ದೋನ್ ವರ್ಸಾಂ ಆದಿಂ ನವಿ ಏಕ್ ದಿಶಾ ಉದೆಲಿ. ಮ್ಹಜಿ ಪತಿಣ್ ಆನಿ ಹಾಂವ್ ದೊಗಾಂಯ್ ಅಸ್ವಸ್ಥ್ ಜಾಲ್ಯಾಂವ್. ದೊಗಾಂಯ್ ಫಾದರ್ ಮುಲ್ಲರ್ ಆಸ್ಪತ್ರೆಚ್ಯಾ ಖಟ್ಲ್ಯಾರ್. ಕಠಿಣ್ ಮನಾಸುಕ್ತೆಂತ್ ಪಾಶಾರ್ ಜಾವ್ನ್ ವೆತಾನಾ, ತಾಂತ್ಲೆಂ ಮುಕ್ತಿ ಜೊಡುಂಕ್ ದಿಸಾಕ್ ಏಕ್ ಕವಿತಾ ಬರೊಂವ್ಕ್ ಹಾಂವೆಂ ಸುರು ಕೆಲೆಂ. ಹ್ಯೊ ಕವಿತಾ ಮೆಲ್ವಿನ್ ರೊಡ್ರಿಗಸಾಕ್ ದಾಕಯಿಲ್ಲ್ಯಾ ವೆಳಾರ್ ಪುಸ್ತಕ್ ಪರ್ಗಟುಂಕ್ ತಾಣೆ ಒತ್ತಾಯ್ ಕೆಲಿ. ಪುಣ್ ಹೊ ಕವಿತಾ ಮ್ಹಣೊಂಕ್ ಹಾಂವ್ ತಯಾರ್ ನಾ.
ಆಮ್ಚ್ಯಾ ಹರ್ಯೆಕ್ಲ್ಯಾಂಚ್ಯಾ ಭಿತರ್ ಏಕ್ ಕವಿ ಆಸಾ. ಪುಣ್ ಹರ್ಯೆಕೊ ತಾಂಚ್ಯಾ ಭೊಗ್ಣಾಂಕ್ ಉತ್ರಾಂ ರುಪಿಂ ಭಾಯ್ರ್ ಹಾಡುಂಕ್ ಸಕನಾ’ ಅಶೆಂ ತಾಣೆಂ ಸಾಂಗ್ಲೆಂ. ಉಪ್ರಾಂತ್ ‘ರೆಂವೆರ್ ಫುಲ್ತಿತ್ ಸಾಳ್ಕಾಂ’ ‘ಕವಿತೆಚೆಂ ಪಕ್ವನ್’ ಆನಿ ‘ಧಾಂವ್ಣಿ’ ಹ್ಯೊ ತೀನ್ ಅವ್ವಲ್ ಕವಿತಾ ತಾಣೆ ಪೇಶ್ ಕೆಲ್ಯೊ.
ಓಲ್ವಿನ್ ಪಿಂಟೊನ್ ಚುಟುಕಾಂ ವಾಚ್ಲಿಂ ಆನಿ ಜವ್ಳ್ಯಾರುಪಾಂನಿ (ಮೆಟಾಫರ್ಸ್) ಬುಡಲ್ಲಿ ಆಪುರ್ಬಾಯೆಚಿ ಕವಿತಾ ‘ಜಿಣ್ಯೆರೊದ್’ ಸಾದರ್ ಕೆಲಿ.
ಮೆಲ್ವಿನ್ ರೊಡ್ರಿಗಸಾನ್ ಕವಿತೆನ್ ದಿಂವ್ಚೆ ದಾಧೊಸ್ಕಾಯೆಕ್ ಲಗ್ತಿ ಜಾಲ್ಲ್ಯೊ ಗಜಾಲಿ ದಾಕ್ಲ್ಯಾಂ ಮಾರಿಫಾತ್ ಸಾಂಗ್ಲ್ಯೊ ಆನಿ ಕವಿತಾ ಟ್ರಸ್ಟಾಚ್ಯಾ ವಾವ್ರಾಚಿ ಮ್ಹಾಯೆತ್ ದಿಲಿ. ‘ಸುರ್ಯಾಚಿಂ ಸೊಧ್ನಾಂ’ ತಶೆಂ ‘ದೇವಿ ನಿನ್ಕಾಸಿ’ ಕವಿತಾಯ್ ತಾಣೆಂ ಪೇಶ್ ಕೆಲ್ಯೊ. ಕಾರ್ಯಾಚೆ ಯಶಸ್ವೆಕ್ ಸಹಕಾರ್ ದಿಲ್ಲ್ಯಾ ದಾಯ್ಜಿ ದುಬಾಯ್ ತಶೆಂ ಆಲ್ ಮಾಸ್ ಹೊಟೇಲಾಚ್ಯಾ ಅನಿಲ್ ಕಾರ್ಡೊಜಾಕ್ ತಾಣೆಂ ಧನ್ಯವಾದ್ ದಿಲೆ.
ಸಗ್ಳೆಂ ಕಾರ್ಯೆಂ ದಿನೇಶ್ ಕೊರೆಯಾನ್ ಚಲೊವ್ನ್ ವೆಲೆಂ. ಕಾರ್ಯಾಕ್ ಉದ್ಯಮಿ ಜೋಸೆಫ್ ಮಥಾಯಸ್, ಜೇಮ್ಸ್ ಮೆಂಡೊನ್ಸಾ ಆನಿ ಜಾಯ್ತೆ ರಸಿಕ್ ಹಾಜರ್ ಆಸಲ್ಲೆ.
ತಸ್ವೀರ್ ಕುರ್ಪಾ: ನವೀನ್ ಸಿಕ್ವೇರಾ, ಮಾಯ್ಭಾಸ್